BALOTELLI: THE UNTOLD STORY(Chapter 1) – Rempuia

Estimated read time 5 min read

“Germany hian khawvel a eng team pawh hi a hneh thei ang” tiin Joachim Löw chuan a team te a rin tawk zia chungchang a sawi a. Poland khawpui Warsaw a National Stadium ah inkhel pawimawh tak mai an hmachhawn dawn. Inkhelh tan nan minute sawm vel chauh a awm tawh a, German national team te inkhel turin an in peih tawh. Italy nen Euro 2012 semi final match an khel dawn a, he inkhel a chak zawk hi Spain nen Champion Trophy chawi an inchuh dawn.

Hetihlai hian pindan lehlam, Italian locker room ah ve thung chuan Mario Balotelli-a’n a pheikhawk hrui a lo suih ve mek bawk a. A kiangah chuan a teammate te pawh insiam pahin an bengchheng hle. Buffon, Balzaretti, Marchisio, Cassano, Barzagli, De Rossi, Montolivo, Bonucci, Pirio leh Giorgio Chiellini te ho an awm kim vek a. Kut zai zir nen lam an bei leh nasa dawn khawp mai.

Chutah Giorgio Chiellini chuan, “Mario, engah nge goal I khung hian I celebrate ngai miah loh? Tiin a zawt a. Mario chuan “Ka ti alawm.” Tiin a chhang mai a. Italy forward Antonio Cassano chu Mario hma ah rawn dingin a thianpa tih dan niawm tak a inti sekin, “Hei hi lawmna lantir dan a ni lo.”a ti zui nghe nghe.

A tu mai pawh chu an nui nasa hlawm hle mai a, Mario pawh a nuih a za ve hle. Balotelli chuan “Eng dan nge ni ngai? Goal ka khung hi chuan ka hna ka hlen tihna a ni ve mai a. Hei vang hi a nia hlawh pawh ka neih thin. Dak pu in a lehkhathawn ken a hmun tur dik tak a thlen avangin a celebrate ngai emni? Tiin a chhang zui a. A teammate te chu an nui heuh heuh mai. Italy goalkeeper Buffon chuan “I suangtuahna a thlen dik hian I lawm thin em? Tiin zawhna a zawt ve zui a. Mario chu a tim hmel khawp mai. “Suangtuah thin I nei em?” ”Aw nei tehreng mai” tiin Balotelli chuan a sawi sap a, a ngaituah ril zui hmel hle.

Naupang mai a nihlai a a suangtuah thin te a chhui kir a, a harsa a tih hmel hle. Thil tam tak a hrechhuak zui a, a hnuah a jersey chu hlimin a dul a ser (scar) awm chu a thlek zui vang vang. Kum thum mi lek a nihlai a zaipui tawk tawh a ni tih hriat chhuah tir tu a ni. Khelmual lam an pan ta, khawvel mipui mi maktaduai chuangin an thlir thup mai. Khelmual sirah chuan mipui an khat vek a, Mario pawhin chutiang boruak karah chuan Italy, a teammate leh a chhungte tan a ni special tak hman ngei a tum ruh hle.

A tan hun tha chu minute 20na ah a rawn inherchhuak ta. Antonio Cassano chuan mual veilam atanga tha zet mai a ball a lakluh hnuah cross ball neiin Balotelli chuan a lo tauh lut chiang hle. Azzurri fan te an sapatal nasa, Balotelli meuh pawh tun tum zet chu lawm avanga a jersey pawt fanin a ṭe ve chel chul mai, a teammate te lam pan a tlanin Cassano nen an inkuah deuh hnap a, midangin an rawn zuan chhunzawm. National Stadium chu Mario goal khung lawm avangin a nghawr dum dum a ni ber mai.

Darkar chanve vel an khelh hnu chuan Riccardo Montolivo diagonal a ball vawrh tha zet chu Mario hma ah tak a tla lehta, Mario hian a um lut mawi ve hrim hrim bawk a. German defender te tih buai hman loh a lalutin a goal dinglam chung kil ah net puar pawp khawpin a hem lut. Germany keeper Neuer-a tan pawh dan rual a ni lo. Mipui lam an haw haw dur dur mai.

Mario chuan a jersey phelhin a sa chu chhuan hmel takin a pho lang a, a in hum ruh zui khawp mai. A nui miah lo, chhe te pawhin. A teammate ten a goal thun an rawn lawmpui pawhin a awm dan a thlak danglam hek lo.

Mario Balotelli goal hnih hmangin Italy in final an lut zui a. Hun tawp hnuah Mario chuan fa atana latu a nu Silvia te thutna lam chu a pan a, a nu kiangah chuan a unau Silvia fate pahnih- John leh Cristina te bakah a pianpui unau Enoch-a chu a lo awm ve bawk. An za chuan lungchim takin an inkuah a, a bianga fawp vawng vawng tu a nu hnenah chuan, “Hei hi ka hun tawn tawh a zan ropui ber a ni. Khang goal te kha I tan ka hlan e.” tiin a hrilh nghe nghe.

Heng hun a thlen theihnan hian hun rei tak chhung a nghak a, a nu in khelmual sirah a lo tawiawm ve avangin a ropui danglam bik hle ang. A duhthusam chu hlim taka a nu awmtir hi a ni. Germany lakah 2-1 in Italy an chak a, final an lut zui a. Mipui mit chu Mario Balotelli, a hminglem atan Super Mario an vuahsak lamah chuan a fu dual ta mai.

A teammate Buffon-a suangtuahna sawi chungchang kha a ngaituahna ah a awm zui a, Lumezzane khelmual a Ghanaian player Papa Dadson nen an intawn tirh te a hriat chhuah phah hial. Ani pawh khan suangtuahna chungchang leh a thlen dik theih dan te a sawi thin a ni. Mario hian he hun ropui tak tawng tur hian Palermo atangin he a zinkawng hi a zawh tan a, a thil tawn tak chu thil mak danglam tak a ni tih a hrechiang hle. A chhan chu a nausen laiin tumahin a dam khawchhuah zawh an ring lo, a chhungte ngei pawhin…

C Tlanthianghlima

Football tui ve tak

You May Also Like

More From Author