Ewood Park ah Liverpool chuan mualneitu Blackburn Rovers chu 3-2 in an hneh hram. Liverpool tan hian Maxi Rodriguez chuan goal 2 thun in injury time ah Andy Carroll chuan chakna goal a thun bawk a ni. Tin, Rovers tan hian Yakubu chuan goal 2 thun in penalty vawi khat a thelh bawk a ni.

1st half : goal 3 leh Red Card
Mikhual Liverpool in game an thunun nghal a. 13th mins ah Skrtel chuan defence line atangin ball tha zet a vawrhlut a, heihi Bellamy chuan chak zet maiin a tlanluhpui a, a lir in Maxi tan a siam sak a, heihi Maxi chuan chiang zetin hnai set sawt atangin goal ah a thun ta a ni. Liverpool fans thawm a tha hle a, he an thawm belhchhah tur hian a hnu 16th mins ah Maxi bawk chuan goal a rawn thun leh a, Dalglish a nui sang reng tawh mai.  24th mins a nih chuan Liverpool defender Jon Flanagan chuan chhe zet in a back pass a, heihi Blackburn striker David Hoilett chuan ava nangching a, mahse Liverpool keeper Doni chuan Hoilett hi alo bawh tlu a, referee chuan red card leh penalty a pe a, Liverpool fans ho an ngawi thup mai!! Dalglish chuan Jon Flanagan chu lachhuakin 3rd keeper Jones a luhtir a, Jones hian Yakubu penalty pet chu a save nghe nghe a ni. Kimlo Liverpool game a dul deuh emaw chu aw tih theih turin mualneitu lamin an attack huai ta hle a. 36th mins ah Yakubu chuan free kick atanga ball lo kal chu chiang zetin a tauh lut a, 1-2 in first half an tin.

2nd half ah Liverpool an talbuai deuh a, Blackburn in kimlo an nih hre ranin an nawr huai tawh hle a, 61st mins ah Keeper Jones chuan ama tihsual rah telin penalty box chhungah Yakubu a titlu a, referee chuan yellow card leh penalty a pe leh!! Hetah hian Referee hian a duh chuan red card pawh pe thei a ni a (fans ho pawn red card a phawrh leh an ring ngei ang) mahse yellow card chauh a pe ta a ni. Yakubu bawkin penalty chu pet leh in, tun tum chu a pet goal chiang ta kher mai!! 2-2 a ni a, Ewood Park ah boruak a tang tha at at khop mai. point 1 ve ve in an insem dawn tawh emaw tih laiin Striker manto goal thun theilo, Andy Carroll chuan 90+1 ah defender Daniel Agger tauh pial chu a sanna chhawr tangkaiin mawi zet in a tauh lut a, Liverpool fans manganga rum ten thawm an nei tha kher mai. Camera chuan Dalglish-a a rawn focus nghal a, ani pawh a lawm kher mai. Hun a tawp zui a, Liverpool chuan hun rei tak anlo hmelhriat tawhloh ‘Hnehna duhawm’ an chang leh ta a ni.

Thubelh : Liverpool hian hnehna chang mahse an lawmna hi a famkim theiin a rinawm chuang loh. Reina a khelh theihloh avangin Doni hman a ni a, ani’n Red Card a hmuh leh tak siah chuan 3rd keeper Jones chauh a bang ta a, a ni hian an hmelma hlun Everton nen FA Cup semi-final a an inkhelh hunah a veng dawn niin a lang ta a, nizan a a khel han en mai chuan duhthu a sam lo khop mai.  Tin, Blackburn lam pawh hi an ngaihtuahawm ta khop mai. Match a tlem tawh hle a, an game tin a pawimawh tawh dawn a ni. Yakubu a mimal tak pawh in a fakawm thlawt a, mahse Blackburn defence line hi thawmthat a nih loh chuan relegation zone hi an chhuahsan kher in a rinawm loh. Thil dang chu comment ah kan sawi zui mai dawn nia.