Wigan Athletic manager Roberto Martinez leh Everton striker Nikica Jelavc te chu April thla chhunga Premier League manager ṭha ber leh player ṭha berah thlan an ni.

Giant killer Wigan

Wigan Athletic hi April thla chhungin an che ṭha hle a, game harsa tak tak panga hmachhawnin heng zinga pathumah hnehna an chang a, relegation zone an chhuahsan tawh bawk a ni. An game hmasa berah Chelsea lakah 1-2 in an chak lo a, hemi hnu hian a zawnin Manchester United (1-0) leh Arsenal (2-1) an hneh thung. Fulham lakah chak lo mahse tunhnaia che ṭha tak Newcastle United chu 4-0 ngawtin an sawp a, an dinhmun hi la him chiah lo mahse Premier League-ah an inhamtan ngei a rinawm tawh a ni.

He award hi kum 2009 a Wigan a zawm hnua Roberto Martinez-a’n Manager of the Month award a dawn hmasak ber a ni nghe nghe.

Jelavic: Game 3 ah goal pawimawh 6

Croatian striker, January transfer season-a Everton zawmtu Nikica Jelavic chu April thla chhunga Premier League player che ṭha nihna hlan a ni. Hei hi Jelavic-a’n Barclays Player of the month award a dawn vawikhatna a ni nghe nghe.

Kum 26 a upa Jelavic hian April thlaah Premier League game 3 a khel a, heng match pathumah hian goal a thun vek. Norwich City nen an indraw (2-2) ṭumin goal 2 a thun a, Manchester United (4-4) lakah goal pawimawh 2 a thun leh a, Fulham (4-0) an sawp ṭumin goal 2 bawk a thun leh a ni.

“Barclays Player of the Month award ka dawng thei hi ka lawm em em a. Everton ka zawmtirh aṭangin he hmuna awmten min pui nasain ka chungah an ṭha em em a. Fans te min ṭanna leh puihna ka chhanglet thei hi ka lawmna tizualtu a ni. He award hian kan khelhṭhat zia a tilang a, chance kan siam hnem a, keini centre forward tân chuan hei hi a pawimawh em em a ni. Season tâwp kan khar ṭha em em a, game 2 la awmah pawh hian hnehna chan ngei kan inbeisei a ni.” tiin Jelavic chuan a sawi.

source: premierleague.com