Asian Games 1962: Football-ah India an champion!
Ziaktu : John Zothansanga
August 28, 1962-a Indian Express infiamna huang, phek riatnaah chuan Milkha Singh-a’n India tan gold medal a hlawhchhuah thu lian takin a inziak kuau a, a hnuai lawkah chuan lian lo takin, “India football team chak lo mah se beisei tlem a la awm e…” tih chu a inziak bawk.
Asian Games 1951-ah khan India chuan football-ah coach ropui Syed Abdul Rahim kaihhruainain gold medal an hlawh chhuak a, Asian football-ah ro an rel chhunzawm dawn emaw an tih laiin an beisei thil an hmu lawk lo.
Asian Games 1954-ah an medal an humhim lo a ni mai lo a, group stage atangin an tla a, India tan mualphona tawpkhawk a ni. 1956 Olympic-ah Blue Tigers an insiamtha lehnghal a, semifinal an thleng!
Mahse, Asian Games 1958-ah Rahim-a’n India a kaihruai thei lo a, palina an ni hram. ‘Brazil of Asia’ tih meuha hminglem an pek India a insiamtha dawn lo em ni? Zawhna tam tak a awm a, a chhanna pe turin kum li dang nghah a ngai.
Mualphona
India-in football-a a hmingchhe tur chu thaibo tumin Asian Games an hmachhawn leh a, inelna an hmachhawn hma hauha harsatna leh buaina an tawh chanchin pawh hi ngaihnawm a tling – a dam hauh ila, nidangah thailan leh kan la tum dawn nia.
Senayan Main Stadium, Jakarta-ah mipui 95,000 an pungkhawm a, India leh South Korea inkhel en tura kalkhawm an ni. Indian player-ten an thiamna an pholang thei lo a, Chung Soon-Choon leh Cha Tae-Sung ten goal an khung a, India-in a chhanletna tur an nei lo.
Indian Express chanchinbu chuan he inkhelah hian Chuni Goswami-a’n chance duhawm tak vawi hnih a hlah thu a tarlang a, mipui 90,000 chuang au elna karah India-in khelmual an chhuahsan!
Blue Tigers hian group B-ah Japan leh Thailand an la hmachhawn leh dawn a, Asia khawmualpuia team tha ve ve an ni – team pahnih an hneh erawh chuan semifinal luh theihna kawng a la awm.
Final kalkawng chu
South Korea hneh lo India-in Thailand lakah that chhuah an tum lo. Mi tam takin Indian player ropui ber anga an ngaih PK Banerjee chuan goal hnih khungin Chuni leh Tulsidas Balaram ten goal khat ve ve an khung a, 4-1 zetin Thailand an sawp.
Mahse, hmabak hautak a la awm – Japan an tum dawn! Samurai Blue hi India-in an hneh chuan semifinal an lut dawn a, thih thaa an beih a ngai. Mahse, inkhelh hma zanin India chhuanvawr PK Banerjee chu a damlo a, hetihlaia Railways striker hian inkhelh a duh avangin a damloh thu hi coach Rahim a hrilh duh lo!
India leh Japan an inkhel a, an chak loh chuan India tan semifinal luh beiseina a bo dawn – India-in first half-ah goal an khung thei lo a, kil khatah striker chhuanvawr PK chu kil khatah a lo luak bawk. India an buai takzet a, Rahim erawh a chi ai ve duh lo.
Indian coach awm tawh zinga ropui ber hian a damloh thu a sawi loh avangin PK chu na takin a hau a, “I theihna zawng zawngin va khelh chhunzawm rawh,” a ti!
PK-a’n a pu lawmna siamin goal a khung zui a, Balaram-a’n goal khat dang khung ve lehin 2-0 in Japan an hneh.
Hello semifinal
India-in Japan an hneh avangin point li an nei a, semifinal an lut – hetihlai hian vawi khat chakah point hnih zel an hmu. Semifinal-ah India-in a hunlaia Asian football-a langsar South Vietnam an hmachhawn zui.
India hian minute 41 chhungin Chuni leh Jarnail Singh hmangin goal an khung a, Vietnam an beidawng bik lo. Phan Duong Cam (penalty) leh Do Thol Vinh hmangin si phurh an sut a, Asian Games 1958-a palina ang tho khan inelna an khar dawn niin a lang hman.
Mahse, Spurs sawmna hnartu Chuni a inlar leh a, minute 75-naah chakna goal a khung. India-in final an lut a, gold medal an chuhpui tur erawh group stage-a an ngam loh hnu South Korea an ni.
South Korea hian semifinal lehlamah Malaya chu 2-1 in an hneh a, final an lut. South Korea hi Asian Cup 1960 champion lai an ni a, group stage-ah an hneh loh tawh bawk avangin India tan chuan a huphurhawm takzet.
Thil pakhat chauh!
