ARSENAL IN SANCHEZ THLAKTU TUR AN ZAWNG TA – Lawmkima Hmar

Arsenal chuan an forward Alexis Sanchez chu a man phu tawka dawrtu an awm chuan January thla hian hralh an hnial lo va, tunah rih chuan Manchester khaw club pahnih ten an beisei ve ve a, Manchester United phei chuan mumal takin an dawr tawh nghe nghe.

Arsenal hian a man atan £35m tal an beisei a, hetih mek lai hian Premier League leader City chuan £20m velin thla 6 chauh contract nei tawh hi an beisei thung a, £25m – £30m inkar sen pawh an huam niin an sawi bawk.

Hetih mek lai hian Manchester United chuan chuan pawisa fai bakah an winger Henrikh Mkhitaryan pek tel an huam a, City ai hian sum pawh an tawktarh sang zawk nia hriat a ni bawk.

London Hmar Veng club hian tum dang ang bawkin an player thate club dangah ui tak chunga a thlah liam a ngai dawn tih hriain a thlakna tur an zawng kual mek a, nipui laia an beisei Thomas Lemar (AS Monaco) chu duh mahse January thla hian an chhuak dawn lo tih a chiang a, Boca Juniors Argentine forward Cristian Pavon leh French Ligue 1 club Bordeaux forward Malcom te an beisei mek tih BBC palai David Ornstein leh Simon Stone te chuan an sawi.

Gunners hi an player pawimawh Patrick Vieira (to Juventus), Henry (to Barcelona), Hleb (Barcelona), Flamini (free transfer to AC Milan), Nasri (to Man. City), Van Persie (to Man. United) Fabregas (to Barcelona), A. Cole (to Chelsea) etc te chuan sum um leh trophy chawi duh avangin an lo chhuahsan tawh a ni.

Tute nge an nih ?:

Cristian Pavon : Kum 21 mi niin, 5 ft 8.5 inch a sang a ni a, player che rang tak niin a shot a turu hle a, box pawn atanga goalkeeper tihthaih chi a ni. Ke ding lam hmang thiam niin Right wing-a khel nasa a, ram tan senior level-ah vawi hnih koh tawh niin a club tan vawi 51 inlanin goal 14 a thun tawh.

Malcom : Brazilian veikhawr kum 20 mi , 5 ft 7 1⁄2 inch a sang, Malcom Filipe Silva de Oliveira hian senior level-ah ram tan a la khel lo va, age level-ah erawh Brazil rinrawl a ni fo tawh thung. A ball khalh leh tlanpui theihna chuan mit a la a, a chetran leh ball thiam avangin a ball chanlai chhuhsak a har hle. Bordeaux tan hian game 78 khel tawhin goal 18 a thun tawh a, tun season League 1 ah vawi 18 inlanin goal 7 a thun tawh bawk.

Tunge tha zawk : Player pahnihte te hi tunlaia South American player hmasawn chak tak an ni ve ve a, Sanchez meuh thlaktu atana beisei an nih avangin an nep lo tih chu a chiang. Chutih rual erawh chuan an thlak tur erawh tun dinhmunah chuan an thlak zo lo hle ang tih chu inhrilh kher ngai lo va thil chiang a ni bawk ang.

Argentine forward Pavon hian dribbling leh ball hold lamah chuan Malcom hi a tluk lo va, amaherawhchu, a shot erawh Malcom ai hian a that zawk bakah a cross ball pawhin awmzia a nei tam zawk.

An khelh dan phung en chuan Pavon hian Van Persie khel a zul deuh a, ball a chan fuh tawh chuan a hlauhawm hle.

Malcom hi Arjen Robben nena tehkhin thin niin a thlak tura beisei Sanchez ang thovin ball a chan veleha a laia luhpui nasa thin ve ve tho a ni a, free-kick a hlawhchhuak tam a, a pet thiam hle bawk. Amaherawhchu, shot leh ball cross lamah chuan Pavon a tluk lo deuh(?).

An pahnih zing atanga pakhat zawk zawk thlanchhuah tur a nih chuan Manchester United Scout pawhin a khel an lo en fo tawh, Europe a tawnhriat nei Malcom hi a thlanawm zawk niin a lang a, Pavon ai hian game a siam zawk bawk.

He Brazilian winger/forward hi Arsenal pawhin tih tak zetin an rim mek niin BBC hmuipuipu David Ornstein chuan a sawi bawk.