Khelmual tha kan awt a, kan au. Banner leh media hmangin kan au chhuah pui a, sorkar hmalak nain phah a lo ni ta. Mizo thalaite lawm a hlawh a, kum naupang zawk atanga upa lam thlengin he hmasawnna hian thinlung a khawih a. Mi tam zawk chuan hmuhnawm leh ropui thlirin kan thlir a nih kha!

MFA leh pawl thenkhatte hmalakna leh thahnemngaihna avangin tournament buatsaih thin a ni a. Aizawl khawpuia inkhelhna hmun kan neih te zinga kan ngaihhlut ber pawl (kei phei chuan Mizo Wembley ka tih ngat) Lammual (Sipai ta a la ni zui) ah hian Football tournament hrang hrang neih thin a ni a. Naupang te e ti lo chuan man chawiin kan Mizo inkhelthiamte ball pet entur hian a sur a sa hnuaiah ka lo kal ve thin.

Khelmual tha kan neih loh avangin inhliam,intihpalh chu lo dah tha ta ila, inkhelh a harsa a, ruah tlak tam ni anih ngat phei chuan, inkhel te thiamna alang lova, a pal chak chak leh a tawn chak chak kan hmu fo. Hei hi engdang nilovin, Lammual chu lei(clay) a nih vang ani miau a ni. Kan inkhel mite’n harsatna tam tak an tawk a, ball khawih leh movement thlengin hmasawn a harsain zirtur tam tak an neih pawh an zir hlei thei lo ti ila kan sawi sual awm love.

Kum 2003 ah National U-16 kan thleng a, Mizoram chu champion kan ni. Mahse he hunah hian Champion no mawi kan dawm lawmna aiin “KHELMUAL THA, KHELMUAL THA” kan tihthawm chuan kan politician te beng a verh a. Mizo inkhel mite’n khelmual tha an mamawh tawh zia chu, a pet thinte aiin Kotlang A team te chuan an hre chiang a, kan politician te hriat turin an au chhuahpui ta ! Lammual lah chu Assam Rifles (AR) ho ta a ni bawk si, vawi tam tak kut ben thlawnna hmun chu Zoram mipui, thalai, inkhel ngainatute leh khelmual tha duhtute tan a tak ram a chang ta. Sorkar chak takin Lammual hmun avanga tui hal mizo thalai, inkhelmite leh inkhel ngainatute au thawm chu a takah chan tirin ARTIFICIAL GRASS nuam tak mai chu hman theihin a phah ta rup mai. Hmasawnna ropui tak ava’n ni teh lul em!cMizo fa, grass lem phah la hmu ngai lo mi tam tak chuan thlalak pui chakin chu Lammual hmun chu an pan khawm a. Grass chhunga an dah tel, rubber leh silica nawi te chu intithei takin mahni in lamah an paipawn haw a, nuam ti takin a kal hmasa te chuan thiante bul leh mahni chhungte bulah intithei takin an sawi Lammual an tlawh thu an sawi, tumah an dem awm love, a vawikhatna leh thil awm ngai lo a ni miau a ni.

Artificial Grass phah hi!
Ni e, hmantheih tak tak anih hma atangin he grass phah hi Football khelmuala phah anih angin Football khelhnan chauh hman tur alawm ti pawl an awm a, thenkhat chuan Lammual a nia, a ni bik love ti pawl an awm bawk. Engapawhnise a ropui hrim hrim a ni. Hmanah chuan Zodin Cinema Hall- a awm a, tunah chuan Zirna in leh Pathian thu pawlho na hmun a ni ta. Lammual-a grass phah pawh hi lammual chu a ni teh meuh mai, mahse tunah chuan Football khelhna atan he grass hi phah a ni a, kan hriatthiam tlan pawh a tul reng a ni. Hman chu hman a ni a, tun chu tun a ni. India ram state tam takin an neih phak lo, Mizoramin a nei hi lawm ila, a hman dan tur dik tak, Football khelhnan chauh hian hmang ta se, chu chu a tha ber mai lo ami tiin Zoram mipuite hi ka zawt e.

