Emirates Stadium ah Arsenal in Liverpool an mikhual a, tun hnai a game tha tak khel mek pahnih te innuai ah Liverpool ding chang in Arsenal chak kaltluang lai an chhut chah sak ta. Liverpool tan Jota leh Firmino ten goal an khung a, table hmahruaitu Man City lakah Liverpool hi point khat chiah in an tlem zawk a, game kua la khelh turah Man City nen an la intum dawn bawk avangin an chak vek chuan PL nomawi an chawi thei a, an kutah a innghat a tih theih ta.
Arsenal 0-2 Liverpool
(Jota 54′, Firmino 62′)
Premier League inkhel hmuhnawm takah chak loh thianglo tluk a pawimawh game club pahnih tan a ni thei ve ve a, Liverpool tan champion an tum a nih chuan chak a ngaih rualin Arsenal in top 4 a dinhmun luah nghet turin game pawimawh a ni bawk.
Inkhel an tan a team pahnih ten goal venhim aiin pet goal an thlang a, an in nawr tawn zak zak. Arsenal lamin bul an tan tha zawk a tih theih a, amaherawhchu chance tha erawh an nghah hran lo. Liverpool tan Salah bench ah a thut avangin tlarhma ah Jota, Mane leh Diaz ten bul an tan a, khel ho khat tih a lang deuh. Arsenal tan Martinelli a langsar a, vawi tam tak Liverpool tlarhnung a nawr nghing fo, first half ah goal a lut lo.
2nd half an tan a, team pahnih te an innawr nghal, Thiago back pass sual avangin Odegaard chuan a pet goal nghal teuh hle a, Liverpool keeper Alisson banah a pet per. Thiago a insiam tha nghal a fing takin through ball Jota a pek chu minute 54′ naah Jota chuan Liverpool goal khatna a khung.
Klopp chuan pet goal tu Jota leh Diaz te lachhuak in Firmino leh Salah te a dah lut a, game pawh a nung sawt. Minute 64′ naah Liverpool left back Robertson thawhrim rah sengin Firmino chuan Liverpool goal hnihna a khung leh a, 2-0 in hma an hruai. Hemi hnu atang hian game ah Liverpool an chungnung chhunzawm zel a, Arsenal in chhang let turin tha an nei thei ta meuh lo. 2-0 in mikhual an chak zawk a, point hlu tak an hlawhchhuak ta a ni.
Jurgen Klopp leh a naute an chetha chhunzawm zel a March thla Premier League match thum an khelh an an chak vek bakah goal an chhuah lo. Carabao Cup champion team hi UCL quarter final an in pet kai tawh a, kar tawp ah FA Cup quarter final ah Nottingham Forest an hmachhawn leh dawn a ni.
