AS MONACO; EUROPE-AH I TE BER TAWP LO VE – Lawmkima Hmar

Estimated read time 8 min read

(He article hi ka ziahna a rei deuh tawh a, tlema thil hlui chan chang a awm tawh ngei ang. Sports Culture Magazine-ah tihchhuah a ni tawh nghe nghe)

French Ligue 1 champion lai AS Monaco chuan an player thate chan chum chum chum mahse an title humhim turin a zawnain vawi 2 hnehna an chang ta. Season liam ta a an player chherchhuahte an lar bakah, an club an chet ropui avangin he club leh a ram chanchin hian ngaihven a hlawh zual sauh a, ngaihven pawh a phu reng a ni.

Monaco chu : AS Monaco Football Club inbunna Monaco hi khawpui pakhat, mahnia ro inrel (City State) kan tih ang chi hi niin official chuan Principality of Monaco tih thin a ni. Europe khawthlang lam French Riviera a awm niin France nen hmun thum laiah innghengin a ramri lehlamah Mediterranean Sea a awm bawk. He khawpui hi a lian lem lova 2.02 km2 leka zau niin mihring erawh an bit hle a, kum 2015 census-ah khan mi 38,400 chengin Kilometer khat bialah mi 19,009 zel cheng ang an ni. Khawvela ram te ber dawttu niin mihring bit berna a ni thung.

Tuipui atanga feet 528 leka sang, lian lem si lovin khawvel huapa hriat a hlawh tlat hi thil mak tak chu a ni ve hrim hrim. Engdang vang a ni lo, a hmasa berah chuan mihausate chauh chenna khawpui a nih vang a ni! A ram mihring za zela 30 zet hi millionaire an ni a, mihausate khawpui an tih mai thin Zürich leh Geneva meuh pawhin an phak lo. Millionaire chauh khawsakna hmun tia an sawi thin hi a awm viau. Hei bakah hian milarte thut hmun a nih avangin a lar lo thei lo bawk.

Kum zabi 19-na hmalam kha chuan hnuchhawn ram niin ngaihsak pawh a hlawh lem lova, mite hipna a nei hek lo. Chutia ram zalen mahnia ro inrel ve ngat hnufum em em si chu a than dan tur kawng an dap ta. Industry din dawn se a ram a zim bakah thar chhuah an nei lo; tihngaihna a awm lo, Agriculture lamah tan la dawn se mipui chenna tur a awm mang dawn bawk si lo. Mahse, tihdan a awm tur a ni, kum zabi 19 tawp lamah an ngaihtuah chhuak ta.

A hmasa berin pawisa khelhna (casino) Monte Carlo chu an din ta phawt, hmun dang nena inkalpawhna tha an mamawh tih hriain Monaco leh Paris chu relin an thlunzawm ta ruah. Chu veleh Monaco sik leh sa nuam, ram mawi em em leh pawisa khelhna chuan mi a hip tat a, khualzin an thkeng seng lo a ni ta ber. Hotel leh engkim a lun a, mi hausa an lawi lut tam tial tial. Chu chu remchangah hmangin Bank lian pui pui an hawng ta a, major banking center tih a ni thuai a, boruak tih bawlhhlawh loh thupuia nei zuiin chhiah a la tlem hle a, income tax a awm lova, business tax pawh a hming chauha lak a ni.

Chhiah chawi a tlem a, tourism, banking leh casino atanga lakluh atam tho si avangin hmasawnna chu a zuanin a zuang a, kum reilote chhungin mirethei awm lohna khawpui a lo chang ta a ni. He hmun zimte hian khawvel hriat hlawh Tennis Tournament Monte Carlo Open bakah inelna hautak, sum ngaih tam berna an tih hial thin motor intlansiak Formula One motor race chu Monaco Grand Prix tia a hming vuahin chu a dawl ta reng mai.

Mediterranean tuipui chungah: French League-a a vawi 8-na atana champion ta AS Monaco hi a hming tluan chu Association Sportive de Monaco Football Club niin ASS Monaco emaw Monaco tih ringawt pawha sawi thin a ni. Kum 1924 khan din niin an ram te reuhteah league mumal a awm theih loh avangin French football league chungnung ber French Ligue 1 an zawm.

Stadium len hi club hlawhtlinna bulpui chu nise AS Monaco hi an hlawhchham chiang ngawt ang. An stadium kum 1939 atanga n hman tan Stade Louis II, Fontvieille ah hian entu mipui 18,500 chauh an leng. An stadium hmasa hi a tet avangin kum 1985 khan Mediterranean tuipui hmun zau tak chu leia chhungkhatin stadium an sa tha a, tuipuiin a hual vel an stadium hming hi an lal fapa Louis II hming chawia an phuah ngat a ni leh zel.

Savun hampuar : AS Monaco hian French football league-ah sulhnu an nei tha a, league title 8, Coupe de France trophy 5 la tawhin kum 1992 khan UEFA Cup Winners’ Cup final thlengin kum 2004 khan UEFA Champions League final an thleng bawk. Kuminah Champions League semi-final thleng lehin hei ringawt pawh hi an chawrchhuahna hmun ngaihtuah chuan rinphak bak a ni.

Sum aiin tihdan dik : Manager ropui tak Arsene Wenger-a lo enkawl tahw thin player lar tak tak Thierry Henry, Fabian Barthez leh Willy Sagnol, Patrice Evra leh midang lo chherchhuak tawhtu hi an tlachhia a, kum 2000 a Ligue 1 champion hi kum 2010 khan French second division-ah an tla.

