BALOTELLI: THE UNTOLD STORY (Chapter XII) – Rempuia

Mompiano coach John Vanlenti-a’n Mario chungchang chu Silvia hnenah sawiin Football a hma hun eng tak nei a nih thu leh team changtlung zawk St.Bartholomew-ah khelhtir ngei a tum thu a hrilh a. St. Bartholomew complex hi Balotelli te thenawm hnai mai a awm a ni a, Youth Football program mumal takin an kalpui ṭhin a ni.

An President hi Riccardo Stefanelli niin Mompiano coach Valenti nen a ṭhian inkawmngeih tak an ni nghe nghe. St. Bartholomew Youth Football program hian an naupang te leh an coach te chu dinhmun sang zawk an thlen theihnan an lo buaipui ṭhin a ni.

Amaherawhchu Valenti leh Silvia ten an hlauhthawn tel chu Mario hian a lo awm tawhnaah te buaina neuh neuh a ngah ve thin em a, St.Bartholomew-ah pawh harsatna a neih an hlau ve hle.

Mario hian an school banah training a zawm ve mai ṭhin a. St.Bartholomew Football Academy enkawltuten Mario che vel an han hmuh chuan an lung a awi vat mai.

An training na hmun hi concrete a ni a, Football Field pangngai aiin a te deuh. Ṭum khat chu an han inkhel tur an coach chuan a lo nghak a, “Mario Barwuah i nimaw?” tiin a lo zawt. Mario chu a hnam hming avang chuan a hawi buai zet a, Barwuah aia Balotelli nih duh zawk tlat kha a ni miau a. Mahse engmah sawi thui lem lovin, “Aw ni e, Sir” a ti ve mai.

An coach chuan, “Striker emni i nih?” tiin a zawt leh a.
Mario chuan, “Aw ni e, Sir,” a ti a.
An coach erawhin, “Tunah chuan ni lo, Left defender-ah i khel ang,” a lo ti ta mai.
Mario chu bang bo takin a ding ngawi reng a, an coach chuan, “Enge ila nghah, kal ta che,” a ti a. An coach a zah em avangin Mario pawh a kal ve ta mai.

Inkhel an han ṭan a, tlarhnung lam a han khelh thut mai chu a harsat ve ngang mai. Ani naupang inringtawk leh nghal ve tak a ni bawk a, naupang dangin ball an chan chuan lo in dah free in a lo au ve nasa thin. A chevel chu a khelhpui te chuan an lo mil vak lo, naupang pakhatin ngawi tura tiin a rawn hau ta chiam. Mario hi defender ah khel mahse ball a chan hlek chuan a khalh lut miah miah a, goal a khung nual tho mai.

An inkhel zawhhnu a locker room an thlen chuan a khelh danah a inthiam lo chu naupang pakhat bulah chuan ngaihdam dilin a tih dik loh thu sawi a tum a. Mahse ani chuan a lo nam thlu nghal ṭhuai, “Team dang zawng rawh, Zawngte” ti a chhaih nawmnah a tawk zui a. Mario pawhin thinrim zet a rawn tho in a rawn bei let ve nghal a. An coach a rawn lut zui.

An coach chuan an intihthiam loh chhan vel te a zawt a, naupang pakhat chuan, “Infiammi ṭha tak a ni lo, kan teamah kan mamawh lo,” a lo ti a, Mario chuan, “Zawngte tiin min ko a nihkha,” tiin a lo sawi ve bawk. Mahse an coach chuan Mario chu chhan a hnekin atana hriat nuam lo tak takin a sawisel zui a. Naupang dang ten an lo nuih dar dar bawk.

Rilru na tak leh tap deuh hluam hluam chungin Mario chuan a bungrua a la a, St.Bartholomew ah hian hun hlimawm lem loh tak hmangin thla thum hnuah a bang ta nge nge a ni.

St.Bartholomew president Stefanelli chuan an naupang chhungten Mario a tel chuan an fate an lak chhuah tur thu an hrilh chu a tirah a hrethiam lo ve khawp mai a. Chhungkaw tam takin an fate kalnan an remtih tak loh hnuah chuan a thianpa Valenti hnenah Mario chu an tan kawl chhunzawm zel chi a nih loh thu a hrilh ta nge nge. Valenti hian naupang dang te Mario chunga an khawsak dan a hria a, Mario hian chhang let turin dikna chanvo a nei tih pawh a hrechiang. Mahse an pawm rih mai a ṭul si.

St. Bartholomew a Mario tawnhriat chu chhinchhiahthlak a ni lem lo a. Kum 7 mi a ni ve tawh a, John Valenti chuan Mompiano-ah intuaihriam turin a lalut leh nghal.

Kum 1999 a nih chuan, Brescia a Ghanaian Biak in aṭangin mipakhat chuan Balotelli chhungkaw hnenah lehkhathawn a rawn thlen a. Thomas Barwuah leh Rose te nupa-in fanu thar an neih thu an rawn hrilh. Silvia chuan an thudawn chu Mario hrilhin, “I nuin naute thar a nei a nia. Hmeichhia, a hming chu Angel a ni. Tunkartawpah i pa nen i nau thar chu va hmu ve la kan lo ti a,” a ti a.

Mario chuan, “Ka chhungte hmuh ka duh lo, ka unaute chauh ka hmu duh,” a lo ti a.
Silvia chuan Mario dinhmun chu hrethiamin, “Ka vaiin i tan a ṭha ber tur hi kan duh vek alawm. Kan hmangaih che asin,” a ti a.

A tuk khua a lo var chuan Franco Balotelli te chhungkua chu Thomas Barwuah te in lam pan chuan an inkhalh chhuak ta a, Mario pawhin a unau- Abigail, Enoch leh a nau thar Angel te kiangah kartawp chawlh a hmang ve lehta. Pathianni a lo thlenin Franco chuan Mario a lam leh a, a hnu kum thum chhung chu a thisen zawm chhungte hi a tlawh leh tawh lo.