BARCA AN TALBUAI MEK !

Estimated read time 2 min read

FC Barcelona chu tunah hian sum lamah an talbuai mêk a. An club in bâ an neih €1173m a €730m chu rulh vat ngai (short-term loan) a ni a, hei hian an club hotute rilru a ti buai hle.

Ba rulh hmanhmawh tur an neih €730m a €266m chu bank aṭanga an pûk niin hei hi June 30, 2021 thleng a rulhna hun pêk an ni a, loan an lâkna zingah hian Golden Sachs pawh telin anni hnen aṭang hian €90m an pûk a ni.

Season liamta khân Catalan club hi an sum lakluh aiin an sum hman €100m laiin a tam a. An sum lakluh €855m a nih laiin an sum hman erawh €955m a ni thung.

Kumin hian an in ruahman dânah €828m lalut thei turah an in ngai a, an senso zawng zawng chu €796m ah khung len theih an in beisei bawk a ni.

Blaugrana hi an buaina ber ni a lang chu an playerte hlawh sâng lutuk hi a ni a. Nikuma sum an lakluh zawng zawng (€855m) a €632.7m (74%) zet mai chu hlawh atana an semchhuah a ni a, hei hi league thuneituten an phal zat 70% aiin a sâng nghe nghe a, hremna hmachhawn thei reng an ni bawk.

Tuna president ni lailawk rih Carlos Tusquets chuan RAC1 hnenah January thla hlawh hi an playerte hnenah a hun taka an pêk theih a rinawm loh thu a sawi nghe nghe.

Season ṭan dawnin an player senior hlawh tam an chhuahtir nual a, chumi avang chuan €80m vel lai hum (save) angin in ngai mahse hripui nghawng kal zel avangin Barca hi sumah an la talbuai chhunzawm ta zel a ni.

An sum pûk rulh vat ngai hote hi an chingfel vat lo a nih chuan buaina liantham zawk Spanish club hian an hmachhawn thei dawn a. Tun season zawhah an player senior leh langsar an lo chhuak nual a nih pawhin thil mak a ni lovang.

C Tlanthianghlima

Football tui ve tak

You May Also Like

More From Author