BAZAR THULH LO SAIPUI PAHNIH

Kolkata club lian pahnih Kingfisher East Bengal leh Mohun Bagan te’n an banphak a awm player tha an lalut chhunzawm zel. Bagan hian nimin lamah player thar pariat (8) zet an lalut tawh a, Rana Gharami leh Uttam Rai te an lakluh belh. East Bengal in an thenawmte tihdan thik ni awm takin Arup Debnath leh Godwin Franco an lalut ve bawk.

Mariners lakluh Gharami hi Mohammedan captain thin niin kumin Santosh Trophy champion team West Bengal captain a ni a, kum 25 a upa niin defence leh midfield-a chhawr kawp theih a ni. Ani hi FPAI XI Aizawla lo zin zingah khan a tel nghe nghe.

Sikkimese striker Uttam Rai hi tunhma deuha Indian footballer talent nei tha ber ang hiala sawi thin kha a ni a, India ram aiin saprama club hrang hrang Academy-ah a tal tam zawk emaw tih tur a ni. India ramah Dempo, Chennaiyin FC leh Minerva Punjab tan a khel tawh a, inhliam vangin buai fo thin mahse kum 21 chauh a la ni a, hmabak a la nei eng hle a ngaih a ni.

Goalkeeper tha tlakchham vanga buai fo thin East Bengal in kum 30 a upa Arup Debnath an lalut a, ani hi feet 6 leh inchi 3 a sang niin tawnhriat ngah tawh tak a ni. Tun hma in East Bengal tan pawh hian a lo khel tawh thin a, Air India, Kenkre FC, Mumbai Tigers, Pune FC leh Neroca FC tan a khel tawh bawk.

Indian footballer zinga nomawi chawi hnem ber pawl Godwin Franco hi Kristian tlangval a ni a, kum 32 a upa a ni. India rama nomawi ngaihhlut I-League, Federation Cup leh Indian Super League te a chawi tawh a, midfielder tawnhriat ngah tak niin India senior team tan pawh a inlan tawh a ni.