FC Barcelona president thlan chu nakkum March a neih tura ruahman ni mahse tun aṭanga rei vak lovah hian Barca president hi thlang thut thei dinhmunah Catalan club hi an awm mek.
Tuna Barca president ni mek Josep Bartomeu duhkhawp lohna a len tâk êm avangin FC Barcelona a club member – Socis an tih, club president thlanna a vote thlâk thei chinte chuan Mes que una Mocio (Motion of no confidence) chu tunah hian kalpui mêkin an club president thlan ṭhat a nih theihna tur hian Socis member signature 16,250 chuanna chu club hnenah an thehluh a ngai a.
An club hotulu thlak duhtute hian signature 16,250 lâkkhawm an mamawh laiin tunah hian 19,000 vel lai maiin hming an ziak tawh niin Catalan a thuthar puangtu TV3 chuan an tarlang a ni.
Huntiam chhunga signature tla te hi club hnenah Socis te hian an thehlut leh dawn a. Tun dinhmuna a lan dân chuan hmingziak mamawh zât hi an tlin tawh avangin ‘motion of no confidence’ hi kalpui a nih a rinawm hle.
Hei hi an kalpui chuan club memberte chuan an club president leh board memberte chu an club enkawl turin an la duh em tih vote an thlâk dawn a ni. A duh lo lam hian vote tla a 66% a tling a nih chuan president thlan ṭhat tur a ni dawn a. A tling lo a nih erawh chuan nakkuma inthlan hun tur ruahmanna awm sa an nghah a ngai thung ang.
Barca ṭantute hi chi li in an thliar theih a – Socis, Penyes, Barca Fans leh Cules te an ni a. A chunga kan ziahlan tawh angin Socis te hi club member niin president inthlan pawha vote thlak pha chinte an ni a. Penyes te hi vote thlak ve pha chiah lo, mahse Barca tana ṭangkai êm êm mai, Barca ina sum hnar pawimawh taka an neih ṭhinte an ni a. Club tana donation tam tak khawn a hmuchhuak ṭhintute an ni.
Barca Fans te hi chu supporters’ club kan hriat lâr ang hi niin club supporters’ club member a inziak lutte kha a ni ve leh a. A tawp ber Cules te erawh hi chu Barca ṭan ve tawp, engah mah inhmang lo leh inziak lut ve lo te an ni.
