Bayern Munich chuan Zirtawpni zan khan Mainz chu khualmualah 3-1 in an hneh a, Polish striker Robert Lewandowski-a’n goal hnih khungin Dutch winger Arjen Robben-a’n goal khat a khung bawk.
Carlo Ancelotti kaihhruai Bayern hian match 13 khelhah point 30 hmuin Bundesliga hmahruaitu an ni a. Amaherawhchu RB Leipzig-in match khata khel tlem chunga champion lai point zat ang tho an hmuh avangin Pathianni a thlen meuh chuan pahnihnaa tlahniam leh thei an ni.
Coface Arena-ah mualneitu Mainz-in Jhon Cordoba goal hmangin minute lina lekah an khung nghal a, an lawm hunchhung erawh a rei lo. Minute riatnaah Robben-a siamsak chu Lewandowski-a’n goal-ah a chantir a, Dutch winger Robben hian Thomas Muller-a freekick chu minute 21-naah a khung leh bawk.
Bayern-in hun tam zawkah 2-1 in hma an hruai a, injury time-ah Lewandowski-a’n chak nemnghehna goal a khung. Polish striker goal hmasa zawk siam saktu Robben atan Mainz an hmachhawn tum hi Bundesliga match 150-na a ni a, Dutch winger tan zan duhawm a ni.
Robben siamsaktu Muller erawhin tun hnaiah goal khung a harsat hle. 2014 World Cup-a Germany champion puitu Robben hian 1-1 a nih laiin chance tha tak a hlah a, darkar 15 chhung league-ah goal a khung tawh lo.
Zanin dar 11:00 hian RB Leipzig-in an mual Red Bull Arena Leipzig-ah Schalke 04 an mikhual ang.
+ There are no comments
Add yours