#ZoFooty

BALOTELLI: THE UNTOLD STORY
(Chapter XIII)

FC Lumezzane Head coach Dario Lazzarin chu Mario thli thlaiin karkhat chuang Mompiano stand-ah a lo ṭhu ve reng thin a. Lumezzane hi Brescia khawpui atanga hla lo tak niin 21km vel chauh a hla a ni.

Lazzarin-a bulah hian John Valenti leh Franco Balotelli te an awm ve bawk a.
Lazzarin chuan Mario chu, “Mi buluk leh theihna sang tak nei a nih hi,” a ti a, mit khap lek lovin a thlir reng mai.
Valenti-a’n “Enge ka hrilh che kha, ṭhianpa?” a lo ti ve thuai.

Franco pawh a lo bu ve nghauh nghauh mai a, a fapa hma hun chungchang an sawina chu a lo ṭawmpui ve viau mai.

Lazzarin chuan, “In awmpui theih hun chhung hi inpawtsei tawh em, Mr. Balotelli? Awmna hmun nghet tak a neih hi kan ngaipawimawh teh a nia,” a ti a.
“Mario hi kan hnenah kum sarih chhung a awm tawh a, a in ang maiin a ngai tawh alawm. Tunhnai mai khan kum hnih chhung atan awmpui phalsak leh kan ni e,” tiin Franco chuan a chhang a.

Lazzarin chuan, “A tha e. Kum sawmpakhat a tlin hunah FC Lumezzane-ah kan lo lawmlut ang. Chumi hma chuan Pavoniana club team ah hmuh kan duh ang, thlaruk aia rei awm pawh a ngaih ka ring lo, “ a ti a.
“A ṭha lutuk alawm,” tiin Valenti leh Franco chuan an pawmpui thu an lo sawi ve bawk a.

Kum 2002 khan zirna lamah semester thar a kai ve ta a. Brescia khawpui a high school ṭha ber zinga mi, Leonardo da Vinci High School ah lutin an zirtirtu thar Michele Cavalli chu Lumezzane ah trainer a ni tel nghe nghe.

An school ban hnuin Mario chu a pahrawn Franco leh a unaute – John leh Conrad te chuan school ground pawnah an lo hmuak a. Mario pawh an motor ah chuan a chuang ve nghal.

An Football practice na hmun lo lamah an tlan ta daih mai chu Mario chuan mak a ti hle a, “Heihi Mompiano kalkawng a ni lo a nia,” a ti a.
Franco leh a fate chuan nui dar dar chungin, “Mompiano ah kan kal dawn hleinem,” an lo ti a.
“Mahse ka practice…” tiin Mario chuan a sawi a. Franco chuan, “Kan surprise dawn che a, “ tiin.

John pawhin, “Practise ṭhulh turin phalsak i ni tawh e,” a lo ti ve a.
An han ngawih det hnuah, Franco chuan nui sang chungin, “Lumezzane-ah kan kal dawn,” a ti ta a. An phur tlang vet vet hle.

Franco chuan, “Coach Valenti-a’n a Lumezzane a awm turin a duh che a,” a ti ta a.
Mario chuan, “Mahse Mompiano ah alawm a awm,” tiin a lo chhang.
“Tunah chuan ni tawh lo e, Lumezzane-ah youth team enkawl turin a lut tawh alawm,” tiin Franco chuan a sawi a.
Mario pawh a hlim ve hle.

Conrad chuan, “Dario Lazzarin kha i hria em?” tiin a lo zawt a.
Mario pawhin a hming chu a hre ve a, tunhma a inkhel thin a ni. “Midfielder kha maw?” a ti a.
Franco chuan, “Aw ni e. Tunah chuan Lumezzane coach a ni tawh asin. Chuan in professor Michele Cavalli pawh kha in coach leh in teacher a ni dawn a nia aw. Darrio Lazzarin ropuia sawmna hi hnar phal chi a ni lo,“ a ti a.

Franco chuan Mario chu thuchah zuiin, “Heihi hre reng la. Miin fiamthu thawhnan an hmang che emaw an chhaihnawmnah che a nih pawhin nui liam mai mai ang che. I chhang let tur a ni lo,” a ti a.
“Papa, tumahin Field ah fiamthu thawhnan min hmang ngai hleinem. A chhan chu ka tha em a, min mamawh alawm,” tiin Mario chuan a lo chhang a. Car chhungah chuan an nui zui dar dar mai.

Mario hian mahni inthunun a harsat ve thin em a, a khawsak phung avangin ADHD, Attention Deficit Hyperactivity Disorder a neih an ring hial thin a ni.

Brescia homeground Rigamonti Stadium an han thlen chuan mipui an lo zi mur mur mai a. Mario chuan, “Tute nge inkhel a?” tiin a kalpuite chu a zawt thuai.
Franco chuan, “Brescia leh Pavoniana,” a ti a.
“Inelna pangai a ni lo a nimaw,”
“Exhibition match a nih hi.”

Franco chuan a ipte a Brescia jersey a ah lai chu phawrhin Mario a pe a, ani chuan, “Brescia tan ka la khel thei lo ang. Ka la naupan em hi,” a lo ti heu mai.
Mario chhanna chuan an nuih a ti za ve hle a, “Ni e, i khel dawn hleinem ka fapa. Brescia tana khel tur chuan kum 18 i tlin phawt a ngai ang. Mahse Ball boy in an tih thin chu i hria tiraw? a ti a.

Mario chu a thaw huai mai a, “Aw hria e,” tiin a jersey ken chu a ha a. Chutih lai chuan Brescia manager Carlo Carletto Mazzone a rawn lang hlawl mai. “Mario? Ka lo lawm a che, ball boy chungchang hrilh i mamawh em?” tiin a lo zawt a.
Mario chuan, ‘’A ngai lo e, Sir,” tiin an inchibai zui.

Mario pawhin Carlo Mazzone hi chu a hre ve viau mai a, Mazzone in a hming a lo hria leh an han inchibai ta mai chu mak danglam a ti ve hle. Carlo Mazzone hi a vanglai a AS Roma defender rinrawl thin niin season sawmpahnih chuang AS Roma tan a khel hman a ni.

Mario chu khelmual sir lam pan chuan a kal ta a, tunhmain ball boy ah hian lo tang ve ṭhin tawh mahse tun ang inkhel lianthamah hi chuan a vawi khat tan ve na a ni.

Tichuan le, kum 37 mi Italian Football Legend Roberto Baggio, the Divine Ponytail an tih mai thin chu Brescia jersey number 10 hain a rawn chhuak a, mipui thawm a ṭha hem hem hle. Ani chuan a bulhnai mai a lo awm Ball boy Mario chu rawn mit siai zauhin he thil thleng hi Franco pawhin a lo hmu fuh.

“Kha in lo hmu em?!” tiin a au chul mai a. “The Ponytail in ka fapa a mit siai zauh a nia!” tiin a fate pahnih John leh Conrad kiangah a sapatal chiam.

Mario pawhin nuam a tiin a hlim ve hle a. Khelmual sir aṭanga inkhel a han thlir chu an dinhmunah te a lo inchan ve thul. Han puitlin thuai a, a hmaa inkhel mek te anga han khelh ve theih hun nghakin a za zek zek tawh a ni ber.

An inkhelh zawhah an rawn chhuah pahin Roberto Baggio chuan a jersey chu Mario a pe a, nui sangin “I ti tha lutuk e,” a rawn ti a.