Zan dang ang lo takin Palermo chu khua a lum a, hetihlai hian Thomas Barwuah leh Rose-i te nupa chuan an fapa Mario chu hmanhmawh takin Di Cristina Hospital lam an panpui mek. Rose-i chuan Mario chu a pawm a, a fapa chu a na tawrh avangin a lo ṭap ve reng bawk. A kiangah Thomas chu hmanhmawh tawkin a lo tlan ve a, ani erawhin Mario unaunu Abigail a paw ve thung.
He thil thlen hunlai hian Mario hi ni sawmthum pakhat(31) lek a upa ala ni a, amahah hian engemaw chiang lo a awm ni ngeiin a lang. “Hmanhmawh teh u. Ana a ti lutuk” tiin Rose-i chu lirthei tlan ri bengchheng tak karah chuan mangang takin a rak chul mai.
Mario hi a pum lam a dik lo a. Bernice(L) ang mai a nileng a Mario a ṭap mai chu a nu ngaih a tha lo takzet. Hei chu ni tawh lul suh! Rose-i hlauthawng lutuk chu a fapa chhanchhuak turin Pathian hnenah bang lovin a ṭawngtai.
Hemi te chhungkua hi Italy ah an pem hma hian Konongo, Ghana ah an khawsa ṭhin a. An fa hmasaber hi Bernice-i niin a naupan laiin a boral. Ani pawh hi Mario ang tho hian a na tawrh avangin nilengin a ṭap reng mai a. Hmanhmawh taka clinic an panpui hnuin Docter in operating room lamah a lo endik a. Doctor hmel an hmuh leh meuh chuan an tlai hret thu leh chhan hman a nih loh thu hriattir an ni.
Barwuah chhungkua chu pediatric complex an thleng ta a, an mahni ngaihvenin nurse pawh a rawn lang thuai. “Angela ka nia, ka lo pui ang che u,” tiin Mario chal chu Nurse Angela-i chuan a fawp zui a. “A khawsik a sang hle mai. Minlo zui rawh u,” tiin.
Hmanhmawh zetin corridor thui ve tak mai ah chuan Mario chu pawmin a kalpui a. Rose-i chuan a pasal hnenah, “Abi nen hian hetah lo awm ula, ka ngaituahawm loh ang,” tiin Angela leh fapa chu a um zui ve nghal a.
Thomas-a chuan a nupui leh fapa te pil bo tur chu a thlir zui tlawk tlawk mai. A fanu Abigail-i kut chu chelhin a hlauhthawnzia thup tumin hlim hmel a pu lui hram hram a. Innghahna pindan lamah an kir leh.
Nurse Angela-i chuan Mario chu examination room ah a luhpui a, Doctor Manlio Locascio a lo awm. “Pum puar!” tiin an dinhmun chu a hrilh hnuah nausen tap lai chu dawhkan ah dah a. Doctor Locascio chuan hmanhmawh tak a Mario kawr chu hlimin, a pum vel te chu a lo endik. Mario nu Rose-i pawh mangang leh hlauthawng takin kil khatah a lo ding ngawi ve reng.
“Engtia rei nge a ṭah tawh?” tiin Dr. Locascio chuan a zawt a. “Zingkar atangin ala tap reng. Phone call in pediatrician ka rawn a, ani chuan a pum lam a nat vang a nih a rinthu a sawi,” tiin Rose-i chuan a chhang.
Doctor chuan Mario pum chu a han hmet kual vel a, a ril lamah thil fel lo a awm ni ngeiin a hria. Nurse Angela hnenah chuan, “A rang lamin x-rays ka mamawh aw,” tiin a hrilh zui.
Angela-i chuan hlauthawng taka lo awm mek Rose-i kut chu vuanin, “A ṭha ve leh mai ang. Innghahna pindan ah I pasal te nen min lo nghak ula. Chanchin kan rawn hrilh leh vat dawn che u nia,” tiin.
Innghahna pindan lamah chuan Rose-i chu han inbengdaih deuh a tum ngial a, mahse a hlauhthawnna chuan a zem hneh ngang mai.
Darkar chanve vel a liam hnu chuan Angela-i’n Rose leh Thomas te chu examination room ah chuan a hruai a. Dr. Locascio-a’n an fapa dinhmun chu x-ray report atanga a lan danin a ṭha lo lai te chu a lo kawh hmuh. “Helai hi a nih hi a pianhmang a dik lohna awm chu, a rawn pian tirh atanga dik lo a ni a. Megacolon tiin sawi a ni thin,” tiin a hrilh a. Ril lam piansualna a nih thu a hrilh zui bawk.
Rose-i chu thaw hlawp hlawp chungin Thomas-a tangah a bei nghal. Thomas-a chuan Doctor hnenah chuan an fanu an chan tawh thu te a hrilh zui a, “Bernice, kum nga(5) liamta khan Ghana ah hetiang ang tak mai hian a ni,” Rose-i chuan mangang takin Ghana a Doctor ten engtia hmalak tur nge an hriat loh thu a lo sawi ve bawk.
Dr. Locascio chuan “Ka hria alawm. Mahse surgery a mamawh dawn a nia,” tiin a hrilh a. Rose-i chuan a hmui a pet a, a hlauthawng takzet a ni tih a hmelah a lang.
“Operation vawi hnih lai chu a mamawh ang. A dam ṭhat hma chu he hmunah hian a awm ve rih a ngai dawn a, lehkha ṭhenkhat te pawh in sign ve ka mamawh ang.” tiin Dr. Locascio chuan a hrilh zui a. Rose-i kut chu vuanin, “Hetiang hi chu ka lo buaipui fo tawh alawm, Mrs. Barwuah. Mario hi a ngaituahawm loh a nia,”tiin a hnem.
Thomas chuan an dinhmun chu chiang zawk a hriat tumin, “Mario dinhmun hi hlauthawnawm a ni lo maw, Doctor?” tiin a zawt zui a. Dr. Locascio chu a ngawi vung vung a. A sawi tur chin a uluk hle tih a hriat. “A dinhmun hi vanduaithlak takin natna ṭihbaiawm tak zawng a ni e.” tiin.
Rose-i chuan thawk harsa a tih leh hmel khawp mai, Thomas-a’n lo hnem thuaiin, “Enge kan tih theih te a awm em, Doctor?” tiin a zawt a.
Dr. Locascio chuan an chhungkaw dinhmun te a thlir zui hnuin heti hian a chhang, “Ṭawngtai.”
