India football arsi eng ber tih ngam, Indian footballer zinga hriat hlawh ber Baichung Bhutia chuan International football a chawlhsan ta. ‘The face of Indian football’ hian a thutlukna hi Nilaini-a AIFF headquarter a press conference ah a puang a ni.

Sikkimese Sniper

A pet goal theih leh a shooting that em vanga Indian sports journalist ten ‘Sikkimese Sniper’ an tih chuan a chawlh thu puangin, “Kum 16 chhung international football ka khelh chhung kha ka tan chuan a ropui takmeuh a. Ka ram aiawha ka inkhelh te leh Indian football-a tha ka thawh ve zawng zawng te kha nuam ka ti em em a ni.” tiin a career chu ‘fantastic’ a ti.

Kum 34 mi Baichung hi kum khat chhung vel chu inhliam vangin a inkhel mumal tawh lo a, India team, England rama Pakistan khel turah thlan ni mahse inhliam vang bawkin a inhnukdawk. 2014 World Cup qualifiers khel turin thlan a ni lo a, Indian zinga inkhelh thiam ber (?) chuan India football team tan football a khel tawh dawn lo.

“Kan nunah hian kan duh ang vekin thil a thleng thei lo a, International team atang hian chawl mah ila India football tana ka inpekna hi a reh dawn chuang lo a, a remchan dan apiangin AIFF puih hi ka inhuam a ni”, a ti.

Baichung hian a club football erawh a khelh chhunzawm dawn a ni.

India football ‘star’ chu

December 15, 1976 ah Namchi, Sikkim ah a piang a, India tana a inkhelh hmasak ber chu kum 1995 a Thailand nen an intum tumin a ni. Hetihlai hian kum 19 chauh a ni nghe nghe. Kum 10 chuang tehmeuh India captain a ni a, ram tan goal 43 thun tawhin hei hi Indian football record a ni.

A captain na hnuaiah India chu  South Asian Football Federation Championship ah vawithum an champion a. Hei mai bakah kum 2007 leh 2009 ah Nehru Cup ah a champion pui bawk a, AFC Challenge Cup a an champion tum phei chu ‘football ka khelh chhunga ka tawn san ber lai a ni’ a ti nghe nghe. AFC Challenge Cup a an champion avang hian kum 1984 hnua a vawikhatna atan Asia Cup an khel thei nghe nghe a nih kha.

A hnathawh that leh a inkhelh thiam avangin India sawrkar chuan Arjuna Award leh Padma Shri te hmangin a lo chawimawi tawh a ni.

Hmanah chuan

1992 Subroto Cup, New Delhi ah kum 16 mi lek a nih laiin SAI Centre Gangtok tan a khel ve a. He tournament a a chet that zia hi tun thlengin hahip in an la sawi thin. Delhi newspaper ten ‘Wonder kid’, ‘Pele of India’, ‘Future’ tiin an ko a, a kum leh ah Kolkata club lian East Bengal chuan an club a khel turin an lalut nghal. Hemi hnu hian a hawilet tawh lo.

Kum 1995 ah JCT Mills ah a lut a, National Football League hmasa ber ah a champion a, league top scorer a ni bawk. 1997 ah East Bengal ah bawk let lehin a kum lehah phei chuan kum 21 lek nichungin club captain a ni pha ngat a ni.

Indian zinga Europe-a khel hmasa ber a ni a, kum 1999-2002 chhung Bury FC ah a khel. Mohun Bagan leh East Bengal ah te khel kual lehin tunah hian United Sikkim ah a khel mek a ni.

Mangtha

Football lar lohna India ramah pawh Baichung hi chu khawiah pawh kal se mi hriat a hlawh a, football avanga lar a nih ang bawkin amah vang hian India ramah football a lar lehzual kan ti thei awm e. Field chhunga a hlawhtlinna piah lamah India football tan thahnem a ngai em em a, a bik takin infrastructure lama India hniam lutuk chu a vei thu a tlangaupui nasa thei hle.

Vawithum lai Indian player of the year nihna chelh tawhtu I.M Vijayan chuan Bhutia hi “Indian football hnena Pathian thilpek” tiin a lo sawi tawh a. India rama footballer lar ber, a ram tana thahnemngai em em tu, Indian football meichher chawisangtu chuan international football a chawlsan ta a, a kalsan tak hmunruak hi hnawhkhah a va har dawn em.