Mario hringtu, Barwuah te chhungkua pawh Brescia-ah in nuam zawk luahin an insawn a. Zirtawpni ah Franco leh Silvia te nupa chuan Mario hi a chhungte bul a awm tura an thlah a, Pathianni zanah an lam leh ta ṭhin a ni. Kumkhat chhung vel chu hetiang reng reng hian Mario hi kartawpah a unaunu Abigail leh a unapa Enoch te bulah hun a hmang ta ṭhin a ni.
Brescia-ah a pianpui unaute bulah a haw vawi khatna ah chuan zanlaiah Mario hi ṭhangharhin a awmna chu khawi hmun nge tih a hre thei mai lo. A nuhrawn Silvia chu a zawng ruai ruai a, a awmna pindan chu danglam ta riauin a hria. Hetih hunlai hian Mario hi kum 5 a tling ve ṭep tawh a, mahse thlamuang taka zan mut la harsat ṭhin hle. A han kal kual vel hnuah a u Abigail mutna chu a hmu a, a bulah chuan inthawlh ve nghalin a muhil ve thei ta hram.
Balotelli chhungkaw chenna, Concesio lama an inah chuan ball a pet leh tak ṭuk ṭuk hnuin pawn a an huan lamah chuan a pet chhunzawm a, an nuhrawn thlai chinna hmun hnuai lamah chuan hna an thawk tih a hre thei. Kun hniamin a beng a lei tisi chungin hnathawk thawm chu a ngaithla ta vang vang mai.
Chumi hnu rei vak lo ah thil engemaw hriatchhuah a nei tlat. A kut tang chu chhiar nuap nuapin, “Pakhat-pahnih-pathum-pali-panga!” tiin. Thaw an la det a. “Panga ka ni ta!” tiin a rawn au.
Hemi ni tuk hi a birthday a ni a. A mit chu chhingin van lam a hawi a, a rawn men hnuah a vun rawng chu a thlek vang vang. A ban chu a piai ta chiam a, tlemin a rawn lang eng ve deuh ni a hriatna te a nei.
Chutia a awm lai mek chuan a nuhrawn Silvia rawn kalin, “Ka pangpar khawina no duh ber i lo ti keh leh ta,” a rawn ti a. Ani chuan, “Ka tihpalh, Anu,” a lo ti ve thuai.
Silvia chuan, “Naktukah Papa in pawn lamah a inkhelhpui dawn che a nia aw, naktuk i Birthday a nih avangin,” a ti a. “In chhungah hetiang a i inkhelh reng mai chuan in chhung bungrua ṭha pawh kan nei thei lo ang,” tiin a sawi chhunzawm a.
Silvia chuan Mario kut chu vuanin a awmna hnim hring hmun atangin a kai chhuak a, Mario chuan an kut chu a lo thlek leh vang vang a, a inan lohna te lo zawngin a ban chu Silvia kut lakah chuan a dum a ti ve hle.
A ban a piai deuh sek mai chu Silvia-i’n lo hmu fuhin, “Enge i tih a?” tiin a zawt ta. Ani chuan “Min ti lang eng ve deuh a, nangmah leh papa angin,” a lo ti a,
Silvia chuan, “I vun rawng hi chu thlak danglam theih a ni hleinem, i nihna ang ang hian i mawi lutuk a nia.” tiin a sawi a, ṭhingṭhi chungin Mario chu a kuah a, a banah kaiin an in lam pan chuan an kal dun ta a.
Mario piancham a lo thlen chuan Franco in Mario chu Saint Mompiano Church a Football khelmual hlui ve tawh takah chuan a hruai a. Tleirawl rual an lo inkhel ve mek bawk.
Inkhel a han hmuh chuan a phur tawh et et tawh hle a. Naupang dang te anga han inkhelh a, goal han khung vel chu a chak tawh takzet.
