Kum 6 a nih chuan Mario chu Oratorio Torricella elementary school a kai ve ta. Zirna in lian leh changtlung tak a ni a, Football khelmual an nei a, Sport Program ṭha takin an kalpui bawk.
An zirtirtunu Tiziana Gatti chuan Mathematics class a la a, blackboard-ah chuan a lo thai malh malh mai. Mario pawh ṭhuthlengah ngawi reng a lo ṭhu ve a, a ṭhutpuipa chuan a hnaih hreh hmel riauin a hre nghe nghe. Amaherawhchu engahmah a ngai lem lo a, a hnuah a ban chu a phar zui a.
Ms. Gatti chuan “Enge nita, Mario?”tiin a lo zawt thuai. Ani chuan inthlahrung deuhin, “Min hrethiam thei hram a ngem?” a ti a.
Ms. Gatti chuan khi deuh sang chungin, “Mahse class kan ṭan chauh sia, tih tur kan la ngah asin,” a ti a.
Zirlai naupang dang te chuan an lo nuih dar dar mai a. Mario erawhin mak a ti angreng viau, inah chuan hriatthiam a dilin tumahin an nuihzat ngai si lo.
Mario chuan, “Pawnah nuam ka ti zawk a, ball ka khalh thei a ngem?” a ti ta a.
Ms. Gatti erawhin, “Mario, heihi Kindergarten a ni tawh lo a, kan zavaiin lehkha kan zir a ngai a sin. Zir hunlai a awm a, lem ziah hun a awm a, chawlh hun a awm dawn bawk alawm. Chawlh hunah chuan ball nen pawn lamah i inkhel thei dawn alawm” a lo ti a.
Ani pawhin, “Awle, Miss” tiin a lo chhang ve ta mai a.
Mario hi a pahrawn Franco zirtirna avangin Mathematics a thiam phian a, an Miss Gatti pawhin a ngaina ve hle. Ms. Gatti zawhna vel pawh a tirah a zahzum deuh avangin chhang ṭha ngam ṭhin lo mahse a zawhna apiang mai chu a lo hre ve zung zung zel.
Ṭumkhat chu Ms. Gatti zawhna, “16+12=__” chu chhang turin a ban a lo phar ve a, an zinga zirlai naupang pakhat chu zawngte hram thawm angin a lo hram ri a, naupang dang pawh an lo nui lehta dar dar mai. Mario chuan enge awmzia a hrethiam lo thung.
Ms.Gatti chu tunge tih hriat tumin a hawi kual a, mahse a hre thei mai lo. Mario lamah a rilru chu pe zuiin, “Awle Mario,” a ti a. Ani chu rawn ding chhuakin boardah chuan ‘number 28’ a rawn ziak. Ms.Gatti pawhin, “A dik chiah, Mario, a ṭha lutuk!” tiin a lo fak ve hluam a.
Mario chu zam hmel takin a ṭhutna lam a pan a, a han ṭhut chuan a piah a ṭhu Sophie lam chu hawiin a khi deu sang a, Sophie erawhin a lo insiamchhiat khum tlat mai.
Next period chu art class a ni a. Zirlai naupang te chuan newsprint art paper leh color pen pathum ṭheuh an la a, Mario chuan a hminglem, Super Mario color ang a sen leh pawl a thlang a, a sendang ala tel bawk.
Lem ziah an han tan hnu chuan Football lem, a sen leh pawl a tialin a ziak a, a hnuah a ban chu pharin Ms. Gatti hnenah chuan, “Min hrethiam thei a ngem?” a ti leh ta.
An Ms. Gatti chuan, “Mario, kan ti laklawh rih si a, art class zawhah hian ka phalsak ang che,” a ti a.
Mario chuan, “Bathroom-ah kal ka ngai a,” a lo ti a. Ms. Gatti pawhin, “Va kal la, lolet leh ang che aw,” a lo ti ve ta mai a.
