BALOTELLI: THE UNTOLD STORY (Chapter: IX) – Rempuia

Estimated read time 6 min read

A birthday a lo thlen chuan Mario in a pahrawn Franco chu hma takah a kai tho a. “Enge awmzia, Mario?” tiin tho phang zetin Franco chuan a lo ti.

Ani chuan, “Vawiin ka birthday!” tiin phur zetin a sawi a. Silvia pawh a rawn harh ve bawk a, nuih a insum nasa mai.

“Chutiang te min hrilh tura min kaihthawh kher a ngai hleinem,” tiin Franco chuan a chhang a, a ṭhu tung a. “Vawiin hi August ni 12,1995 a ni a, a awmzia chu kum 5 i ni ve ta tihna. Enge I duh le? Khumah hian thil kan ei dawn emni?” tiin sawi zui a.

Mario chuan, “Ni lo, Fieldah ka inkhel duh. Min tiam vek tawh kha,” tiin.

Franco chu khum atangin a tho chhuak a, “ Nia ka ti alawm, mahse vawiin chu ṭhawhṭanni te a ni bawk si a, hnathawhtur te ka ngah asin” a ti a.

Ani chuan, “Awww, mahse min tiam vek tawh kha,” tiin. A ngaihdan a ni loh ve hmel khawp mai.

Silvia-i’n a pasal hnenah chuan, “Enge thil pawimawh viau awm a? Thil thawn maw? Nge i thutiam tih hlawhtlin?” a lo ti ve thuai a.
Franco chuan, “Hlim taka hun hman i duh a maw? Awle, i ni pawimawh chu ka tan pawh a pawimawh ve tho alawm” tiin Mario chu a hrilh ta nge nge a. Mario chu lawm avanga au chungin pindan a chhuahsan zui a.

Saint Mompiano Church kawt a Football Field hlui ve tawh tak mai pan chuan an inzui dun ta hnak hnak a, Mario chu khelmualah chuan lutin a ke chuan grass te chu a han rap chhin vel te te a. A pahrawn Franco chu khelmual sir a thutna bulah chuan a lo awm thung.

A hnuah Mompiano a Football program lo kalpui mek te bulah chuan a kal ve a, an hotu John Valenti chuan a lo nghak. He Football program-ah hian Mario kum ang rual vel pawh an lo awm ve nual mai.

Valenti bul a thlen chuan a hming a lo zawt a, ani chuan “Mario” tiin a chhang mai a, Valenti chuan, “Eng Mario?” tiin a lo zawt zui a. Mario chu a han inngaihtuah vang vang a, “Balotelli” tiin a hming chu a sawi ta.

“Balotelli? Mahse chu te chu Italian hming a lawm,” tiin Valenti chuan Mario bulah chuan a sawi leh a. Ani chuan, “Italian alawm ka nih,” tiin a pa Franco awmna lam chu a melh zui a.

Valenti chuan Franco a hmuh takah chuan thil chinchang chu hrethiam nghalin, “Eee, Franco naute zinga mi a nimaw i nih? tiin a zawt zui ta a.

Mario chuan, “Aw ni e, Sir. Ka birthday a nia, inkhel turin ka rawn kal a,” a ti a. “Anih chuan Happy Birthday. Kal rawh le, i thiam thil chu min han hmuh ta che,”tiin Valenti chuan naupang dang te awmna chu a kawh hmuh zui a.

“Striker ka nih hi! Tlar hmaah ka tlan dawn a nia,” tiin Mario chu phur zetin a au zui a. Valenti nuih pawh a ti za ve ngang mai. “Awle nau, i sawi ang chuan le” tiin.

An han inkhel ta, Valenti chuan an naupang thar che vel chu hmuhnawm a ti ta ngang mai. Naupang dang te chuan Mario chu an khan lo nasa mai a, midang ball chanlai chu awlsam takin a chhuhsak a, a bum phar a, tlanah lah an pha lo hlawm hle.

