Arsenal, Tottenham leh England defender thin Sol Campbell chuan football a chawlhsan thu a puang ta e.

Campbell,37, hi season hmasa tawp khan Newcastle chuan an chhuahtir a, hemi hnu hian hliam neuh neuh in a tlakbuak bawk avangin khelhna club a hmu leh thei ta lo a ni.

Sky Sports News chu hrilhin,”Thutlukna siam harsa tak a ni. Hunrei tak chhung infiammi hlawhtling nih chuan chawlhsan mai hi a harsa a ni.” a ti a, sawi belh zelin,”Professional football ka khel leh tawh dawnlo a ni han tih mai pawh hi a harsa a, a chhan chu hunrei tak chhung hmun sang takah ka awm a, ka thawhrimna leh ka inpekna zawng zawng vangte hi a ni.” a ti.

“La inkhel tura sawmna chu ka dawng a, Premier League club pakhat leh rawn kaithar club pakhat ten min sawm a, mahse khatihlai khan ka ke ah hliam ka nei a, a dam hnuah kha chuan hmundang an lo hawi tawh si a ni.” a ti bawk.

Campbell hian Tottenham-ah a professional football zinkawng a rawn tan chho a, hma sawn chho hle in kum 2001 khan fans te sawisel hlawh takin Tottenham hmelma Arsenal a zawm a ni. Gunners tan hian hlawhtling takin kum nga chhung a khel a ni.

He center-back hi 2003-04 ‘Invincibles’ team a mi pawimawh tak niin Barclays Premier League trophy vawi thum leh FA Cup vawi hnih a lakpui a, Arsenal in 2006 a UEFA Champions League final an khelh khan an goal awmchhun a thun bawk a ni.

England tan vawi 73 khelin major international tournament a zawnin vawi ruk a telpui a, team a mi pawimawh a ni thei zel bawk a ni.

Arsenal a chhuahsan hnuin Portsmouth-ah a kal leh a, kum 2008 khan FA Cup a lakpui leh bawk a ni. Hemi hnu hian Gunners tan a rawn khel leh zual a, tin, npower League Two team Notts County tan a khel leh bawk a, Newcastle United ah a hun hnuhnung rawn hmang leh bawkin anni tan 2010-2011 khan vawi riat chiah a inlan a ni.