Bathroomah chuan Mario chuan tuilum chu a herh haw te te a, tuilumah chuan a ban a chiah a, mahse a beisei angin thil a thleng lo. A inti kang ta. A ban chu a pen rawng sengdang ken chuan a chei zui ta chiam mai.
Ms. Gatti chuan a thawm chu hriain bathroom ah chuan a lut vat a, “Mario! I au thawm ka hria a nia, i ṭha maw?” a ti a.
Mario chu ngawi rengin a lo dak a, Ms. Gatti chuan tuilum lo dir reng mai chu a hmu a, Mario thil tih chu a hre thei. Mario chuan a ban chu tuilumah chuan chiah leh a tum a, Ms. Gatii chuan a lo lak sawn sak a, “Enge ni i tih a?” tiin.
Mario chuan, “Ka vun rawng hi ka hua,” tiin a lo chhang.
Ms.Gatti chuan Mario banah kaiin class room lamah a hruai a, a ban a chei ranna chu a vun rawng a thim em avangin a lang tehchiam lo.
Chhun chawlh hunlai a ni a, Classroom pawh a ruak huai mai. Chutah Mario leh Ms. Gatti chu inhmatawnin an ṭhu a. Ms. Gatti-i’n Mario ban kang lai vel a tuam sak zawh hnu chuan Mario chuan, “Engatinge min huat em em hlawm a?” tiin an Miss chu a zawt a.
Ms.Gatti chuan, “An haw hleinem che, naupang te hi chu hetiang a an awm chang hi a awm ve a. An chhungte bulah ka lo hrilhfiah dawn a nia,” tiin a chhang a.
“Khawngaihin thil thleng hi chu hrilh lo la. Min hua a, ka vun rawng hi fiamthu thawhnan an hmang alawm,” tiin Mario chuan a sawi.
Ms.Gatti chuan, “Kan inang tlang vek a ni tih hi an hriat loh vang mai mai a ni e,” a ti a.
Mario chu a inngaituah vang vang a, “Zawhna ka nei a nia,” tiin a kut chu a thinphu hre thei turin a awm zawnah a dah a, a mittui luang a hru leh zeuh zel.
“I thinphu i khawih elaw?” tiin Ms Gatti chuan a zawt a. Mario chuan, “Ka thinlung hi a dum nge a var?” tiin zawhna a lo nei ve leh thung.
Ms. Gatti chuan a chhang thei lawk lo a, a zawhna dawn chuan a rilru a khawih ve hle. A hnuah chuan, “A sen a ni e. I thinglung, ka thinlung pawh…Kan zavaiin kan thinlung rawng hi a inang vek a, chhungrilah chuan inang khat vek kan ni asin,” a ti a.
Mario chuan awih vak hmel loh takin a lu chu a thing a, a mittui a lo luang ve reng bawk. “Ka ring lo che. Thudik nise min haw miah lo ang,” tiin a sawi a.
Ms.Gatti chuan, “I vun rawng midang aia a dum chhan hi chu African i nih vang a nia,” a ti a.
Mario chuan au deuh ṭhawt chungin, “Ka nilo, Italian alawm ka nih!” a lo ti.
Ms. Gatti chuan sawi fuh lo deuh intiin a ngaituahna a seng ṭha leh a, “Aw ni e, Italian pawh i ni tho alawm. African leh Italian i ni kawp alawm,” tiin a hrilh ta a.
Mario ve thung chuan, “Nih kawp ka duh lo,” tiin a biangah mittui a luang nasa hle. An Ms. Gatti chuan hnem tumin a kuahzui a.
Mario pawh a ziaawm ve ta deuh, a hnuah, “Kan thinlung hi a inang vek tiraw? tiin a zawt nawn leh ngat a. Ms. Gatti chuan, “Aw, tehreng mai,” tiin a rilru nat tawh loh beiseina nen a lo chhang a.
“Chuti ka thinlung chu a var tihna a nimaw?” tiin Mario chuan a zawt lehta hram a.
