#ZoFooty

BALOTELLI: THE UNTOLD STORY
(Chapter XVIII)

Kum 2008 August ni 13 a ni a, Mario pawhin kum 18 a tling ve ta. A piancham tukah chuan an chenna Concesio a Department of the Interior Office-ah chuan Italian khua leh tui nihna nei thei turin a inbuatsaih ve ta rup mai, a kiangah chuan amah enkawltu, Silvia leh Franco Balotelli te nupa an awm ve bawk a. Mario hian T-Shirt – Not Only Am I Perfect, I’m Italian Too! tih chuanna a ha a ni.

Hemi ni hian Italian citizenship buaipuiin mi ṭha hnem tak an lo awm ve bawk a, mahse ani chauh hi African a ni thung. A chhungkaw hrawn te nen hian Italy khua leh tui nihna a neih theihnan kum thum chuang lai an lo buaipui zak zak tawh a, a hlawhtlinna ni an tawng ve dawn ta.

Oath taking te an han neih zawh hnuah chuan Italian khua leh tui nihna nei thar te lawmpuinan chibai an han sem liam liam a, Italian identity card leh citizenship certificate dawngtu mipui hlim thawm ring tak karah chuan Mario a lawm fal hle. He Office a luh lamah kha chuan a hmingpum chu Mario Angelo Barwuah ala ni a, a chhuah lamah erawh Mario Angelo Balotelli a ni tawh thung.

Office building pawn lam a chanchinbu mite hmaah chuan inchhuang takin, “Italian ka ni a, Italian rilru put hmang nen Italy national team tan ka khel reng ang,” a ti a ni.

Italy khua leh tui nihna nei hlim hlawl Mario hi Inter Milan tan pawh Roberto Mancini hnuaiah a che tha a che chhunzawm hle a. Mahse Jose Mourinho in an Head Coach Mancini a rawn thlak hnuah thil a danglam zo ta.

Mario Balotelli leh Jose Mourinho hi an inmil lo ve khawp mai a. Mario lah a discipline a chhiain a hmel en aia ngaihsak mamawh a lo ni ve ṭhin bawk nen, Mancini angin Mourinho team kaihhruai dan leh a mizia chu a inrem hleithei lo. Mario hian a inlan chhunah hrem a tawk chho ve reng bawk a, Field chhung leh pawnah buaina a nei chho mawlh mawlh a ni ber.

Inter Milan fan te ti thinur zual turin an hmelma AC Milan jersey a lo ha thul. A talent neih that zia hi chu hai rual a ni lo a, mahse amahah engamaw fel lo a awm tlat lawisi.

Inter Milan leh Mario inkar boruak chu ṭhat lam aiin a chhiat belh telh telh zawk a, Inter nen a an inkar chu an tihtawp mai a tul a ni ber.

Manchester City manager ni ta Roberto Mancini chuan a fapa ang mai a lo enkawl thin chu a rawn ngaihven lehta nge nge a, Mario pawhin bul ṭan ṭhat tumin Italy atangin a vawi khatnan ram pawn, England-ah a zinkawng a zawh chhunzawm dawn ta. Man City hian Mario man atan hian £23m lai an seng a, kum 19 mi Mario chu mitkhap kar lekah multi millionaire a ni ta der mai.