Thawhleh zing dar 1.30 a Barclays Premier League khelh ah Arsenal in Emirates Stadium ah Newcastle United 2-1 a hnehin Champions League football khelh an duhzia an tilang zual deuh deuh. Hun pangai ah ball an chan zat inang tawk viau mahse goal hma ah Arsenal an che hlauhawm thei zawk a. Newcastle United hian draw tumin bei tang tang mahse an goal a tawp lamah an humhimzo ta biklo a ni.

Line up:
Arsenal: Szczesny, Sagna, Vermaelen, Koscielny, Gibbs, Song, Arteta, Rosicky, Chamberlain, Walcott, Persie
Newcastle United: Krul, Simpson, Coloccini, Williamson, Santon, Tiote, Cabaye, Gutierrez, Ben Arfa, Ba, Obertan

Newcastle United hi a bet zawkah tang mahse hma an hruai hmasa a. Arsenal in Nasri aia an hnawl tak Ben Arfa chuan player tha a nih zia minute 14 na ah Szczesny goal ah dinglam atangin mawizet mai in a thun a. Arsenal in an thah leh chiah tihin Newcastle United lamah minute 1 pawh a ral hma in goal an thun leh nghal. Walcott in dinglam atanga ball a pek phei chu captain van Persie in lo dawng in, a Dutch pui Newcastle United goalkeeper Tim Krul danhmanlohin mawizetin a bum a, net puar pop khawpin a goal. Minute 90 na ah 1-1 a la ni a, minute 5 pekbelh a ni. Minute 88 atangin Arsenal in Newcastle United defender te an chhaih buai tan tawh a, hun tawp dawn minute 1 a la awm tihin Walcott cross ball bawk chu Vermaelen in Newcastle United goal lamah a rawn thun a, ball leh amah chawpin goal ah an lum lut. Champions League khelh tum Arsenal leh an fans te an lawm ngei mai. Hun tawp thleng a mit la ber chu khelmual chhunga Dutch striker van Persie leh Dutch goalkeeper Krul te tawngkam leh chetzia a inbei kha a ni awm e.