BALOTELLI: THE UNTOLD STORY
(Chapter XX: The Final Chapter) – Rempuia

#ZoFooty

BALOTELLI: THE UNTOLD STORY
(Chapter XX: The Final Chapter) – Rempuia

Euro 2012 Final match-ah Italy chu Spain lakah 4-0 laiin an tlawm a, mahse Mario Balotelli tan erawh tournament hriatreng tlak a ni tho mai. Final an luh theihnan goal 3 khungin Euro XI ah thlan tel a ni nghe nghe.

Kum 2013 January thlaah Manchester City chhuahsanin Serie A team AC Milan a zawm a. Ṭumkhat chu a private chef in a ei duh zawng te a zawt a, a ngainat em em ṭhin Pasta carbonara chu a duh turah ngaiin a zawt a, mahse ani chuan a lu a lo thing vat mai.

“Jollof rice ka duh zawk e,” tiin Mario chuan a sawi a. An cook chu a ngaihna hre lo zetin a hawi hu mai. Mario thil sawi Jollof rice chu enge a nih a la hre ngai hauh lo. A hnuah Mario chuan a recipe a hrilh zui ta a, “Buhfai, tomato sauce, purunsen, chi leh hmarcha te a ni e. Ghana ah chuan an ei nasa ṭhin alawm. Ka mite tan chuan chaw a ni satliah lo a, an nun khawchhuahna a ni,” tiin a sawi.

August ni 13 a ni a, Mario Balotelli piancham thlen hma ni niin Pope Francis hmuhna hun remchang a nei hlauh mai. Pope hian Rome Stadio Olimpico a Friendly match khel tur Italy leh Argentina Football team te chu Vatican-ah a lo mikhual a. Pope Francis hian team pahnih te hi infuihna hun te a hmanpui bakah Mario chuan midang te ang lo takin a mimal a kawm falna hun a nei thei hlauh. Mario chuan Pope hnenah hian a sum dinhmun te a ṭhat tak hnuah a hlawh chanve chu charity ah a hlan ṭhin thu te a hrilh a ni.

Kum khat a liamhnu kum 2014 August thlaah England-ah kir lehin AC Milan aṭangin Liverpool chuan £16m sengin an lalut a. Cheshire, England ah in a luahzui a ni.

A unaunu te pahnih Abigail leh Angel-te chu Manchester-ah a nu Rose Barwuah ho in an cheng mek a, Mancheter City tana Mario Balotelli khelh lai aṭanga awm tawh an ni a, England-ah Mario a kir leh dawn tih an hriatin an lo lawm ve hle.

Concesio, Italy ah Mario nuhrawn, Silvia Balotelli te chhungkua chu an chenna ngaiah an la awm vek a. Liverpool tan contract a sign hnuah a Italian chhungte kiangah hian a lawmna hun hmang turin Brescia-ah a haw leh rih phawt a.

Zanriah an kil pah chuan chhungkaw titi na hun te an nei a, Mario chu rawn ding chhuakin a nu leh pa te hnenah chuan, “In chungah lawmthu sawi ka duh a. In tel lo chuan tun dinhmun hi ka thleng thei ngai lo ang. Fapa tam tak aiin ka vannei zawk tih hi ka hre chiang a. Nu pahnih leh pa pahnih ka nei che u a, beisei phak bak aia nasa hmangaihna ka dawng a ni,”tiin a lawmzia thu a sawi.

A nu Silvia chuan nui sang chungin, “I room hlui pawh kan lo peihfel tawh a nia aw,” a ti a. Mario chuan, “Ka lawm e ka nu, mahse ka awmrei hman lo a nia,” tiin a chhang a.
Franco chuan, “Khawiah nge i kal dawn a?” a lo ti thuai a.
“England ah ka let leh dawn,” tiin Mario chuan a chhang zui.

Ni engemaw zah a liamhnu chuan Mario chu a Ferrari rawng sen nen chuan Manchester khawpuiah a inkhalh chhuak a, a kal tumna hmun a han thlen chuan fimkhur takin chu in kawngka chu a pan a, doorbell a hmet ri ta.

Kawngka chu muang changin an rawn hawng a, a hmaah chuan mak tih hmel takin amah hringtunu Rose Barwuah a lo ding. Beisei loh taka a fapa a hmu hlawl mai chu mak a tih hmel hle.

Mario chuan nui sang chungin, “Nu, ka lo lut thei a ngem?” a ti a. A nu a koh lohna pawh hi hunrei tak a ni ve ta. In chhungah chuan an inzui lut a, Rose-i chuan a fapa chu Jollof rice a lo siam sak a, a hnuah Mario chuan a nu hnenah, “Thil i sawi dun teh ang,” a ti a.

A TAWP TA.

Note: Balotelli: The Untold Story hi Michael Part lehkhabu ziah a ni a, Mizo ṭawng a lettu hi Tv C.Lalrempuia a ni. ZoFooties zingah Balotelli: The Untold Story min lo ngaihhlutsak a, min chhiarsak ṭhin tu zawng zawng te chungah lawmthu kan sawi e.