Italy hmar lam Concesio-ah chhungkaw khawsa ve thei tak mai, Franco leh Silvia Balotelli te chhungkua hi an awm a, Brescia atanga mel ruk vel a hla a awm an ni. An chenna hmun hi Brescia Calcio khelmual Mario Rigamonti Stadium aṭanga hnai te a ni thung.
Franco hi Italy a piang leh seilian a ni a, a hun hmasa lamah hun harsa leh khirh tak tawng ve fo mahse Silvia a tawn hnuah erawh a nupui hian vanneihna a keng tel niin a hre thin. Silvia ve thung hi chu Jewish chhungkaw enkawlna hnuai a seilian a ni a, Nazi concentration camp Auschwitz aṭanga dam chhuak zinga mi an ni.
Silvia tan hian naupang te chu a engkim a engkim an ni ber a. Franco Balotelli nen hian fapa pahnih leh fanu pakhat —Conrad, John leh Cristina te an nei a, mahse a thinlung chu naupang dang tan pawh ala hawng reng ṭhin a ni.
Kum tam tak chu Silvia-i te nupa hian chhungkaw khawsak harsa deuh fate chu an chhung ten an buaipui theih hma zawng an lo enkawl sak ṭhin a. A tan hian fa hrawn neih hi a hlimna ber a ni pakhat a, Pathianin a pekah a ngai hmiah zel.
Indopui pahnihna hunlaiin boruak muanawm loh tak kara seilian a ni bawk a, a malsawmna dawn te chu a hlutna a hre chiang viau.
Balotelli chhungkua hian hunrei tak chhung fahrawn atan naupang pathum an chen pui a. An mahni hringtu an chhungte hnenah an haw a lo hun chang hian Silvia hi a lungchhe ṭhin hle. A fate ang mai a lo enkawl ṭhin naupang te hi a ngainain a hmangaih ṭhin khawp mai.
A naupang enkawl thin ten an haw san fai vek takah chuan Silvia chuan naupang pakhat tal chu a tawpnan enkawl duhin a tawngkai nasa thin a. Poncarale khua a Social Worker te hnen atangin African naupang chungchang hi an hre ta.
Mipa naupang, hun khirh tak tawng mek. A rawn pian hlim atanga a pum lam ṭhat lohna avanga buaipui ngai em em mai chanchin chu. Chu nau chuan a bik taka enkawlna a mamawh hle a, mahse a chhungten eizawng tura an chhuahsan a ṭul ṭhin bawksi.
“He inah hian naupang nui ri ka hriat lohna a rei tawh hle mai. Kha nau kha, i hria tiraw?” tiin Silvia chuan Franco hnenah a sawi a. “Aw ka hria e Silvia, nangmah pawh hi ka hrechiang che alawm,” tiin Franco chuan zawi sapin a lo chhang.
Silvia chuan nui chungin, “Kha naute kha kan tlawh ngei chu a ngai a ni,” a ti a. “Appointment pawh ka siam vek tawh a nia, ka va insiam a nge,” tiin a sawi chhunzawm a, hmanhmawh hmel takin a kal nghal.
Franco nuih a ti za hle a,“Tunah maw?…”
Social Worker ten Mario tan chhungkaw thar an han zawn hmuh dawn meuh chuan Rose a mangang leh hnuhnawh hle mai a, ngaihdan dang te a han nei leh rih.
“Kan hnen a awm tawh lo tur chuan ka ngaituah ngam lo mange,” a ti a. Thomas chuan Rose kut chu chelhin, “I sawi dik alawm, kan remtih loh thu kan hrilh ang a, Pathian hnenah thil ṭha lo a thlen lohnan kan ṭawngṭai mai dawn a nia,” tiin
A thusawi chuan a thinlung a kuai danglam thei dawn tih a hria a, mahse thudik a ni bawk si. Mario hian dam lam a pan nachungin harsatna la tawk thut thei reng an ni a, chutih hunah chuan tih theih an nei tlem dawn hle tih pawh an inhre chiang viau.
Rose chuan an pa thusawi chu rilru a hre ran chungin, “Retheih reng mai hi ka ning,” tiin a rawn tawng chhuak. A hnuah “Pathianin Mario tan hian kawngka a hawn sak tihna ni ta se? Ka pa khan kawngka a inhawng a nih cuan kal tlang ang che u tiin a sawi thin a. He thil hi kan tan a hun ruat chu lo ni ta si se?” a ti a.
“Week days-ah chauh a nih tur thu min hrilh tak asin, Mario hi weekend-ah chuan a rawn haw thei dawn alawm,” tiin Thomas chuan a englam zawnga thlir chungin a lo sawi ve bawk a.
“Balotelli chhungkua hi mi zahawm tak leh hetiang lamah chuan tawn hriat nei ṭha tak an ni alawm,” tiin a sawi chhunzawm.
Rose-i mittui tla chu dan rual a ni lo. Nun nuam zawk beisei a Ghana an chhuahsan lai te ala hre chiang a. Engtikah tak nun nuam zawk chu tawng ve ang maw tiin a inngaituah nasa hle.
Poncarale a Barwuah te apartment kawtah chuan Balotelli te car chu a rawn ding ta a, Franco chuan naute lawm atan tiin car sen lem a rawn keng bawk.
An in lam pan a an rawn kal lai chu Rose leh Thomas chuan tukverh atangin an lo thlir reng a, Rose-i thin chu a phu dup dup a ni ber mai. Tichuan Thomas-a chuan an mikhual te tan an kawngka chu a hawng ta.
