Bul tanna-
Kum 134 kal ta, 1886 October thla khan Scotsman David Danskin, Mechanical Engineer leh a thuih hruai mi 15 intiam rual chuan Football club an din a, Thames lui kama silai leh a mu siamna hmun pakhat ‘Royal Arsenal Complex’ ah inhmu khawmin, Club hmingah ‘Dial Square’ an sa. Thla khat a liam hnuah a hming chu ‘Royal Arsenal’ tiin an thlak a, London chhim chhak lama Plumstead Common chu an ‘Home’ hmasa ber a ni.
A sakhmingah Arsenal-
1891 ah Professional-ah an inziak lut a, London khawpuia Professional Football Club hmasa ber an ni ta a ni. Kum 1893-a Football League an zawm dawnah an hming chu ‘Woolwich Arsenal’ tiin an ziak lut. Kum 1903-ah First Division an khel tan a, 1913 ah a vawi khat nan leh vawiin thlenga an History-a a awm chhun ni turin Division hniamah an Relegate. Hemi kum vek hian an hminga ‘Woolwich’ tih chu paihin ‘The Arsenal’ tih an ni tan a, an stadium hmasa ber Highbury-ah an insuan lut zui bawk. A hnu kum 4/5 velah ‘The’ hi paih lehin, ‘Arsenal’ tih chu a pu tan ta a ni.
Hma lam pan zelin-
Kum 1919 khan First Division chu tih len a ni a, Relegate thar te leh Second Division-a khel mek te atangin First Division-a khel tur chu Vote hmangin an zawng a, an hmelma Tottenham chu Vote hmanga hnehin First Division an khel leh ta hram a, an hawi kir leh ta lo.
No mawi-
1930-31 season-ah a vawi khat nan First Division-ah an Champion a, 1932–33, 1933–34, 1934–35, 1937–38, 1947–48, 1952–53, 1970–71, 1988–89, 1990–91 ah te an Champion zui bawk.
Rawlthar vul lai a chuai leh thin-
Kum 1992-93 Season-ah Premier League a lo piang a, 1996-ah a hun laia mak tih hlawh takin, hriat hlawh vak lo Arsene Wenger chu Manager atan an la lut. He French pachal hian Arsenal chu rahbi thar kai puiin, 1998-99, 2001-02 ah te a Champion pui hnuah, 2003-04 Season-ah hneh loh nei lovin an Champion leh a, vawiin thlengin hetiang ti thei awm chhun an la nih rualin, an ropuina chu mang chhiain a zui a, Premier League Trophy an chawi hnuhnun ber a ni zui ta rih bawk. Wenger-an rualthar rual a chher hriamte nen beiseiawm taka Season an hman tumah pawh, ‘rawlthar vul lai a chuai’ tih chu a thunawn a ni leh thin!
Tawnmang mawl an chang mai dawn em ni?-
Record ropui tak a siampui hnuah, Emirates Stadium sual chhuah pui a, kum 2006-a luah luh puitu Wenger chuan kum 2018 khan Arsenal a chhuahsan a, hun rei tak League no mawi chawi tawh lo Arsenal chuan League no mawi chawipui theitu tur mi thar tu emaw an beisei; mahse, Arsenal siam liantu, no mawi aia Football mawina leh ropuina dah hmasatu Arsene Wenger-an a chhuahsan hnuah an mang chhia chuan kiansan a hnekin, a zual zel zawk emaw ni tih tur a ni a, vawiin thlengin an beisei chu pek an la ni lo – Arsenal vul lai ni te chu mumang ang maia fiah lo a ni tan ta!
Manager nghawng-
Season thar atan pawh beiseiawm zingah an tel phak meuh lo a tih theih a, Gunners lam beiseina pawh a sang lutuk lo niin a lang. Mahse, hmasawn erawh an beisei tur a ni, Manager pakhat hnuaia kum 22 zet han awm chuan, Manager inthlak nghawng hi na ve tak tur a ni a, chumi nghawng na tak chu an tuar mek a nih a rinawm.
Duhsakna-
Club ropui, History ropui siamtu leh chanchin ropui tak nei Arsenal hian a hniam lai tawng mah se, tho chhuak leh turin he club-ah hian theihna a awm a, engtikah emaw chuan Arsenal ropui tak kan la hmu leh ngei ang. Arsenal ropuina intan thar hun hi tun season pawh a ni thei. Tu dinhmun mah hi a tha reng thei lo va, invawrh san lai leh tlak hniam lai kan nei thin. Chuvangin, Arsenal invawrh san leh hun tur beiseina nena thlir chunga season nuam tak hmang turin, Arsenal Fans zawng zawng duhsakna kan hlan a che u.
