A heading khi vawiina kan zawhna ni lovin, 1996 September thlaa English media leh mipuiho zawhna a ni! May 13, 2020 ah erawh hetiang zawhna inzawh a ngai tawh lo.
September 22, 1996 khan Arsenal Manager a nih tur thu puanzar a ni a, chumi tuka English Media liante Sports Column-a langsar ber chu Arsene Wenger-a chungchang a ni a, an hmel hriat loh thu a tam hle. London Evening Standard phei chuan ‘ARSENE – WHO?’ tiin zawhna nen bul an tan sak. Ni e, English Football History-a Club ropui berte zinga mi Arsenal meuhin Manager atana an lak luh hi tunge a nih an hre mumal lo!
Japanese Club Nagoya Grampus Eight atangin Arsenal hian an la lut a, a chhuahsan Club ngaihtuahin a that viau ring an awm meuh lova, Arsenal thuneituten dem an hlawh a, an tihsual ringtu an tam hle. Mahse, an tihsual ringtu an tam zawh poh leh ‘ring sualtu’ an tam a ni mai !
Arsenal a zawm atanga a Match hmasa berah Blackburn Rovers chu 2-0 in an hneh a, season tawpah pathumna a nihpui. Mipui hriat loh kha beisei phak bakin a che tha chho a, Arsenal-a season hnih a hmanna leh season tluan (a tir atanga a tawp) a hmanna hmasa ber 1997/98 ah Arsenal chu Premier League Title a lakpui nghal a, hemi hmaa League no mawi an chawi hnuhnun ber chu 1991 daih tawh a nih avangin an lawm hle – “Arsene – Who?” tia a chanchin ziaktute chuan hmel hriat thar an neih chanchin chu an ziak tui hle! Chu mai a ni lo, English Premier League-a la thleng ngai lo thlen tirin, 2003/04 season-ah hneh loh nei miah lovin Arsenal a Champion pui zui leh a, an va hre chiang tawh teh reng em !
Tichuan, hun a kal zel a, Stadium thar an sak avangin Arsenal sumpai dinhmun a tha lova, chu chu Wenger pawn tuarin Player tha leina tur a nei hlei thei lova; tin, Player man to tak lei aia mahni chher chhuah Champion pui tum mi a ni hrim hrim bawk. A hnathawh dan an hmuhin fans te leh media te chuan ‘The Professor’ tiin an sawi hial, hei hian ‘Tunge a nih?’ tih zawhna chu thui takin a chhang nghal ngei ang. Engpawhnise, sum leh paia an harsatnain an result a nghawng lo thei lova, 2004/05 FA Cup-ah a Champion hnuah kum riat zet mi no mawi chawi lai a thlir a, 2013/14 FA Cup-ah no mawi a chawi leh chauh a ni. Chumi hnua FA Cup vawi hnih a chawi leh chu Major Trophy a chawi hnuhnung an ni ta. League-ah vawi thum chauh a champion a, a hnuhnung ber pawh 2003/04 a ni daih tawh. Mahse, khami season-a a tih ang ti thei (Invincibles) erawh an la awm lo.
Trophy chawi lovin kum riat teh meuh awm mah se, a sum sen leh a Player enkawlte ngaihtuahin Club thuneituten Manager tha a ni tih an pawm nghet tlat a, a hun hnuhnung lam tih lohah chuan budget hniamtein Champions League a khelhpui thei ziah a, Emirates stadium puitlin nana a thawh hlawkzia pawh an hmuh hmaih lo. League no mawi chawi pui tawh lovin, Europe-ah sulhnu lian tham nei miah lo mah se, zah tlakin a hna a thawk zel a. Mualpho changte pawh nei mah se, a mualphona te chuan club tana a hnathawh ropuite a buk kang zo lo va, a nghing ngai lo.
