#ZoFooty

BALOTELLI: THE UNTOLD STORY
(Chapter XVII) – Rempuia

Thlakhat a liamhnu chuan Franco te nupa chu an fapa Mario thlah turin an inbuatsaih a, an ṭah a chhuak tlang hle. Mario leh a nu Silvia chu lungchim takin an inkuah vawng vawng a, ”I tan hian ka la hlawhtling ngei ang, Nu, “ tiin Mario chuan a sawi.

Mario pawh ṭah chhuak viau mahse a insum hram hram a, Milan lamah Giacinto Facchetti Sport Centre (aka Interello)-ah a awm tawh dawn a, FC Internazionale Milano, Inter Milan ti a kan hriat lar ṭhin tan a khel tawh dawn a ni.

Interello luhka an han thlen chuan pa smart tak mai hian a lo welcome thuai a, “Interello-ah kan lo lawm a che, Mario. In head coach tur Mr. Esposito ka ni e,” tiin.
Esposito chuan an hmunpui chu fan kual puiin an Complex chungchang te chu a han hrilh vel a, Mario chuan ropui a ti ve rem rem khawp mai.

Darkar khat vel a liam hnuah Inter training jersey nen Mario chuan a teammate thar te a zawm ve a. He hmun hi a ngainain a tlangnel vat a, an in lam han ngaihna em em pawh a nei lem lo.

Kar engemaw zah a liamhnu chuan youth team player langsar ber zingah a tel thuai a. An senior team te hi San Siro-ah an khel ṭhin a, han upat thuai a, senior team tan a khelh ve theih hun a suangtuahnasa ve ṭhin hle.

Inter Milan team enkawltute pawhin an thlir uluk deuh bik ṭhin a, mahse Mario nge nge a che Mario leh ṭhin tlat. Goal hmaah hriam viau thin mahse a che fuh reng bik ṭhin lo a, lawm lo tu pawh a ngah ve ṭhin khawp mai.

An coach zinga pakhat chuan, “A induhtawk nget nget ve hle mai, “ a ti a.
A head coach Esposito chuan, “A inringtawk i tihna emni?” a lo ti.
Coach lo awm ve pakhat chuan, “Engemaw thil thup a nei a nih dawn hi,” a ti ve thung a.
“Enge i sawi awmzia, Mancini?” tiin an zawt zui nghal.

Roberto Mancini, Inter Milan manager chu a nui suk a, “Player ka nihlai aṭangin he Football-ah hian thil tam tak ka lo tawng ve tawh a. An invaivung viau a nih hi chuan an mahni a thlamuan loh rukna leh na tawrh awlsamna te thup an tum vang te a ni ve ṭhin alawm,” a ti a.

Team enkawltute hian Mario tunhma nun hi an hre thui tehchiam lo a. Esposito chuan Mancini hnenah thil engemaw hriat a neih leh neih loh a zawt a. Mancini chuan, “Thil thenkhat chu ka hre ve nelnual a, mahse player a nihna angin engmah ka ngaihdan ka sawhsawn phah lem lo,” a ti a ni.

Mario hi Inter U17 squad-ah tel phawtin kum 16 a tlin hnuah U20 team ah an hlangkai a, kum lamah la nau viau mahse hun reilote chhungin an striker langsar zingah a tel thuai.

Milan-ah a awm aṭanga thlaruk hnuah chuan Sampdoria nen league final match an khel a, inkhel inhnehtawk takah team hnih ten goal an khung hleithei lo. Huntawp lam hnaihah 0-0 in an inhnehtawk mek laiin Inter Milan chuan free kick an hlawhchhuak hlauh mai. A pet turin Mario a rawn ding chhuak. A training nasat chhawr ṭangkaiin goal veilam kilah mawi zetin a khung a, 1-0 in hnehna an chang zui a ni.

Inter chairman Massimo Moratti chuan an rawlthar duhawm zet mai, Mario hi a ngaihven ve thuai a, “First Team ah ka hlangkai dawn. Serie A a khel turin a tha thawkhat tawh e,” tiin a sawi ta rup mai. Roberto Mancini pawhin an pu thusawi hi a lo ṭawmpui ve a, Mario mizia leh chanchin hi a ngaihven nasa a, a hriat pawh a hrechiang thawkhat viau.

Kum 2007 December thla ni 16 a ni a, Inter Milan leh Cagliari an intum dawn. Hetihlai hian Cagliari hian Serie A table mawngphah an luahlum mek a. Inter Milan manager Mancini pawhin Mario chu inkhel thei turin a hruai tel ve a, mahse bench lamah hun a hmang phawt.

Mize danglam tak nei tih takah Mario chuan bench a ṭhut chu a ning ngang mai. “Coach, min luhtir tawh la. Kan chak dawn chiang tawh tho a,” a lo ti deuh sek a. Mancini chuan, “Minute hnih liamta ah i sawi tawh kha, minute 89 liamta chhung khan minute hnih danah i sawi hialin ka ring, min ring rawh, “ a ti a.

Mario erawh a lawm vak lo a, bench a ṭhut hi chu inhremna ah a ngai si a. Minute 90 an khelh tlin hnuin hun pek belh a ni a. Mancini chuan Mario chu a luhtir ve ta nge nge. Jersey no. 45 ha in a debut match a khel a. An striker David Suazo thlakin player hrawl tak tak rual – Maicon, Esteban Cambiasso, Javier Zanetti leh Walter Samuel te kiangah a inkhel ve ta. Mahse kum 17 lek a upa, Mario hian a he match ah hian game a langsar turin ball pawh a tawk mumal hman meuh lo a ni.