Tichuan, December 2011 khan he club a thuneihna 66.67% zet chu Russian billionaire Dmitry Rybolovlev chuan a lei a, hetih lai hian Ligue 2 mawngphah an ni, tih tur a tam. 2011–12 season bul an tan chhiat avangin an manager Banide chu an ban a, Italian manager Marco Simone chuan thlakin season tawpah 8-na a nihpui. Club board in division sang bera awm an duh avangin Simone banin nikum Premier League a Leicester champion puitu Claudio Ranieri an la lut. 2012-13 season khan goal 64 thuna vawi 4 chiah tlawmin Ligue champion niin Ligue 1 an rawn kai ta.

Club neitu mi hausa tawntaw Rybolovlev-a sum rinchhanin kum 2013 khan player an lakhawm vak a, hemi kum hian Europe club zinga player lei na’na sum seng tam ber niin £150 million chuang an hmang. An club record fee £50 million in club lian ten an inchuh luai luai Radamel Falcao chu Atlético Madrid atangin an la lut nawlh. James Rodriguez leh Joao Moutinho te an senglut ta cheu. Mahse, tangkain engkim a sithlu lo! Ropuina a lei thei lova, hlawhtlinna a pumbilh thei lo, French League-ah 2-na an ni hram.

Sum tam tak aiin rawlthar : An star player karkhata £250,000 chuang ve ve hlawhtu Falcao leh Rodriguez te kumkhat hlawh ringawt pawh hi NLUP atana sem tham fe a nih avangin hloh reng ringawt chuan rei tak an kal thei dawn lova, player tha leikhawm ringawt chu football hlutna a titlahniam tih hriain an harhchhuak. Kumkhat an kawl hnuah Falcao chu Man. United-ah loan-a chhuatirin loan fee tam tak an hui bakah a hlawh ai an hum, Rodriguez pawh Real Madrid lamah hralchhuakin thla 12 hnuah an chhuanvawr Anthony Martial, Yannick Carrasco leh Geoffrey Kondogbia te manto takin an hralh zui bawk.

An player tha apiang an hralh zel avangin fans an lungawi ta lo, club vice president Vadim Vasilyev chuan tihian a sawi fiah ta: “Kawng hnih chiah zawh tur kan nei; kawng pakhat chu an man san theih lai bera player hralh a hlep neih, kawng hnihna chu project fing tak siam a, player naupang zawk, man tlawm zawk tha tak tak zawnga lakhawm a academy tha tak din. Heng kawng pahnihte hi kan zawh mek a ni,” tiin.

He an project hi a fuh cher cher hle; Champions League quarter-final a Borussia Dortmund an hneh tuma an starting XI te zinga 6 kha kum 22 hnuialam niin Mbappe leh Toure te kha an academy chhuak an ni bawk. Lemar, Mendy, Toure leh Bakayoko te lakluh nana an senso belhkawhm chu £26m lek a ni bawk. Man. United a Martial an hralhna £39 million pawh player thar lei na’n hian an hmang zo lo.

An tum tihlawhtling tur hian Raniery banin Portuguese coach Leonardo Jardim an la lut a, an tisual lo nasa. A hnuaiah hian Premier League match 36 a Man. United leh Chelsea tana goal 5 chiah thuntu Falcao chu tuai thara awmin league goal 24 thun tawhin Ligue 1 top scorer a ni dawn tih a chiang tawh a, Real Madrid leh Chelsea-a trial hlawhchham tawh Mbappe chuan par chhuangin league goal ringawt pawh 15 a thun tawh. Kumin February hnu lama an pahniha goal thun belhkhawm hi goal 25 a tling leh der tawh bawk!

Tin, an khelh dan phung hrim hrim a hmuhnawm a, game rang tak, goal venhim aia goal thun tam ngaih pawimawhna inkhel hian mit a la. Kumin Champions League semi-finalist 4 zingah khan outfield player (goalkeeper ni lo) te kum chawhrualah AS Monaco hi an hniam ber a, an kum chawhrual hi 23.9 niin an hneh tak loh Juventus player kum chawhrualin 28.7, Real Madrid 27.9 leh Atletico Madrid 27.1 te lakah a hniam fal hle.

An player hi an naupang tlang hle nain mualchhungah erawh an inkiltawih lo ve hle. Kylian Mbappe hian 2016 December khan kum 18 a tling ve chiah a, feet 5 leh inche 8 leka sang hi the next Thierry Henry tih a ni. Champions League semi-final a Dortmund an hmachhawn tum hnihah goal 3 ngawt a thun.

Attacking midfielder Thomas Lemar hi kum 21 leka upa niin France senior team tan a inlan pha tawh, kum 2015 a Caen atanga £2.9 million leka an lakluh a nih hi! Full-back pahnih Almamy Toure (20) leh Benjamin Mendy (22) te hi Formula ang maia tlan chak leh thahrui nei an ni a, kum22 mi playmaker Bernardo Silva hi Portugal tan a inlan awl lova, kum 22 mi tho Tiemoue Bakayoko hi Europe a holding midfielder tha zingah an sawi hmaih ngai ta lo. Brazilian Fabinho (23) hian defensive midfielder ni chungin tun season-ah goal 10 a khung tawh bawk, a theuneu lo hle.

C Tlanthianghlima

Football tui ve tak

You May Also Like

More From Author

1 Comment

Add yours
  1. 1
    Cheap NFL Jerseys Online

    Cheap NFL Jerseys Online

    Having a weak control system would certainly not bring the positive results that are sought. Yes, that is disappointing. The current trend in the market as of today should be known. It also spearheads research and development of renewable fuels for pow…

+ Leave a Comment