Lumezzane junior team te training chu an Senior Team coach Walter Salvioni chuan a lo thlir ve reng a, a bulah Michele Cavalli a ṭhu ve bawk a. Cavalli hi chu Mario te High School Teacher leh an Junior team coach a nih tel thu kan sawi tawh kha.
Junior team hian Salvioni in a en dawn tih hi an hre lawk lem lo a, Lumezzane coach Salvioni chu Mario a hmuh vawikhatna atangin a luangliam nghal ngang mai.
Salvioni chuan Cavalli hnenah, “Ka neih a ngai,” tiin Mario a duh thu a sawi a.
Cavalli pawhin, “Tehreng mai, i duh dawn tih ka hria alawm, Walter,” a lo ti a.
Super Mario hi a tlan chak bakah thahrui a ngah em a, an khingpui ten ball a chanin han chhuhsak tum ngial ṭhin mahse a ball chan a nghet ṭha bawk a. Goal len puar pawpin a khung leh nge nge thin.
Kum 2005 a ni a, Mario pawh kum sawmpanga(15) a ni ve ta. “Player ṭha tak a nih hi, a ball khawih a dik bawksi! Natural striker che rang leh thahrui ngah tak a nih hi. First team squad-ah ka lalut dawn a nia,” tiin Salvioni chuan Cavalli bulah a sawi a.
Cavalli erawhin, “Ekhai, tunah chuan a theih dawn emni. Ala naupang si a,” tiin a chhang a.
Salvioni ve thung chuan, “Enge i sawi awmzia? A sang ṭhat em hi. Kum sawmpasarih(17) ang mai a ni. A pumrua te hi en ta che,” a ti a. Mario hi hetih hunlai chuan feet ruk (6ft) lai a ni tawh a ni.
Cavalli chuan, “A pumrua hi chu a dik tawh viau a, mahse kum ala tling lo a nia,” a ti a.
“Engtin nge a nih theih zawk? Kum engzat nge a nih tawh a?” tiin Salvioni chuan a zawt zui a.
Cavalli chuan, “Kum sawn leh panga(15) chauh,” a lo ti a.
Salvioni chu a ngawi ta vang vang a, “En teh, kum sawmpanga te chuan sawmparuk an hnaih tawh alawm. A chungchang hi Chinelli hnenah i thlen teh ang, “a ti a. Kum sawmparuk hi an senior team a player khel thei chin an ni.
An pahnih chuan ngaituahna te an han hmang dun a, a hnuah Cavalli chuan, “League hniam zawk a dan kan hman mek ti danglam thei an awm a nih ngat chuan Ezio Chinelli hi a ni ang, “ a ti ta a.
Lumezzane chairman Ezio Chinelli chuan an coach – Salvioni leh Cavalli te ngenna chu a lo phurpui ve phian mai a, mahse Mario hi a ala naupan em avangin senior level, Serie C khel turin a hriselna a ṭha tawk em tih Doctor in a endik phawt a ngai dawn a ni.
Salvioli leh Cavalli te chuan Mario chu check-up an neihpui thuai a, a paltlang hnuah senior level a inlan turin a inbuatsaih ve ta nghal.
An inkhelhni a lo thlen chuan Bus in Padova lamtluang an zawh a, Lumezzane hi league table mawng atanga chhiar a pathumna nimek an ni a, Padova hi a chunglam a awm lai an ni thung. Salvioli leh a team te hian chak an mamawh hle a, an team bench han thlir chuan Mario pawh a lo thu ve ta vang mai.
Team pahnih chu goal awm lovin hunrei tak an inhnehtawk a, huntawpnan minute tam a awm tawh lo. A khelhah chuan Padova an chungnung hret a. Mario chuan an Boss Salvioni in a rawn melh zeuh zeuh tih a hria ni tur a ni. Lumezzane hian chak an mamawh a, chumi tur chuan goal an khung ngei a ngai. Bench lamah an striker Mario chu a insum zo ta lo.
Mario chuan an coach Salvioni hnenah, “Min hrem hun chhung hi a zo tawh em, Coach?” a ti rup mai.
Salvioni chuan, “Eng hremna maw? Eng chungchang nge i sawi,” tiin a lo zawt let.
“Bench-ah ka ṭhut reng hi. Bench a ṭhut hi chu inhremna a lawm,” tiin Mario chuan a chhang a.
Salvioni cuan, “I ni khatna a nih hi. Kan bul a i game hmasaber chauh a la ni e,” a ti a.
“Mahse goal kan la khung si lo a. Ngaituah chiang la, min khelhtir loh avangin midang zawng i hrem mek a nia,” tiin Mario chuan mahni inringtawk takin a lo sawi ve thung.
Salvioni chuan a sana a en vang vang a. Mario lam chu a hawi zet hnuah a assistant coach hnenah chuan, “Mario hi luhtir ka duh e,” a ti ta nge nge.
Mario pawh a lo phur vet vet hle a. An coach hnenah lawmthu sawiin, “Thuthlukna dik a ni,” a ti zui ngei a.
Super Mario chu khelmual chhungah a tlan lut ta a. Mahse stand lam aṭangin thlirtu mipuite chuan zawng hram ri ang leh a vun rawng avang chuan an lo au nawmnah nasa khawp mai.
Amaherawhchu khelmual chhung a a lut chu a hlim em avangin a bengkhawn duh lem lo a. Mario hi a chhungten an fuih nasa ṭhin bawk a, hetiang hunah hi chuan a phuba lak dan ṭha ber chu ṭha taka khelh a, goal khung ṭeuh a ni.
A nu Silvia in a zilh nasa a. “Miin an ngaihdan che a pawimawh lo. Nangmah i inhmuh dan a pawimawh ber zawk,” tiin Mario bulah a sawi fo ṭhin a ni.
Lumezzane senior team a khel ve rawlthar kum 15 mi lek chuan ngaihventu a ngah zui hle a. An tualchhung chanchinbu ah pawh a chungchang an rawn ziak ta nge nge. Reporter ṭhahnem tak chu Mario te training session chhim turin an rawn inlan thuai mai.
Lumezzane senior team a zawm aṭanga thla tam pawh a liam hmain Serie A 2005-06 Champion Inter Milan chuan Mario chungchangah an coach Salvioni an rawn bia a. Inter hian Lumezzane hi €150,000 in an dawr a ni.
Zankhat chu a in lam pan Lumezzane coach Walter Salvioni haw chu reporter thahnem takin an lo hmuak a, “Naupang talent tha tak i hmu chhuak a, i team-ah i seng luh dawnin hlauhthawnna te i nei em?” tiin reporter pakhat chuan a zawt.
Ani chuan a lu a thing te te a, “Theihna sang tak nei a ni a. Ka hmuh hmasak ber ni aṭangin player danglam leh hma hun eng tak nei a ni tih ka hria. A khingpui te hneh turin a che rang a, a skill a san bakah thahrui a ngah hle,” a ti a.
“I chan ta mai tur hi engtin nge i awm le?” tih zawhna chu, “Ka lawmpui lutuk e. Star a la ni dawn alawm,” tiin an coach Salvioni chuan a chhang.
