Marseille winger Andre “Dede” Ayew chu BBC African Footballer of the Year ah thlan a ni. Ghana international player, kum 21 a upa Ayew hian Yaya Toure, Gervinho, Samuel Eto’0 leh Seydou Keita te a khûm a ni.

African Footballer of the Year dawng thei tur ‘shortlist’ hi Africa ram hrang hranga football expert ten an thlangchhuak phawt a. Player te mimal anga an khelh ṭhat piah lamah team tân an thawhrimna te, field chhunga an nungchang mawi leh mawi lohte an en tel vek ṭhin. Expert ten an thlanchhuah hnuah football fans ten an duh ber an lo vote ṭhin a ni.

Award dawn phû Andre Ayew

Andre Ayew hi kum 2010 African Cup of Nations (ACN) leh FIFA World Cup aṭangin khawvelin a hmelhriat ṭan a, hemi hnu hian club lamah khel ropui chhunzawmin, tunah chuan Marseille player pawimawh ber pakhat a ni tawh. Season bulṭanna, French Super League-ah hattrick siamin Marseille a champion pui a, Ligue 1 bikah game 16 khel tawhin goal 6 a thun tawh a ni. Marseille in Champions League knock-out round an thlen theihna tura thawhhlawk ber pawl a ni bawk.

International level-ah pawh a che ṭha a, Ghana in 2012 African Cup of Nations an qualify na kawngah player pawimawh tak a ni.

Ayew chhungkua hian football an thiam ve hrim hrim a tih theih awm e. Andre Ayew pa(father), Abedi ‘Pele’ Ayew hian kum 1991 ( BBC African Sports Star of the Year award a nih lai) khan he award hi a lo dawng tawh a. Tin, a unaupa chu 2012 ACN khel tura koh a ni bawk.

Footballer of the Year thukhawchâng

Football fans ten kum 2011 chhunga African player ṭha bera an thlan chuan lawmthu sawiin, “He award hlu tak ka dawng thei hi ka lawm a, ka hmalama lo dawng tawhte ngaihtuah phei chuan a ropui lehzual a, mak pawh ka ti zawk hial a ni. Ghana mipuite, African mipuite leh khawvel hmun hrang hranga min vote tute chungah lawmthu ka sawi a, an thutlukna hi a dik a ni tih lantir turin rim takin ka thawk ang.” tiin, hmasawn zel a tum thu a sawi a ni.

BBC African Footballer of the Year award dawng tawhte hi tarlang ila:

2010 – Asamoah Gyan (Sunderland & Ghana)

2009 – Didier Drogba (Chelsea & Ivory Coast)

2008 – Mohamed Aboutrika (Al Ahly & Egypt)

2007 – Emmanuel Adebayor (Arsenal & Togo)

2006 – Michael Essien (Chelsea & Ghana)

2005 – Mohamed Barakat (Al Ahly & Egypt)

2004 – Jay Jay Okocha (Bolton & Nigeria)

2003 – Jay Jay Okocha (Bolton & Nigeria)

2002 – El Hadji Diouf (Liverpool & Senegal)

2001 – Sammy Kuffour (Bayern Munich & Ghana)

2000 – Patrick Mboma (Parma & Cameroon)

source: bbc.co.uk