BALOTELLI: THE UNTOLD STORY (Chapter X) – Rempuia

Balotelli te chhungkua hian an Birthday a lo thlen hian thil chin ṭhan an nei a, a birthday neituin zanriah atan a duh ber a thlang ṭhin a ni. Mario pawhin he idea hi ṭha a ti ve hle a. A nu (Silvia) Carbonara siam ngat a thlang ṭhin a ni.

Hemi te chhungkua hi Football tui tak mai an ni a, Mario u te pahnih – John leh Conrad te pawhin an khel ve nasa ṭhin a, an thlazar hnuaiah Mario pawh hian rawn khel chhovin a tih dan te pawh an zirtir ve nasa ṭhin khawp mai.

Mario hian he infiamna(Football) hi a misa bawk a, Mompiano khelmualah a talnat thu an hriatin a unaute pawhin mak an ti tehchiam lo. Amaherawhchu an inkhelh zawh a naupang dang chhungte thusawi thenkhat Mario chuan a lo hriat ve avangin hrehawm a ti ve hle.

An thil ei laiin John chuan, “Vawiin chu khawi position ah nge i khelh a?” tiin a zawt a. Mario chuan, “Striker” a lo ti tawi tup mai.
John chuan, “Ṭha lutuk” tiin, an unaunu Cristina pawhin, “I khelh danah an lawm viau ang a,” a lo ti ve bawk a.

Mario chuan a thil ei lai a chawl a. “Ka vun rawng an duh lo a,” a ti ta. A thil ei chu chhunzawm lehin engmah thil thleng lo anga awm a tum hram hram a, mahse a lungngai ve hle tih hai rual a ni lo. Silvia chuan a pasal chu melhin Mompiano-ah boruak tha lo deuh thleng a awm tih a hre thei.

Franco chuan a aw a han thian hmasa te te a. Ani hian Mompiano khelmual a chhungkaw thenkhat thusawi chu a hrechiang viau mai. An thawm a ring bawk a, khelmual sir atang pawhin hriat loh theih a ni lo. Mahse Mario in a chanchin an sawi zawng zawng a hriat ve loh hram a beisei thung.

“Amah aia upa zawk te bul a khel turin an ti a nihkha, kum 5 mi bul a khel atan chuan a ṭha mah mah a,” tiin a rawn sawi ta a.
John chuan, “Player ṭha tak a nih avangin an thik mai mai a nih chu. Vunrawng lam thleng a han ṭuan chu a nep thlak mange aw,” tiin a lo sawi ve bawk a.

Mario chuan a ban chu a thlek vang vang a, “Enge a dik lohna, Nu?” tiin a zawt.
Silvia chuan, “Engmah i vun rawngah hian dik lohna a awm hleinem,” tiin a lo chhang a. Cristina pawhin, “A mawi viauin ka hria asin,” a lo ti ve thuai a.

Hnuailam bih ngar ngar chungin Mario chuan chaw chu a ei chhunzawm a, a biang a mittui rawn luang chu a dang zo ngang lo. A hnuah a thil ei chu duhtawkin a rem fel te te a. “Ka haw mange,” tiin a tho deuh thut a, an in atangin a tlan chhuak zui nghal.

Silvia-i’n Mario chu a koh din tum viau mahse auh din rual a ni lo. A pasal Franco chuan um tumin a tho a, Silvia hian lo dangin, “Lo ei zo phawt rawh, keimah zawk ka kal a nge,” a ti a. Silvia hian a awmna tur awm a rin a nei nghal.

Hunrei lo te an inzawn hnuah an ṭhenawm hnai a thingkungah chuan a hmu ta nge nge a, thing zarah lungngai takin a lo bawk lehta vang mai.

Thingkung hnuai aṭangin Silvia chuan, “Mario, i awm tih ka hria e. Dawhkan kalsan turin ka remtihna i la miah lo a nia,” tiin a sawi a. An chhungkaw kalphungah dawhkan an kil chuan tu pawhin thil an ei zawh reng rengin dawhkan an thawhsan dawnah phalna an la hmasa phawt ṭhin a ni. Heihi Mario pawhin a hrechiang a, nunze mawi lantirnan an hmang ṭhin a ni.

A hnuah chuan Mario chu a nu Silvia-i hmuh theih turin a rawn dak a, “Min hrethiam thei hram a ngem?” tiin a rawn ngen zui.
Silvia pawhin nui sang chungin, “Awle, ka hrethiam a che, tunah chuan lo chhuk tawh rawh le,” a ti a. An pahnih chuan an in lam pan chuan an inzui dun ta a ni.

Tumkhat chu, zirtawp zing a lo nihin Silvia chu Mario roomah a lut a, Mario chu tukverhah lo dakin a lo la insiam miah lo mai. Zirtawpni hi a thisen zawmpui chhungte hnenah kartawp hun hmang tura a haw ṭhinni a nihkha. A bag chu khumah awmin a la ruak vek mai.

A nu thawm a hriat chuan a rawn hawi let thuai a. A mit chu a sen rum mai. Silvia chuan a hmuhin a lungngai tih a hria. Kartin mai zirtawpniah haw a ngai ziah mai chu an naute hian a hrethiam lo a ni mahna.

“Kan tlai dawn a nia, i lola insiam miah lo a nimaw?” tiin Silvia chuan a zawt a.
Ani chuan, “Ka kal duh lo, he hmunah hian ka awm duh zawk,” tiin a lo chhang.
“Mahse i nu leh pa ten an ngai tawh che asin,” tiin Silvia chuan a sawi a.
Mario chuan, “Tunah chuan nangmah hi ka nu i ni tawh alawm,” tiin.

Silvia chuan insum harsa a ti ve hle, Mario chu a kuah a, “Bawiha, i tan hian hriatthiam a har dawn tih hi ka hria alawm,” tiin a bengbulah a sawi a. “Ni e, i cham rih thei ang. Engemaw hrilh tur kan ngaituah a nge aw,” a ti chhunzawm.

Brescia lamah ve thung chuan, Thomas Barwuah chuan a phone hman lai chu a dah a, a ngaituahna chu a vak vel ruai mai. Chanchin ngaichangin Rose-i’n a lo nghak ve mek bawk.

“A rawn haw dawn lo a nia,” tiin Thomas chuan a hrilh a. Rose-i’n a pasal hmel a hmuhin Mario in buaina a nei tlatin a hria. Kartin mai Barwuah chhungkua leh Balotelli chhungkua a kartawn sek ṭhin chu a hrethiam lo tih a hre chiang.

A fapa awmdan avangin Rose hnuk a ulh takzet. Mario tel lo a kartawp hun hman a ngai tur chu a khawharin a ruak ngawih ngawih a ni ber. Thomas-a’n a darah rawn kuahin an in lam panin an kal a, “Sawtah a hlim alawm,” tiin a nupui a hrilh a, an ṭah erawh a chhuak dun khawp mai.