Khawvelah hian mi pangngai chunga leng mi bik an awm a, chung mi bik te zingah chuan mi bik lehzual tlemte an awm leh a. Chung mi bik lehzual te zingah chuan mi te lawm hlawh leh mi thenkhat ngei rawn ni tel bawk, Football Coach anihna anga a ropuina chhuahchhal rual si loh, José Mourinho hi a awm ngei ang le.

José Mário dos Santos Félix Mourinho

Kum 1963, January ni 26 ah José Mário dos Santos Félix Mourinho tih hming sei tak pu in, Setubal, Portugal ah a lo piang a. A pa Félix Mourinho hi professional footballer leh Coach niin, Portugal National team ah te pawh a lo khel ve tawh ani. A nu Maria Júlia Carrajola dos Santos erawh Primary School teacher ani a. A tet te atangin a pa hnungzuiin inkhel a ngaina hle a. Mahse a tlanchak tawkloh avang leh a hlawhtlinna tur nia a ngaih loh avangin a lo len deuh hnuin coaching lama kal a tum ta zawk ani.

Bussiness aiah Football

A khelh lamah tlangnel lo mahse coaching leh managing lamah a tui hle a, a tleirawl lai atang reng hian midang aiin hmabak a nei eng hle tih hai rual anilo. A Nu in Bussiness school lamah luh tir tum mahse a ni khatna ah a bang nghal a, a tuina zawk zir turin (ISEF), Technical University of Lisbon-ah a lut ta zawk a. Heta tang hian tha takin Sports Science ah Degree a nei ta ani.

Tawnglettu Mourinho

Kum 1990 leh 1992 inkar velah Asst. Manager leh Youth Team Coach velah te tang kual a. Heng hunlai atang hian coaching lama a hmathlir leh a idea  te a rawn duang chhuak tan a. Tichuan 1992 chuan a vanneiha siamin Sporting Club de Portugal ah Sir. Bobby Robson a hnuaiah tawnglettu angin a thawk thei ta hlauh mai. He English Coach pachal hnuaiah hian coaching hna tak chu thawk lo mahse, coaching chinchang leh kalhmang tak tak a zir theih phah ta zawk ani. Robson a nen hian an in kawp chho fuh hle a, Club lian zawk Porto leh Barcelona ah te an inzui ta zel ani. Robsona’n Barca a chhuahsan hnu pawhin ani chu cham zuiin Dutch Coach Lousi van Gaal a Asst. Coach ah a tang ta zel a. Heta tang hi chuan a managing career a in tan chho tak tak ta ani.

Benfica leh Leria

Mi duhthawh, ambitious tak mai anih angin a aim in life Football manager dik tak nihna chance chu kum 2000 ah a lo inherchhuak ta a. Portugese team tha Benfica chuan an Coach atan ruaiin a chetthat pui nghal hle a. Match kua ah vawi nga chak puiin, vawi hnih ve ve draw leh lose a neihpui a. Amaherawhchu che tha hle mahse Club President thar chuan Coach dang rawih a duh tak tlat avangin  kum 2001 ah União de Leiria a zawm leh ta ani. Anni pawh hi League table a an la thlen san ber pangana a nihpui leh ta zel ani.

Porto Magic

January 2002 ah chuan Portugese team tha ve tak lo ni reng thin Porto chuan an Coach atan an ruai leh ta a. Hetih lai hian Porto dinhmun hi a tha lo hle a, mahse match sawmpanga ah match sawmpakhat chak pui nghalin, League-ah pathumna anih pui thei ta tho ani. A duhdan takin Porto team chu a han siksawi kual ta a, a full season hmasa ber ah chuan competition pathumah a champion pui nghal thei ta mai a. A season dawt lehah pawh Premier Liga (Portugese League) ah a zawnin a champion pui leh a, mahse chu aia ropui zawk chu Europe a football inelna sang ber Champions League a a champion pui ta chu ani. Club tha ve pangngai Porto chu Europe-a a Club tha ber pawlah a chhuah ta ani. Season hnih chhung leka heti taka a chetthat tak avang hian Europe Club lian te chuan an ngaihven lehzual lo thei ta lo ani.

Chelsea 

Hetih hunlai vel hi British club Chelsea rawn intuaithar chhoh hunlai a lo ni ve mek bawk a. Club neitupa, billionaire Roman Abramovich a sum tam tak hmangin Europe a club tha ber te zinga inhlankai an lo tum ve mek a. Coach naupang leh dangdai, hmabak eng tak nei Mourinho chu Abramovich chuan a hel ta a, Mourinho pawh chuan Club lian dang Liverpool ang te sawmna hnawlin Chelsea chu a zawm ta ani. Manager transfer hi thil thleng zen zenlo ni mahse, ani chu kum khata £4.2 million hlawh a, Manager hlawh tam ber pawl ni turin a lei chhuak ta ni.

