ARSENAL TAN AN CLUB NEITUTE AN CHE E!

Arsenal in Emirates Stadium sakna atana loan an lak, an club sum hmuh atanga an rulh tlauh tlauh chu an club neitu Stan Kroenke company Kroenke Sports & Entertainment (KSE) chuan anmahni company rulh turin an lâksak tih London Stock Exchange ah tarlan a ni.

Pa uikawm ve tak ni a hriat Stan Kroenke-a’n hetia Arsenal tana ke a rawn penchhuah nachhan chu tunlai hripui avanga sum harsatna lo awm chho mekah a club chu chhâwk a, sum an hmanna kawngah pawh zalen zawka club tana sum an hman theihna turin a ti ni a sawi a ni.

Khawvel puma hripui avanga sum leh paia harsatna a thlen laiin Arsenal neitu Kroenke te chhungkua erawh an hausakna a pung thur thur tih thla liamta ah te kan lo tarlang tawh a. Hetianga a hausakna hi kiam lam aia pun lam a pan mêk lai hian nikuma report tihchhuahah kha chuan mahni club tana sum la thehchhuak miah lo niin Kroenke hi an tarlang a nih kha.

Engtiang chiahin nge hetia an pu berin Gunners ritphur a chhâwk avang hian Mikel Arteta’n team thar a din chhohna kawngah hian nghawng a neih dawn tih erawh hriat a ni lova. Mi thenkhat chuan player leina tur sum pawh a thehchhuak nual dawn ni ten an sawi a, thenkhat erawhin Kroenke hi an la ring hleithei lova, tuna hetia loan a rulh sak tur pawh hi a hmai phihna mai mai angah an ngaih sak chauh thung a ni.

Arsenal tantute tân pawh a phurawm dawn viau laiin phur sual chu thil hlauhawm tak a ni ve ang.