#ZoFooty

BALOTELLI: THE UNTOLD STORY
(Chapter XIX) – Rempuia

Mario Balotelli in Manchester City a zawm hunlai hian Ghana lama a chhungte hriat chakna a nei ve tlat mai a. A nu leh pa, Rose leh Thomas Barwuah-te hnen aṭangin Ghana a thingtlang khaw pakhat a cheng mek, a pu Nana chanchin hi chu a hre ve ṭhin a, mahse an la inhmu lo thung.

Mario chuan a pu hi a signature chuanna lukhum a thawn a, Accra (Ghana) lamah Pu Nana chuan a lo roh ve hle a, an khaw lamah chuan he lukhum chungchang hi sawi zui pawh a hlawh ve hle.

Ṭumkhat chu Manchester City tana a khelhpui African mi ve tho, Ivorian midfielder Yaya Toure nen chaw hlui an kil dunnaah Mario chhungte chungchang hi an sawi a. Yaya chuan, “In lam a ka chhungte nen hian kan inhnimhnai reng a, nangpawhin Accra-ah chhungte ṭhahnem tak i nei tih ka hria asin,” a ti a.

Mario chuan, “Engtin nge i hriat theih?” tiin a zawt a, Yaya chuan ṭhen deu ṭhaw chungin, “Sports Illustrated chanchinbu ah ka chhiar alawm, “ a lo ti a.
Mario chuan, “Chuti keimah aiin ka chhungte chungchang i hre daih zawk a nimaw, “ a ti a.
Yaya chuan, “Sawi ta mai mai ila, hun remchangah i la tlawh ngei chu a ṭha ka ti mange. Hringnun hi a rei lo si a, ṭhianpa, ” tiin a hrilh ta a.

Mario pawhin pawm hmel takin a lo bu ve nghut nghut a, season tawpah tlawh ve ngei te pawh a rilruk ve zui.

Euro 2012 ṭan hma karhnih vel la awmah chuan phone call a dawng a, a pa Thomas Barwuah hnen aṭangin a ni. “Ka fapa, tukin zingah i pu a boral tih thu rawn hrilh che ka tum a, ani chu thlamuang takin a chawl tawh a nia,” tiin a pu Nana boral chungchang a rawn hrilh ta mai a.

Mario chu a thu hriat chuan a ṭhawng ve hle a, awmdan pawh thiam a har a ti ve khawp mai. Engmah sawi zui lem lo chuan ngawi rengin a phone chu a chelh reng a.

“Mario, Mario… i hre thei em?”
“Aw…”

A hnuah Thomas chuan zawi sapin, “In inhmu hman ta lo chu a pawi ka ti hle mai. A chhuang lutuk che a nia, an zavai maiin an chuang takzet a che, “ tiin a hrilh zui a.

Mario chu a pa lakah ṭah insum viau mahse a tliak deu hnawk a ni ber. Hnuai lam a bih ngar ngar a, Yaya Toure thusawi te kha dik a ti thar hle. Hringnun hi a tawi lua a ni.

Euro 2012 khelh ṭan hma ni thum la awmah chuan Poland hmar lam a Gdansk khuaah Italy team chu an awm ve vang tawh a, Auschwitz concentration camp tlawh turin an inbuatsaih mek.

Euro 2012 khel tur team ṭhahnem takin he concentration camp hi an zah zia lantirnan tlawh ngei an tum hlawm a, Indopui pahnihna hunlai khan Auschwitz concentration camp ah hian mi maktaduai chuang an thleng khawm a, mahse damkhawchhuak mi 200,000 vel chauh an awm thung a ni.

Auschwitz luhna gate an han thleng chu an hnip suih hlawm mai. He hmun aṭanga dam chhuak ten an testimony sawina hun te an nei a. Mario chuan a teammate te hnenah Khawvel Indopui pahnihna hunlai a he hmun aṭanga dam chhuak zingah a chhungte an tel ve chu vannei a intih thu te a hrilh a, “In hre ve kher lo anga, ka nu hian an khumhnuaiah thingrem a dah ṭha a, lehkha thawn hlir awmna a ni. Helai hmun aṭanga an lehkhathawn hi,” tiin mittui luang zawih zawih chungin a sawi a, midang pawh an insum zo bik meuh lo.

Euro 2012 ah chuan Cesare Prandelli enkawl Italy chu pahnihna an ni a, final ah Spain lakah an tlawm a ni.

He inelna ah hian Mario Balotelli hi player langsar ber zinga mi a ni nghe nghe a. A bik takin Semi final match a Germany lakah a chet dan chuan mi tam tak sawi zui a hlawh ve hle. A tournament hman danah Mario pawh hi a lawm ve em em a, amah enkawl seiliantu a nu, Silvia tan a goal khung hlanna hun a nei thei te chuan a nun a ti hlimin a ngaihlu ve takzet.