Footballer ropui bera mi tam takin an sawi thin, Pele pawhin footballer ṭha a thlan zinga tel pha, a hmel en mai chuan musician emaw filmstar nih duh hmel zawk tak, hmel footballer lo ve tak ‘Pavel Nedved’ hi 30 August 1972 khan Cheb, Czechoslovakia-ah  a lo piang a.  A hunlaia attacking midfielder/winger ṭha ber pawla sawi ngam a ni. 2003 khan Ballon d’Or (European Footballer of the Year) a dawng a, Czech player-a dawng thei pahnihna a ni a, Czechoslovakia kehdarh hnuah phei chuan a hmasa ber a ni nghe nghe. 2004 khan 2^nd Golden Football Award a dawng bawk a ni.

Club Career:

Sparta Prague (1993 -1996)

A tetlai atangin football hi a khel nasa hle a, local team ah te a khel chho ve nawk nawk a. 1991 khan Dukla Prague ah khelin a kumleh (1992) ah erawh Sparta Prague-ah contract a ziak a, a tifuh kher mai le. 1992-1993 ah Czechoslovak League-ah an champion a. 1993-1994 leh 1994-1995 khan Gabrinus Liga-ah an champion a. 1996 khan Czech Republic Football Cup-ah an champion bawk a ni. A khelh ṭhat em avang hian ram tan Euro 1996 pawh a khel a, Euro ah hian a hming a chher hle a ni.

Lazio (1996-2001)

Euro 1996 final-ah Germany lakah tlawm mah se final an luhna kawngah hian player pawimawh tak a nih zia leh a talent ṭhatzia chu hmuh hmaih chi a ni lova. Euro zawh hian Sparta Prague atang Lazio-ah a lut a.  1997-1998 bakah 1999-2000 khan Coppa Italia (TIM Cup) ah Lazio a champion pui a, 1999-2000 final phei hi chuan 1^st leg-ah a pet goal ve nghe nghe a ni. Supercoppa Italiana (Italian Super Cup) ah 1998 leh 2000 khan an champion bawk a, 1998 ah pawh hian final-ah goal a thun leh a ni.

1999 khan UEFA Cup final ah 2-1 a Mallorca hnehin an champion a, final-a chakna goal hi a thun a ni nghe nghe. He tournament-ah hian a cheṭha hle a, goal pawimawh tak tak a thun a ni. Hemi hnu lawk hian UEFA Super Cup ah UEFA Champions League Champion Manchester United hnehin an champion zui leh a. 1997-1998 khan UEFA Cup Final ah Inter Milan lakah an vanduai a, Runner-Up an nita a ni. 1990-2000 khan Seria A Champion an ni bawk. Heng zawng zawng ah hian player rinrawl ber leh ṭangkai ber pawl a ni vek a, a talent leh workrate ṭhat vang hian club tam tak pawn an hel nasa hle. Lazio tan hian game 204 khelin goal 54 a thun a ni.

Juventus (2001-2009)

Real Madrid-in football khawvelah ro an rel a, kum 2001 ah player ropui tak FIFA World Footballer of the Year nilai Zinedine Zidane chuan a club Juventus chhuahsanin Real Madrid a zawm. Juventus chuan Zidane-a thlaktu tur player ṭha a zawng a. Chutah footballer ropui tak, a fans te’n a ‘Czech Fury’ tiha an koh Nedved-a hming a rawn lang a. Juventus chuan € 41 million-in Lazio atang hian an la ta a ni. Club hruaitute hian duh an thlang fuh khawp mai. Khawvela footballer tha ber ni thei turin Juventus ah hian a hming a chher chhunzawm ta a ni.

Juventus-ah hian Zidane-a awmloh pawh hriatloh khawpin a khel ṭha a. 2001-2002 leh 2002-2003 khan a zawnin Serie A ah an champion nghal a. 2003 phei kha chuan UEFA Champions League-a Juventus in final an luhna kawnga player pawimawh ber leh playmaker ber a ni a, double yellow card vangin final a khel thei lova, penalty-ah AC Milan lakah an tlawm ta a nih kha. Nedved hian final kha khel ta se chuan Juventus hi an champion lovang tih a sawi theih miah loh a ni.  Hemi kum vek hian European Footballer of the Year ah thlan a ni nghe nghe. 2002 leh 2003 ah Supercoppa Italiana ah an champion bawk.

2004-2005 leh 2005-2006 khan Serie A ah an champion leh a, mahse hei hi vanduaithlak takin ‘Calciopoli scandal’ vangin hlihsak an ni a, Serie B ah paihthlak zui an ni. Hemi season hian Champions League ah khelh an phalsak lova, pawisa tam tak an chawi mai bakah hremna neuh neuh an tawk bawk. Hei vang hian Nedved hi chhuak tur anga sawi a ni hman a, mahse a veteran player pui – Buffon, Del Piero leh Trezeguet te nen Juventus ah hian an châm a, Serie B ah champion nghalin Serie A ah an in hlangkai chho leh a ni. Club dangah chhuak tur angin sawi awm mah se a club hmangaih em em Juventus-a a khelhlai ngeiin 2009 khan a ball-boot a khai ta a ni. Football chawlhsan mah se Juventus ah hian Director leh Board member a ni.

International Career:

1994 atang khan ram tan khel ṭanin Euro 1996 khan hming a chher hle a. Euro zawh hian Lazio ah a lût rêng a ni. 2000 aṭang khan captain niin Euro 2004 pawh khan a ram a chetṭhat pui hle a. Semi final ah Champion team Greece lakah an tlawm ta hlauh a ni. International football a chawlhsan zet a, mahse coach Karel Bruckner sawmna vangin World Cup 2006 qualifying playoffs khel turin a rawn let leh a, Norway hnehin a vawikhatna atan World Cup an khel ve ta a. Group stage paltlang zo lovin World Cup zawh hian International football a chawlhsan hlen ta a ni.

Team Honours:

Sparta Prague:

* Czechoslovak: 1992-1993

* Czech Gambrinus Liga: 1993-1994, 1994-1995

* Czech Republic Football Cup: 1996

Lazio:

* Serie A: 1990-2000

* Coppa Italia: 1997-1998, 1999-2000

* Supercoppa Italiana : 1998, 2000

* UEFA Cup Winners’ Cup: 1998-1999

* UEFA Super Cup: 1999

* UEFA Cup Runner Up: 1997-1998

Juventus:

* Serie A: 2001-2002, 2002-2003, 2004-2005, 2005-2006 ( 2004-2006 hi chu hlihsak an ni)

* Supercoppa Italiana : 2002, 2003

* Serie B: 2006-2007

* UEFA Champions League Runner-Up : 2002-2003

Individual:

* Golden Ball (Czech Republic): 1998, 2000, 2001, 2003, 2004, 2009

* Czech Player of the Year: 1998, 2000, 2003, 2004

* Serie A Footballer of the Year: 2003

* Serie A Foreigner Footballer of the Year : 2003

* European Footballer of the Year ( Ballon d’Or) : 2003

* Golden Foot: 2004

* UEFA Team of the Year: 2003, 2004, 2005

* ESM Team of the Year: 2002-2003

* FIFA 100

* UEFA Euro 2004 Team of the Tournament: 2004

Reference : en.wikipedia.org