Reebok Stadium-a inkhel hmuhnawm takah Manchester City chuan 3-2 in Bolton Wanderers an hneh a, Premier League ah hma an hruai. He inkhel ah hian team pahnih in goal an inthun chhawk zak zak a, mikhual tan Silva, Barry leh Dzeko ten thunin mual neitu tán Klasnic leh Kevin Davies ten an thun a ni.

Tute nge khel

Bolton: Jaaskelainen; Steinsson, Cahill, Zat Knight, Paul Robinson ;Eagles,Reo-Coker, Muamba, Petrov;Klasnic, Davies

ManCity: Hart; Richards, Kompany, Lescott, Kolarov; Milner, Barry, Y Toure; Silva; Dzeko, Aguero

Reebok Stadium a bengchheng

Bolton Wanderers home Reebok Stadium hi Premier League stadium zinga bengchheng lo ber tih a ni ṭhin. Club lian deuhin an rawn tlawh ṭum a nih loh phei chuan seat ruak a tam a, a reh deuh rup ṭhin a ni. He stadium-ah hian Pathianni zanah Manchester City an lenglut a, tunhnaia Reebok Stadium bengchhen ber ṭum a ni hial maithei. He match atan hian a hranpa ngatin khuangvawtu an awm a, a khuang vuak milin Bolton fans an zai dual dual mai. Field pâwnah fans te an inring a, field chhungah player te an inkhel ta.

First half ah goal ‘nalh’ pathum

A tir aṭangin an innawr nghal deuh pawp pawp a, Bolton in Eagles leh Knight te hmangin chance an nei. Minute 18 na ah dinglam sir aṭanga Dzeko cross chu a goal ngei dawn a a lan hnuah Aguero chuan a thun lo a, goal aṭanga feet 6 vel aṭangin a pet over!! Hemi hnu lawk, minute 26 ah David Silva chuan City tan a thun a, penalty box pawn hret aṭanga a pêt chu Jaaskelainen chuan ho angreng takin a chhuah. Silva shot hi keeper hma chiah ah a sawt a, khatiang kha keeper tan man a har duh hle a, Bolton keeper pawh dem lutuk theih a ni bik lo.

Mual neitu lamin goal hlauhawm an nei ve thei meuh lo a, minute 38 ah City bawkin an thun leh. Gareth Barry chuan penalty box pawn aṭang bawkin nalh zet maiin a thun a, open play aṭanga pet goal ngai mang lo Barry tan he goal hi a chhinchhiahtlak khawp ang. City fans te authawm pawh a la reh hman lo tih ah Bolton lamin an rawn thun ve nghal a, veilam sir aṭanga Petrov cross chu hnai set sawt aṭangin Klasnic chuan a lo thun a, 2-1 in first half a tâwp.

Second half ah a goal nghal e

Second half an ṭan chiah a, Man City tan Dzeko chuan min 46 na ah a pet goal nghal. He goal ah hian Bolton defender Zat Knight positioning chhiat zia kan hmu. Hemi hnu hian City lamin game an thunun chhunzawm a, City fans ho ‘EASY’ tiin an au dual dual mai.

Mahse minute 60 ah Mark Davies chuan Patrice Muamba a rawn thlak a, game a danglam ta.  Minute 62 na-ah freekick aṭangin Kevin Davies chuan a head goal a, hei hi Manchester City lama a tih goal hmasa ber a ni nghe nghe. First half a lang mang lo Bolton midfield in ball an chang tam ṭan a, inkhel an thunun zawk a, City in Tevez rawn luhtir mahse awmzia a nei hleithei lo. Mahse a tawp thlengin goal a luhbelh lo a, mikhual lamin hnehna an chang ta zawk a ni.

Inkhel bihchianna

A bik takin first half ah City game a dik a, an formation hman in Bolton a tibuai. Striker hnunga ‘free role’ an pek David Silva a langsar nghal a, ball a chan in Dzeko leh Aguero te a sirah chhuakin a lai hmunruakah Milner te an rawn lut thla ṭhin a, Bolton defence an ṭhiat nalh thei ngei mai. Chelsea ang deuhin winger ‘dik tak’ han tih tur an nei vak lo a, (Adam Johnson chu awm mahse) ‘width’ pe turin wing back an hmang nasa. Midfield-a Yaya Toure leh Barry inkawp hi an muang hret a, club lian zawk an khelh hunah an ṭha tawk lo maithei.

Season hmasaa Manchester City leh Roberto Mancini an sawiselna ber chu an ‘dawih’ lutuk tih a ni. A bik takin away game ah goal thun aiin goal venhim an ngaipawimawh ṭhin a, an hneh ngei tura ngaih pawh an draw leh khut ṭhin. Tun season ah erawh City in attacking game an khel tawh a, an hmatâwngte an inman bawk a, game 2 ah goal 7 an thun der tawh mai.

Bolton lamin 4-4-2 an rawn thawhchhuahpui a, City defender te pawt kâk viau ṭhin mahse an winger te an tlanchak tawk lo a, City defender te an tlanpel hleithei tlat lo. Quality ngau ngau ah City tluk lo deuh mahse an thawkrim a, midfielder Reo Coker hi an player pawimawh tak a nih chhoh ngei a rinawm. Gary Cahill hi Arsenal leh club dang dangin lei an tum mek a ni a, ani hi a chhuak a nih chuan Bolton defence a ngaihtuahawm viau ang le.

ZoFooty man of the match

City goal thumna thuntu Edin Dzeko kha Manchester City a luh hnua a khelh ṭha ber ṭum a ni awm e. City tlarhmaah Silva leh Aguero nen an inkawpfuh hle a, a tlan tam a, Aguero finishing ṭha deuh phei se chu assist a nei nual ang.  David Silva pawh a khel ṭha viau a, mahse Dzeko tharum leh tlanchakna kha City ralthuam pawimawh ber a ni a tih theih awm e.

Inkhel dang

Kai thar Norwich City in point khat an hmuh belh leh a, mikhual Stoke City nen 1-1 in an inhnehtawk. He match ah hian Norwich tan Richard de Laet chuan minute 37 ah a head goal a, hei hi injury time ah Kenwyne Jones chuan a rawn sut a ni.

Wolves in bul an ṭan ṭha zel a, Kevin Doyle leh Matt Jarvis te goal hmangin mikhual Fulham 2-0 in an hneh. Wolves hian game 2 ah point 6 hmu tawhin pahnihna an ni mek.