Barcelona – ah Albert Roca ?

Barcelona head coach thar Ronald Koeman chuan ISL club Hyderabad FC enkawl mek tu Albert Roca chu a coaching staff zingah seng luh a duh niin phai lam media te’n an tarlang.
 
Indian football – a rin hlawh tak journalist Marcus Mergulhao tarlan danin Koeman hian kum 2003 – 2008 chhunga Barcelona tan a lo thawk tawh kum 57 a upa Roca hi lakluh a duh a, Hyderabad FC lamin chelh an tum ve thung. Koeman hian a hnuaia thawk turin Alfred Schreuder leh Henrik Larsson te a sawm lut tawh a, Roca hi a thlem ve leh ta a ni.
 
“Barcelona atang hian sawmna chu a dawng ngei a, mahse thu chiang zawk kan nghak mek. Inbiakna a kal tan chauh a ni. Roca tan chuan Barcelona a kal hi thil chakawm tak a ni ngei ang a, mahse kan club hian kan hmalam hun kan thlir ve a ngai si a, amahah hian kan innghat thui em em a ni,” tiin Hyderabad FC official pakhat chuan a sawi.
 
Roca hi Barcelona – ah Frank Rijkaard – a assistant thin niin Nou Camp an chhuahsan hnuah Galatasary leh Saudi Arabia tan an thawk dun leh a ni.
 
Bengaluru FC pawh lo enkawl tawh Roca hian Hyderabad hi kumin kum tir khan enkawl tanin kum 2022 thleng daih contract a nei.