Sakhaw mi ve tak, pathlawi, tumruh leh luhlul, mi chhel em em, Economics-a University degree nei French pachal hna thawh ropui, Arsenal-in ‘Next Season’ an tih reng chhan ni si thil pahnih an sawi thin chu, player man leh hlawh chungchangah hian a ni. Player hlawh sang uchuak pek a remti ngai lo va, Economics thiam a nih vang nge, he lamah hian a uikawm thiam hle. Hei vang hian a player tha a chan fo. Tin, man sang uchuaka playet lei a duh ngai meuh lo va, a player awh ngawih ngawih pawh a man a sang mah maha a hriat chuan, club lamin sum pek an inhuam chang a lei lo mai thin. Entirna pakhat chu, kum 2013-a Liverpool-in Suarez an hralh dawn khan, Pound maktaduai 40 aia tlawm chuan an phal loh thu an sawi a, Suarez lo beisei ve tu Wenger chuan an chhiar to deuh hlekin a hria a niang, a runluihna ang reng deuh niawm takin £40m leh £1 a lei a va dil kher a nih kha! Hei hi ‘Next Season’ tih tawngkam hring chhuaktu lian tak pahnih an ni ta reng a ni. Mahse, club lian tam takin an player duh an neihna leh an chelh theihna tur a nih chuan, an chhiar ang zata lei pawp leh player in a phut ang zat hlawh sang tak pek mai te an awlsam viau laiin, Wenger chuan awmze nei taka tih zel a duh tlat a, hei hian eng emaw chen chu player man to leh hlawh sang lutuk tur a lo veng ve nia hriain, club te zawk tan a hlutzia leh English Football tana a thawh hlawkzia an sawi fo thin.
Tehna hrang hrang hmanga teha Manager tha bik zinga hming lang, Arsene Wenger chuan kum 22 chhung Arsenal a enkawl hnuah, kum 2018 May 13 khan Arsenal a enkawl chhunga an Game hnuhnung ber khelin, Huddersfield Town chu si khat faiin an hneh a ni.
Sir Alex-a chuan, “Manager ropui, rilru nghet, tum ruh em em a ni a, mi Special a nihzia chu ka sawi ngai lovin in hre vek ang. Premier League-a inel ber leh inhal ber Club kan enkawl a, inchaltauh bap bap chang pawh kan ngah. Mahse, a hunah chuan puitling takin kan indawr a, tha takin thil kan sawi dun a, khelmual chheh vela kan nunte dah thain English Football chungchangte kan sawi dun thin.
“English Football-a thil chhinchhiah tlak leh pawimawh tak min siamsak a, English Football-a kan hmuh zen zen loh Game hmuhnawm tak min hlui thintu a ni a, Wenger-a vang hian English Football-in hma a sawn nasatzia chu vawiinah kan hmu a, kan la hmu dawn chauhin ka hria,” a ti a, a hun laia amah phak teuh bera Football khawvelin a ngaih, an hmelma ni thin Arsene Wenger a fak hle. Wenger pawn Sir Alex-a hi an hmelma Club Boss ni mah se, nasa takin a lo fak tawh a, kan tarlan thin kha – Mi puitling chu an hriat leh thin!
Mi tam takin Wenger-a chungchang an sawi a, kan tarlang vek seng lo. “Hlawhchham lama specialist a ni,” tia a chungchang lo sawi tawhtu Mourinho thusawi tarlang leh hram ila: “Arsenal leh hmun hrang hranga a Trophy chawi hi en ula, chumi hnuah Stadium ropui tak sual chhuah puiin a luah pui leh bawk a. Tun hnaiah League-ah champion lo mah se a hnathawh hi sawi nep theih a ni lo va, zah phu takin a chawl dawn a ni.”
Arsene Wenger hian sum a hmang tam ngai lova, Player naupang te te la khawmin a hnuaiah an inzir a, Player ropui tak takah an chhuak fo. Chuti chunga a sang pawl leh hlauhawm pawl an ni reng hi khawvelin mak a ti fo va, sum a ren avanga dem a hlawh changte awm bawk mah se, sum ren chunga a thlenpui chin khan sawiseltute rilru a thawi dam leh thin.