Abramovich a sum hmang hian player tam tak a han lei chho a, tuna Chelsea Coach ni mek André Villas Boas pawh hi Porto atangin Chief Scout ni turin a la nghe nghe. Chelsea ah hian che tha chhunzawm zelin a season hmasa berah hian League Cup leh Premier League title a lakpui leh nghal a. A season lehah pawh Premier League title a lakpui leh a, tin FA Cup ah te a champion pui bawk a. Mahse Champions League ah erawh a champion pui thei ta bik lo ani.

Amaherawhchu Chelsea hmabak a eng chho viau laiin Club neitupa leh Board member-te nen player transfer chungchangah leh thildangah  inhmuhthiamlohna neuh neuh a lo awm chho tan ta aniang chu, rin loh tak maiin September ni 20, 2007 ah ‘inhriatthiam tawnna’ in Chelsea chu a chhuahsan ta mai a. hei hi mi tam tak chuan Club neitupa in a player duhzawng (Andriy Shevchenko ang te) a lak luh luih vangah te an ngai a, a dikna chen a awm mai thei ani.

The Special One

Chelsea a zawm tirh hian, “ Ka chapo min ti lo ula, mahse European Champion ka nia, mi bik ka niin ka in hria”, tiin Press Conference ah a sawi a. Heta tang hian The Special One tiin chanchinbu miten an ti lar ta a. A mizia leh tawngkam avang te in Mourinho hi a lar hle a, mei nei taka thil sawi te a hrat hle a, Coach dangte pawhin an ngaihtheihloh chang a tam hle. A bikin Manchester United Coach Sir Alex Fergusson nen hian tawngkam hmangin an inbei nasa thei hle a, a then phei hi chu an tactical mind game ani vek kherlo maithei ani! Media lam te pawhin a chezia leh press Conference a a thusawi te hi an lawm thei hle a, hei tak hi Coach dangte aia a lar lehzualna chhan pakhat ani ngei ang a, a fans te pawn an duh em em na chhan pakhat ani ngei ang.

Inter Milan

June 2008 ah chuan kum thum chhung atan Italian Club hlun Internazionale ah contract a ziak leh ta a. Hetah pawh hian a che tha leh hle a, a season hmasa berah hian Supercoppa Italiana leh Seria A title a lakpui a. A season dawt leh ah phei chuan Italian football a a hmasa ber ni turin competition pathum Serie A league, Coppa Italia, leh UEFA Champions League ah te treble a lakpui leh ta a. Football chanchina team hran ve ve hmanga UEFA Champions League a champion thei pathumna ani hial a. Heng a hlawhtlinna nasa tak avang hian IFFHS Best Football Manager 2009-10 lawmman leh FIFA Ballon d’Or Best Coach Award hmasa ber chu hlan ani leh bawk ani.

Real Madrid

A hlawhtlinna a duhtawk mai lo, mi duhthawh leh challenge thar zawng reng mi anih angin Inter ah chuan cham zui zel lovin May 2010 ah Real Madrid a zawm leh ta a. Khawvela Club hausa ber pawl leh lian ber, player tha bik rual awmkhawmna a han enkawl tur chu football fans hrim hrim tan pawh a nghahhlehawm hle. Hetih laia tam takin khawvela player tha ber pawla an ngaih Christiano Ronaldo a han enkawl tur te, Real Madrid hmelma kumhlun Barcelona leh Ronaldo aia thiam zawka mi tam takin an ngaih Lionel Messi a han hmachhawn tur te chu an nghakhlel em em ani.

Amaerawhchu Mourinho meuh pawh a che tha reng thei bik lo. A el clásico match hmasaber ah Barcelona chuan 5-0 ngawt maiin Real Madrid chu an sawp ta. Sawiselna tam tak a tawh phah reng ani. Mahse April ni 20, 2011 ah Barcelona chu 1-0 a hnehin a Spanish trophy hmasaber chu Copa del Rey final ah a la ta ani. Hei hi Real Madrid in kum 18 chhunga an cup lak leh hmasaber a ni nghe nghe.

Tun thleng hian kan hriat theuh angin Real Madrid Coach a la ni ta zel a. Coach naupang pawl tak a la nia, a statistics han en hian hei aia dinhmun ropui zawk a la thlen ngei a rin theih awm e. Amah ngaisang tute leh ngaisang vaklo te tan pawh, football fans hrim hrim te tan chuan Mourinho hi The Special One ngei chu a lo ni e!

Managerial Statistics