BEN YEDDER NGAM LOVIN MANCHESTER UNITED AN TLA – Lawmkima Hmar

Nizan zanlai pelah UEFA Champions League Round of 16, second leg khelhah Manchester United chu an mual hman thiam Old Traffpord-ah Sevill in an tukzal.

Spanish La Liga-a 5-na hauh mektu Sevilla tan substitute Wissam Ben Yedder chuan mual chhung a luh atanga minute 2-na leh minute 6-naah te goal thunin a team te hnehna a chanpui.

First leg-a goal awm lova inhnehtawkte inkhelah hian United in gaem ropui an khel lo va, Marouane Fellaini goal thun tur chu Sergio Rico chuan dansakin lei hrula Jesse Lingard-a pet tha tak chu a teuhvin a ral bawk.

First half-a goal a luh loh hnu second half tawp lam minute 72-naah Sevilla coach Vincenzo Montella chuan Luis Muriel la chhuakin Ben Yedder a luhtir a, ava tih fuh rem rem em. French forward hian a luh atanga minute hnihnaah chep tak kara Ever Benega ball pek chu Eric Bailly a bum hnuah a lirin David De Gea veilam kilah a thun phawt.

Goal khatna a luh atanga minute 4-naah Joaquin Correa corner pet chu far post-a lo changin a lo tauh goal leh a, goal hnihna luh danah erawh United si ban rinawm De Gea a dem theih ang.

Hun tawp dawn a ruaiah Marcos Rashford-a corner pet khup chen vela mi chu Belgium forward Romelu Lukaku chuan hlap goal in zangnadawmna goal a thun a, quarter-final lut tura goal hnih la mamawh United in nawr chiam tum mahse Jose Mourinho dawihzep man telin an bu zawlah a tlawm zawka an ta a ngai ta a ni.

Manager dawihzep? :
United hian season liam ta Europa League-a an champion avangin Champions League khelin Europe club thate zinga vawk lal len tur khawp chuan an la tha lo a ni tih a lang a, Manchester City leh Liverpool ten quarter-final an luh laiin Tottenham hnung zuiin Champions League an mangtha a, Barcelona la hmachhawn tur Chelsea in khawi kawng nge an zawh ang tih a la hriat loh bawk.

A game dawihzep avanga sawisel hlawh United Manager Jose Mourinho chu a dan pangngaiin anmahni tantuten nawr turin an au leh nasa hle a, mahse, Red Devils supporter te “attack, attack, attack” tia au rawl chuan Portugues coach lakah awmzia a nei lo.

Vawi hnih an intawn tumah te hian club lian leh ropui zawk, player nei tha zawk hian goal venhim an thupui a, a palian zawk a duap zawkah an tan phah ta ni berin a lang.

November 2018 hnu lama a vawikhat na’n bul tan midfielder Fellaini chu a tuan a fum hle a, Liverpool an hneh tuma che bon tak Marcus Rashford chu dinglam sir atanga nawru atan daih niin lehlam tan sahar a tling pha lo.

Mourinho hian kumin January thlaa a lak luh, a thatzia hai rual loh Alexis Sanchez hman dan a la hre fuh tawk lo va, chak duhna thinlung nei, a nawr thupuia nei thin Chile forward hian a hlawh phu tawkin a khel chhuak pha lo.

Tun tum hi Porto leh Inter Milan te Champions League-a vawikhta ve ve lo champion pui tawhtu Mourinho tan Champions League Round of 16-a season 12 chhunga a team te a tlakpui vawi lina chiah a ni a, bul an tan that ang hu-a a tawp an khar that loh an tuar ta a ni.

Midfield thununtu Sevilla:
Sevilla hian England leilungah hnehna an chang khat a, Champions League khela vawi 4 an fehchhuah tawhah khan vawi khat tlawmin vawi draw result an nei a, nizanah erawh hnehna hla do chham chungin an haw.

United nena vawi hnih an inhmachhawn tumahte hian AC Milan duh loh Vincenzo Montella naute hi a chungnung zawk niin chak phu zawkin hnehna an chang.

Montella chuan, “Kan che pui tak zet a ni, kan player te khan nun thapin an khel emaw tih hial tur a ni. First half-ah khan goal thunna remchang kan insiam thei lo va, United pawh hun remchang kan pe bik lo. Mahse, a pawimawh lai takah kan che tha a, hnehna kan chang ta a ni,” a ti.

Substitution bench atanga lut Ben Yedder chu fak loh theih loh niin mual chhunga a awm reilote chhung hian hat-trick siam thei dinhmunah dingin a goal thumna tura ngaih chu David de Gea zawn takah a pet hlauh.

Sevilla central midfielder Steven N’Zonzi leh Ever Banega te an thawkdun tha a, mual lai thununtu niin Fellaini, Nemanja Matic leh Paul Pogba te engmah lova siamtu an ni.

Blackburn leh Stoke City midfielder hlui, Premier League-a let tur anga sawi fo N’Zonzi hian vawi 94 zet ball pass in nizana ball pass tam ber a ni a, a khingpui Banega khan an lama ball kal vawi 13 zet a lo chhuhsak bawk a ni.

Chhinchhiah atan :
*Kum 2011 finla chhiar telin United hian Champions League knockout match an khelh hnuhnung 9-ah vawi khat chiah hnehna an la chang (D3, L5)

*Tun tum hi tun season Champions League-a La Liga club in Premier League club an hneh hmask ber niin vawi 8 an inhmachhawnah EPL club ten vawi hnih hnehna changin vawi 6 erawh chak zawk awm lovin an inthathen.

*Sevilla hi Mourinho enkawl United lama Old Trafford-a goal hnih thun tling thei club pathumna niin anni bakah hian Manchester City leh Burnley ten goal hnih an thun tling ve ve.

*Sevilla khan goal shot 21 zet neiin Old Trafford-a kum 2013 hnu lama goal shot ngah ber an ni (Marc 2013 khan Real Madrid chuan he hmunah hian goal shot vawi 22 an lo nei tawh a ni).

* Wissam Ben Yedder-a goal khatna kha tun season Champions League-a substitute player in goal a thun ran ber niin muala second 87 a awm hnuah a thun.

Posted in Analysis, Rampawn.

Leave a Reply

Or