Barca boss thar tur Koeman ?

Estimated read time 2 min read
Champions League atanga mualpho taka tla Barcelona chuan naktuk hian an manager Quique Setien an ban dawn a, amah thlak tur hian Netherlands manager ni lai Ronald Koeman chu rinkai ber a nih thu Spanish football expert Guillem Balague chuan a sawi.
 
“Naktuk hian board meeting neih a ni dawn a, Setien hi an ban ang. Pre-season tan nan kar hnih chauh a awm tawh avangin manager thar neih thuai a tul a, Ronald Koeman hi manager thar a ni maithei. January thla khan an sawmna lo hnar tawh mahse tunah erawh boruak a dang a, ani hi lak ni ngat se chu Barca fans te’n an lawm ngei ang,” tiin a sawi.
 
Balague – a sawi danin Tottenham manager hlui Mauricio Pochettino hming pawh sawi rik ni mahse an hmelma Espanyol player leh manager hlui a lo nih tawh avangin Barca fans te’n an ngainat a rinawm loh.
 
Koeman hian kum 2018 February thla atang khan Netherlands hi a enkawl tan a, tunhnaia a hriselna dinhmun tha vak lo erawh Barca boss ni turin a fit tawk ang em tih zawhna a piang. Kum 57 mi hian a vanglai 1989 – 1995 chhung khan Barca tan hian La Liga 4 bakah European Cup thlengin a lo chawipui tawh a, 1998 – 2000 chhung khan Barcelona assistant manager ni mahse an senior team tak hi chu a la enkawl lo a ni.
C Tlanthianghlima

Football tui ve tak

You May Also Like

More From Author