Final khelh hma zanin helhhawlh luatah India player-te an muhil hleithei lo – mut that an mamawh tehlul nen! Coach Rahim hoin an leng chhuak a, Hyderabad lam chhuak Coach hian, “Naktukah thil pek pakhat min pe ula ka duh a, chu chu gold medal a ni,” tiin a player-te hi a chah.
Rahim-a’n India football team a hrual dan leh a siam len dan a player-ten an hrechiang a, an coach tan hian tha taka hna hlen an duh. Khawvelin 2-3-2-3 emaw 3-3-4 formation hmanga team a rem thin lai khan Rahim hian India a enkawl tantirh atangin 4-2-4 formation a hmang a, kum 1958 World Cup-ah khan Brazil chuan he formation hi an rawn larpui ve leh – Rahim-a’n a hmang hmasa zawk.
He formation hi tunlai team khelh dan nena khaikhin dawn chuan Liverpool khelh dan ang deuh a ni – centre forward a tawlh hnung hret a, full back pahnihten an team chu goal nawr kawngah an pui bawk.
Rahim hian a team chu awlsam taka ball an inpek zung zung theih nan futsal a khelhpui thin a, an ke hman thiam loh zawk chauh hman phal chungin a practice tir thin bawk – Rahim a tactic zawng zawng pawh hi ziah fe tham a ni!
Hmelma duhsakna
September 4, 1962 a ni a, Asia-in football champion thar a nei dawn – hetihlai hian Asian Games football hi Asian Cup aiin ngaihhlut a hlawh zawk a, Senayan Main Stadium, Jakarta-ah mipui 100,000 an pungkhawm!
Fans zawng zawng deuhthawin South Korea chu an tan emaw tih mai tur a ni – India hnam hla an ‘play’ laite chuan au elna a ri hluah hluah a, South Korea champion lai mipuiin hmuh an duh.
Mahse, hetiang boruak karah hian India-in rin loh lam atangin tantu an nei a, chu chu infiamna khawvel mai ni lo, politics khawvela an hmelma kumhlun Pakistan an ni – mipui nuai khat pungkhawm zingah Pakistan mipa hockey team chuan zam hauh loin India an lo au ve a!
Hetihlaia India defender Arun Ghosh chuan, “Khatihlai boruak ka ngaihtuah let apiang hian ka hmul thi a la ding sung sung thei. Mipui zawng zawng khan chak lo turin min duh a ni ber a, mahse, mak takin Pakistan hockey team khan min tan tlat. Awih lo mah ula, thudik a ni miau si,” a ti!
A hmawr bawkna
Mipui au elna karah India-in final an khel a, ball an chan apiangin an au el dur dur zel! Mahse, chu boruak chuan India a tiphur zual sauh emaw tih mai tur a ni a, ngawih mai mai an tum lo.
Minute 17-na lekah India-in goal an khung – Balaram chuan mual vei lam sir atangin ball a tlan luhpui a, penalty box-a awm Chuni Goswami hmu fuhin ball a thlawh phei a, Mohun Bagan forward hian ‘cool’ takin PK tan a siamsak – India tan goal-a chantir turin harsatna a awm lo a, stadium thawm chu reh tak a ni.
Minute thum a liam a, India an phur laklawh. Freekick an hmu a, a pet turin freekick pet thiam bik Franco Fortunato a lo pen chhuak a, a ball thlawh luh chu Jairnail Singh ke bulah tak a tla.
Jairnail Singh-a’n defender pahnih a bum hnuah a ke veilamin a pet a, a goal chiang hle – South Korea tan Cha Tae-sung chuan minute 85-naah si phurh sut then mah se goal dang a lut lo a, India an champion!
Fak tlak Rahim
Asian Games football-ah India-in gold an la leh ta a, fak tlak chu Rahim a ni. Final-a che tha tak Jarnail-a’n inelnaah a hun tam zawk chu tlarhnung lamah a khel a, semifinal leh final-ah tlarhmaah a khelhtir!
Rahim hian Jarnail hi college a kal laiin striker-ah a khel thin tih a hria – group stage-a an hneh loh hnu South Korea hneh dan tur a ngaihtuah a, an rin loh dan takin Jarnail chu tlarhmaah a khelhtir a, a rorum em avanga hriat hlawh player hian goal a khung.
Rahim-a hnuaia khel thin Arun Ghosh chuan, “Rahim khan a kut ang maiin a player-te a hrechiang a, an theihna sang bera khel tura fuih dan kha a hre em em a ni,” a ti.
He inkhela fak hlawh tak pakhat chu Peter Thangaraj a ni. Kum 1958-a Asia keeper tha bera thlan hian South Korea goal nawr let tam tak a dansak a, South Korea striker ropui Cho Yoon-ok a ‘shot’ a dansak phei chu India au eltu fans hoin kut bengin an lawmpui hial – group stage-a South Korea nen an inkhelah khan damlohna avangin a inlan lo a, goal ban kara a din meuh chuan South Korea hnehin India an champion.
