Belgium : Golden Generation an ni meuh em ?

Football – ah emaw, infiamna dangah pawh ‘golden generation’ tih tawngkam hi kan hmang fo a, saptawng thumal ni mahse mahni tawng ang maia a awmzia kan hriat a ni. Nizan khan Belgium chuan Euro 2020 Quarter-finals ah Italy hneh lo in an tla a, an senior player engemawzatin international football an chawlhsan rin a ni.

Football thiam ram hrang hrang te hian kum inrualkhat, player tha ngah deuh lai hi an nei vek a, chu chu ‘golden generation’ an ti mai thin. Tun hnaia sawi theih lar tak chu kum 2001-2008 chhung vela England golden generation an tih mai te kha an ni a, nomawi lian chawi erawh an nei lo. A dang leh chu kum 2008-2014 vel chhunga international football thununtu Spain team kha an ni. Anni erawh Euro 2008 leh 2012 – ah champion in 2010 World Cup nomawi an chawi bawk a, an hun chhung hian FIFA Rankings – ah pawh an chungnung hle. Heng ram pahnih te bakah hian Czech Republic, Croatia, Italy, France, Ivory Coast leh Portugal te pawhin ‘golden generation’ an tih mai hi an lo nei tawh thin a, ram dang pawh an awm ang.

Kum 2002 FIFA World Cup round of 16 atanga an tlak hnuah Belgium hian Euro 2004, Euro 2008, Euro 2012 bakah 2006 World Cup leh 2010 World Cup an khel pha lo a, a zawnin vawi 5 zet major tournament an khel pha lo tihna a ni. An golden generation an tih mai hi kum 2014 vel atanga intan a ngaih a ni a, tunah erawh an hun a liam mek niin a lang.

2014 FIFA World Cup – ah khan captain Vincent Kompany ho in tuna an player pawimawh Kevin de Bruyne, Thibaut Courtois, Thomas Vermaelen, Toby Alderweireld, Jan Vertoghen, Axel Witsel, Eden Hazard, Dries Mertens, Romelu Lukaku leh Nacer Chadli te bakah Marouanne Fellaini, Mousa Dembele leh Daniel van Buyten te nei chungin Quarter-finals an thleng a, finalist Argentina 1-0 in an hneh lo.

Euro 2016 – ah an player tam zawk ko lehin World Cup – a tel lo Radja Nainggolan, Yannick Carrasco, Thomas Meunier, Christian Benteke leh Michy Batshuayi te an neih belh a, QF – ah mak tak maiin Wales 3-1 in an hneh lo.

Beiseina sang tak nen 2018 World Cup khel turin Russia an pan a, tun tum chu ‘Belgium golden generation’ hun a ni ve tawh tih kha mi tam tak ngaihdan a ni. An rawlthar rual te an puitling tan a, squad rualkhai tak neiin an player upa ber pawh an defender chhuanvawr Thomas Vermaelen (32) a ni. Senior player thenkhat chawl tawh mahse ram tan a la khel tam lo Thorgan Hazard leh Youri Tielemans an nei thung. Group stage – ah England hial hnehin Round of 16 – ah Japan an hneh bawk a, QF – ah rinkai Brazil an hneh hnu phei chuan beisei a sang hman hle. Amaherawhchu semi-finals ah champion zui ta France chu 1-0 lekin an hneh lo a, pathumna nih inchuh inkhelah England 2-0 a hnehin pathumnaah an lungawi a tul.

Euro 2020 – a an squad kan en chuan an defender chhawr rim te an lo upa ta hle a, Thomas Vermaelen (35), Jan Vertonghen (34) leh Toby Alderweireld (32) te hi uaithla lam vek an ni tawh a, an hmaa mihuai kal ta te angin international football an chawlhsan mai a rinawm ta bawk. Anni pathumin ram tan a an khelh zat belhkhawm hi vawi 327 zet a tling !

Midfield – ah ram tan a vawi 113 khel tawh Dortmund midfielder Axel Witsel hi kum 32 a ni tawh a, forward – a hming langsar Dries Mertens (101 caps) pawh kum 34 a ni ta. An captain Eden Hazard hi kum 30 a ni mek a, nakkum World Cup a la khelh rinawm mahse Euro lehpekah chuan kum 34 mi a ni tawh ang. Chutiang bawkin an keeper chhuanvawr Thibaut Courtois pawhin kum 29 – na a hmang mek a, an team pumpui innghahna Kevin de Bruyne hi kum 30 a upa a ni bawk.

FIFA World Rankings – a ni 1000 chuang No.1 ni thei Belgium team pumpui han en hian inthuahfai an mamawh ta deuh niin a lang a, an senior player thenkhat an chawlh avangin an chhe ta duai tihna erawh a ni lo ang. Football – ah hian engmah sawi lawk theih ni lo mahse Belgium team hian an that vanglai ber chu an hmang liam mek niin a ngaih theih a, team thar din turin hun an mamawh hret ang.