Tuna a landan chuan Multipurpose Complex a ni ringawt a. Kohhran thalai leh khawi veng emaw a pawl thenkhat leh a thei apiangin he Grass phah chunga hun hman kan tum hi bansan a hun ta. Enga tinge Mizo hnam hian kan thil hlu leh tha te hi dimdawihna nen kan enkawl thiam miah lo tih hi ka in zawt fo thin. Grass chung ngeia KUT hman duh pawl kan awm, Sorkar kan nek a, a hlawhtlin loh chuan tiin ka la au chhuak zui. Khawvel hmun zau zawk leh kan ram India ram ngei ah pawh hian kal ila, stadium chhungah hian mi nawlpui leh mi naran hian luhtlang an tum ngai lova, vengtu an awm loh pawh zah takin luh chak em emin an en liam mai thin.

Kut sawi takah chuan lei char KUT thin, vai vut leng kara kut thin mizote hian grass chung ngeia KUT hman kan chak maw? thil awm lo pawh a ni love, amaherawhchu tun hma zawng pawn vaivut karah kan kut a, kan hlim tho a ni lom ni? Lammual khi en teh u, a bel hul tawh khi, phul lem phah kaithawh lehnan khian sum tam tak a ngai a, tha leh zung sen angai bawk. He phul lem phahah hian kei chuan inhnialna tur engmawh a awmin ka hre lova. Lammual chu lammual a ni ngei mai, mahse, he thil hi rotling a ni. State sorkar pawhin a tih theih zen zen loh tur a ni. Kan dim dawih tlan chu a mamawh hlein ka hria. Nang leh keia phur thut vanga awm thei a ni lova, ruahmanna thui tak paltlang ngai thil a ni. Mi tam tak chuan Football khelte ta tur bik a ni lo, tiin tan hmun kan siam a, duh leh chhe vek ang hmiang ti pawl lah kan bo lo. Ngaihdan maksak tak tak pu lah hriattur tam tak a awm bawk. Hei hi ka sawi duh chu a ni. Ni e, tu ta bik mah chu a ni hauh lova, chutih lai chuan Khelmual tha duh lo ila chuan he Grass hi phah a tulna a awm lova, neih pawh a tul hek lo. Amaherawhchu inkhelmi, kan Mizo thalaite’n India ram hmun hrang hrang leh ram pawn thlenga eizawnga an lo awm theihna Football game vang a phah a ni ti ila ka sawi sual awm love.

Infiamana hmun dang pawh anih tur ang a kan hman a pawimawh tel bawk. Mizo mipuite hian phah anih chhan leh a lo awm chhan hi kan chian a tul hle a ni. Tin, hun remchang leh tul lem lo, kan veng leh hmun danga kan tihtheih chinte pawh Lammual hmun khera tih kan tumna rilru kan bansan a tul hle. Khawi hmunah mah hian ZORAM mipuite ang hian Grass chungah an sapatal luai luai hi ka hre lo. An rah hlek emaw, thuneitute thu lova an luh chuan man an ni thin zawk asin! Kan khelmual neih te zinga kan hlut ber pawl leh kan hman ngun ber pawl hi hlut thiam ila, humhalh kawngah pawh kan za hian tan in la thar teh ang u.

Heti ngawt zawngin kar lovah hman tlak lovin kan chhuah dawn a, a enkawlna kawngah hian tan lak kan ngai hle a ni. Kan ram rohlu a ni tih kan hriat thar nawn a tul takzet. ONGC Coach chuan ” Hetia inhman te chuan rei pawh in daih lovang, a reng reng thuah Mizote hi in van mak em em. Thil hlu a ni , roh ta che u” tiin ka hmaichhanah ngei min han hrilh mai chu(h), ka zak hle mai. Engapawhnise kan hmuh ngai loh leh thi tawn ngai loh a ni a, kan lo tihsual tawhna avangin tunah siamthat ngai dinhmunah a ding tep ta! Hawh u, kan tihsual te sim ila, Football khelmual a nih angin, kan inkhelmite’n inkhelnan chuah hmang se, thil dang leh tul lo atan hmang lo turin Zoram mipuite hian ngaihdan tlang tak leh rilruah neiin, Politician te pawn Campaign Playground-ah chantir lo ila, chu chu he phul lem man to tak dam khaw chhuahna tur a ni.