Bale leh a chhehvel

Real Madrid a hnawng mek Gareth Bale chu Chinese Super League club Jiangsu Suning nen sawi zawm a ni mek a, a chhuah ngei pawh a rinawm hle.

Madrid – ah a hlawhtling em ?

Bale – a’n Madrid a zawm khan a hunlaia khawvela footballer man to ber a ni a, pound maktaduai 85.1 man zet niin a vanglai tak a ni bawk. Madrid a zawm hnu lawk hian hliamin tlak buak zui mahse a inlan hmasak berah goal a thun nghal.

Kum 2014 khan “nomawi chawi tur” a Madrid zawm a nih thu a sawi a, hemi kawngah chuan Bale hi a hlawhtling hle. Vawiin thlengin Madrid tan nomawi 13 zet chawi tawhin heng zingah hian Champions League nomawi pali (4) leh La Liga a tel.

Nomawi chawi kawnga a hlawhtlinzia teh nan chuan Champions League hi han hmang ila – Real legend rual Raul (3), Zinedine Zidane (1) leh Luis Figo (1) te aiin UCL nomawi a chawi hnem zawk.

Game 231 khelin goal 102 a thun bakah assist 65 zet a nei thei a, Luiz Ronaldo aiin goal hnih chauhin a thun tlem bakah Madrid striker lar thin Fernando Morientes ai pawhin goal a thun hnem zawk !

Tuna manager nilai Zidane hi Real legend anga ngaih a ni a, statistics ringawt kan en erawh chuan Zidane hian game 227 khelah goal 49 chauh a thun a, assist an neih zat erawh Bale nen a inzat thung.

Sawi hmaih hauh loh tur chu Champions League final – a goal thum a thun thei hi a ni. Real player zingah ani aia UCL final – a goal thun tam chu Alfredo di Stefano, Ferenc Puskas (goal 7 ve ve) leh Cristiano Ronaldo (5) te chiah an awm.

2014 Champions League final extra time – a Atletico Madrid laka goal pawimawh a khung te, 2018 UCL final – a bench atanga a luh hnu lawka Liverpool laka goal ropui thun leh 2014 Copa del Rey final – a Barcelona laka halfway line bul atanga a khalh tlang te kha theihnghilh chi a ni lo.

A khaikhawm nan, Bale hi a record atanga thlir chuan Madrid – ah hian a hlawhtling hle a, amaherawhchu chhan hrang hrang vangin Madrid player ropui huangah erawh tlar hma lam a chan phak a rinawm loh.

Bale – a vanduaina

Inhliam ching Bale hian hliam vangin Madrid tan game 100 chuang a inlan thei lo a, hei hi a vanduaina pakhat a ni. Rafael Benitez khan a duhsak em em a, Spanish manager nen hian an inkar pawh a tha hle niin an sawi.

Benitez a ban a nih hnu, Zidane a hnuaia an match hmasa berah Bale hian hattrick siam mahse kum 2017 April ni 23 kha engkim danglamna a ni ta.

La Liga nomawi chawi tur in um vanglai a ni a, an hmelma lian Barcelona an hmachhawn tumin manager Zidane – a’n inhliam damkawr Bale a chhawr a, Welsh winger hian a malpui a tihnat zui avangin half-time hmain thlak a ngai – Barca an chak zui.

Fans lamin nasa takin Zidane an sawisel zui a, 4-3-3 hmang thin French pachalin a tactic hman ti danglamin 4-4-2 ah a inlet a, midfielder duhawm Isco a lo lang zui.

Hei bakah hian Cristiano Ronaldo hralh a nih hnuah Bale hian beisei a pha lo a, season liam ta khan La Liga – ah vawi 29 inlanin goal 8 chiah a thun bakah assist pawh vawi 3 chiah a nei.

Bale – a tawpna tur ?

Wales captain hi kum 30 chauh a upa a ni a, tluang taka a khelh chuan Europe – a top flight inelnaah pawh tha takin kum 2/3 vel chu la khel thei tur a ngaih a ni.

Madrid – ah hian kar khatah pound 600,000 a hlawh mek niin an sawi a, Chinese club hian kar khata pound maktaduai 1 hlawh turin an sawm niin tarlan a ni.

Footballer tha tam tak angin Bale hian China a pan a nih chuan Chinese football chuan namen loin lar phah ngei ang a, a football zinkawng chhut erawh chuan zuih lam a pan tih erawh hai rual a ni lo.