BARCELONA TAN MESSI BAWK

Osasuna 0-3 Barcelona FT
Bar: Suárez 59′, Messi 72’, 90’+2

Zanin La Liga match-ah Barcelona chuan Lionel Messi goal 2 leh Suarez-a goal khat thun hmangin table mawngphaha awm Osasuna chu si 3 faiin an hneh a, league leader Real Madrid nena an inkar an tizim ta hlek.

Catalan club hian inkhel thunun viau mahse first half-ah thil ropui an ti thei lo va, Luis Suarez-a’n goal post a pet per chu an goal thun teuh ber a ni.

Chawlhlawk hnuah game 15 an khelh hnua point 7 chiah hmu Osasuna tan forward Sergio Leon chip chu goal chung kham chungah a kal hlauh a, hemi hnu hian Barca tan Suarez chuan lei hrula Jordi Alba cross ball chu goal-ah a chantir.

Left-back Alba bawk rawn tangkai lehin Barca nena a hming inzawm tlat tawh Messi chuan a sir kilah a thawlh lut ve leh. Hun pek belhah Argentina forward hian ama thawhchhuah liau liau goal ropui thuin La Liga title an beiseina a rawn chhem vam leh ta a ni.

Zanin veka Real Madrid in Deportivo La Coruna an hneh a nih erawh chuan an inthlauhna hi point 6 a ni leh ang.

Barca hian tunhnaiah result tha an hlawhchhuak hlei thei lo va, team tha lem lo a ngaih Malaga leh Real Sociedad te laka point an hloh hnuah Real Madrid an hmachhawn tumin hun tawp dawn a ruaiah goal an chhuah. Kaiharhtu an mamawh lai takin skipper Andres Iniesta a rawn dam a, ani kaihhruaina hnuaiah 80% ball an chang leh thei ta!

Spanish midfielder ropui zanah a hmatawnga awm Messi leh Suarez te erawhin an hun tha an khawral tam a, goal 3 aia tam thun thei an ni. Heti hian Messi chuan league-a goal 10 thuntu C.Ronaldo leh Suarez te lehpelin goal 11 a thun ta a, tun season-ah a vaiin goal 22 a thun tling ta bawk.

Tin, Messi Atletico Madrid, Real Madrid, Valencia, Sevilla leh Osasuna lamah goal 20 aia tam a thun tling ta vek a, Osasuna phei chu ngam zualin a hmachhawn hnuhnung 9 atangin goal 16 lawih a thun!