Goal a han khung chuan Maradona anga ban pharin a celebrate ta vel thin a, Valenti pawh a lo khi ve leh suk zel.

A thil hmuh chuan Valenti chu a ṭhawngin a awm hle hle thei lo. Stand lamah chuan Franco awmna lam panin a kal ta daih a, A bulah chuan, “Kum 5 mi tih atan chuan a ṭha mah mah a ni, amah aia upa zawk te bulah ka dah chho duh a nia aw,” tiin a hrilh a.

“Engtikah” tiin Franco chuan a lo zawt let a. Franco hian Mario te inkhel lai chu thlir ve rengin, Mario hi a tha thawkhat tih chu hria a, mahse khelmual pangaiah a khel a hmuh vawi khatna chauh a ni ve tho.

Valenti chuan, “Engtikah i tih chu enge a awmzia? Tunah ka duh alawm le. Khawiah nge tunhma zawng te khan i lo thuhruk?” tiin Franco hnenah chuan Mario chungchang chu a sawi ta piap piap mai a. Franco pawh inchhuan hmel takin a hawi sang ve ta vah mai.

“Khawi aṭangin nge khatiang a khel thei tur khan a inzir tih ka hre duh, nangmah chu i ni dawn lo tih ka hria a. Chubakah nang hi chu i upa tawh mah mah,” tiin Valenti chuan a ti zui a. An pahnih chuan an nui dun nasa.

Franco chuan, “Kan in a pangpar khawina no keh tam tak te atangin thil awmzia chu ka hrilh thei ang che”,” tiin a sawi a. Valenti chuan Franco hnenah lawmthu sawi zuiin, “Helai hmun i rawn hruai thlen avangin kan lawm hle mai.” a ti a.

Khelmual lamah naupang chhungte leh staff te lam pan chuan kal zui a. Nutling patling rual lo ding ṭhup ta chu, “Enge ni ta?” tiin a zawt.

Pa pakhat chuan, “Kan duh lo,” a lo ti a. Valenti chuan, “Eng maw in duh loh?” ti zuiin.

Nu pakhatin, “Kha midum naupang kha he team a awm ve atan kan duh lo,” tiin a lo sawi ve bawk a.

An thil sawi atangin thil awmdan chu Valenti chuan a hrethiam thei mai a. Naupang 250 vel zingah Mario chauh chu African a ni a, midang zawng chu mi ngo vek an ni thung.

Valenti chuan, “Italian ve tho ania sin, midang ang thoin,” a ti ta a.
An zinga mi, pa pakhat chuan, “Kan thusawi i ngaihsak miah lo a ni, John. He teamah hian a tel ve kan rem ti lo,” a lo ti ve leh a.

John Valenti chuan awm dan thiam har a ti ve hle a. A hnuah chuan, “Mario hi U5 squad ah a awm ve lo ang”” tiin a rawn tawng chhuak a.
Naupang chhungte pawh chuan, “Aw ni e, chutiang tur chu a ni,” an lo ti sap sap a.

Valenti chuan, “Naktuk atangin a rawn zawm ve tawh ang, mahse a aia upa zawk te bula khel turin. Kum 5 mi zinga tel ve tur chuan a tha mah mah a ni,” tiin a sawi zui a. Lehlam a hawi a, thildang sawi chhunzawm lem lovin a kal ta daih a.

“Chuti ka fapa hi ka la chhuak dawn a nia,” tiin nu pakhat chuan a au zui hram a.

Valenti chu a ding a, rawn hawi letin, “Ka pi, he team aṭanga i fapa i la chhuak a nih chuan a rawn inkhel leh tawh ngai loving,” tiin a chhang let a. Lehlam hawiin hamrik a ham a, a hna thawk chhunzawm turin a kal ta a.

C Tlanthianghlima

Football tui ve tak

You May Also Like

More From Author