Zanin zanlai pelh dar 12:30 hian Munich khawpuia Allianz Arena – ah Euro 2020 champion tur a rinkai pahnih Belgium leh Italy te chungnung zawk nih inchuhin an inbei dawn. Robert Mancini enkawl Italy player – te an dam kim a, Belgium manager Roberto Martinez a’n a captain Eden Hazard leh thiampuipa Kevin de Bruyne te chu Munich – ah hruai tel mahse a chhawr thei dawn em tih he thu buatsaih lai thleng hian a la chiang lo.
Belgium hi major tournament hnuhnung ber 2018 FIFA World Cup – a pathumna an ni a, an squad danglamna pawh a la tam lo. European Championship – ah hian kum 1980 khan final an lut a, a hma deuh 1972 khan pathumna an ni tawh bawk. Euro 2016 khan quarter-finals ah Wales an hneh lo.
Tun tumah hian group stage – ah an khingpuite hneh vekin round of 16 – ah champion lai Portugal an hneh bawk a, an inringtawk khawp ang. Mahse, “mahse” tih a ngai tlat, an captain Eden Hazard leh an thiampuipa Kevin de Bruyne te inhliam avangin an la buai mek a, player pahnihte tel lo hian la tha tawk viau mahse an hriam lo sawt dawn. Tlarhnungah siban nghaktu Thibaut Courtois bakah an defender tawnhriat ngah te an pawimawh dawn a, Italy lak a chak tur chuan tlarhmaa khel tur Romelu Lukaku-a’n innghahna tlak a nihzia a lantir a tul bawk ang.
Italy hi 2018 World Cup an khelh phak loh hnua ‘team indin thar’ an ni a, Euro – ah hian kum 1968 khan champion tawhin Euro 2000 leh Euro 2012 – ah pahnihna an ni bawk. An khingpui tur Belgium ang bawkin group stage – ah hneh loh an nei lo a, round of 16 – ah erawh Austria hneh turin extra-time an mamawh.
Tun tumah hian an captain Giorgio Chiellini ho in team inkhairual tak an ni a, player thawm nei lian tak kawl lo mahse champion tur a rinkai an ni. Tlarhnungah Leonardo Bonucci rintlakzia kan hria a, Marco Verratti, Nicolo Barella, Lorenzo Insigne, Federico Chiesa leh Ciro Immobile te hi team chak pui thei vek khawp a thiam an ni a, a tawp tak takah erawh an manager Roberto Mancini ‘thluak’ hi an innghahna tur a nih a rinawm.
