Audi Cup hi ni hnih chhunga khelh thin, team pali te’n cup an inchuhna a ni a. Allianz Arena, Munich, Germany a Bayern Munich khelmuala khelh thin a ni. 2009 khan khelh tan a ni a, car siamtu lar Audi chawisanna anih mai bakah kum za chuang an tlin lawmna a ni. A thlengtu Bayern Munich te bakah hian team hlun tak tak pathum an sawm tel thin.

2011 Audi Cup ah hian Bayern Munich (Germany), FC Barcelona (Spain), AC Milan (Italy) leh Internacional (Brazil) te an tel a ni.

Nizan inkhel hmasa zawkah FC Barcelona leh Internacional te hun pangaiah goal hnih ve ve an thun hnuin penalty shoot-out neih a ni a. FC Barcelona hi 4-2 in penalty ah an chak ta zawk. FC Barcelona tan rawlthar tha pahnih Thiago Alcantara leh Jonathan Dos Santos te’n goal an thun a, Internacional tan Nei leh Spurs te lei tuma an hel nasat em em Leandro Dimaiao te’n an thun ve bawk.

Inkhel hnuhnung zawkah a thlengtu Bayern Munich leh AC Milan te an inkhel a. AC Milan in bul an tan tha a, minute 4 na ah Zlatan Ibrahimovic chuan goal hmahruai a thun a. Minute 34 na ah Bayern tan Germany midfielder/winger Toni Kroos chuan a thun ve leh a. Hun pangaiah goal a awm zui ta lo. Penalty in chak zawk zawn a ngaih hnuah Bayern Munich hi 5-3 in an chak zawk ta a ni.

Audi Cup hi zanin lamah chhunzawm a ni ang.