Krismas kan hmang zo a, keini lamin nuam taka kan hman laiin Premier League player te chuan practice na hunah an hmang thung a. Ruaitheh ni tiin keini lamin ruai kan buatsaih laiin anni chuan boxing day tiin inkhel turin an inbuatsaih thung a, uluk taka kan ruai buatsaih chu a tui ang bawkin, anni pawn uluk taka an inbuatsaih avangin inkhel pawh a hmuhnawm ngei dawn a ni. Chak ngei tuma theihtawp an chhuah chu keini lamin Krismas ruai nen puar peng pawng pawng kan lo en dawn a ni.

Chelsea Vs Fulham (ESPN – 6:25, LIVE)
London Derby ah chuan mi ngaihven hlawh lo ber pawl a ni anga, Russian Revolution hnuah phei chuan heng team pahnih te hi chu Davida leh Goliatha ang mai a in len hleih anni tawh a ni. Mahse Davida pawn Goliatha a hneh theih ang chiahin football ah pawh hian chak tur zawk hi hriat har tak a ni.

Chelsea hian League Leader Manchester City aiin points 11 in an hniam zawk a, Champion tum team tan chuan dinhmun tha tak a ni lo. manager Andre Villas-Boas an a dinhmun derthawng tak sawhngheh a duh chuan zanin hian an chak ngei a ngai dawn a ni.

Fulham hian Stamford Bridge ah hian kum 1964 hnuah chak hmel an hmu leh tawh lova, chumai chu ni lovin vawi 30 an intum ah vawi 1 chiah an la hneh bawk. Manchester United an in sawp tir hnuah Fulham hi an tho leh thei angem tih hi zawhna lian tak a ni.

Manager thukhawchang:
Chelsea manager Andre Villas-Boas: “Home a Fulham leh Aston Villa (Kumhlui thlah zan) kan tum hunah point ruk kan hmu thei anih chuan Champion inchuhna ah chuan kan tel chiang leh khawp ang.”

Fulham manager Martin Jol: “Chelsea hi team tha tak annih avangin mi zawng zawng hmaah defending tha zawk (Man utd nena an defending aia tha zawk) kan khel thei anni tih kan lantir thei ang. Kan defence hi kan tih phui loh chuan team tha lakah kan chak ngai lovang.”

Manchester United Vs Wigan Athletic (ESPN – 8:30, LIVE)
Manchester United leh Wigan Athletic hi vawi 13 chiah an la intum tawh a, Man Utd hi an chak fai vek a ni. Wigan hian Old Trafford ah hian goal khat chiah an la thun a, chu goal chu Leighton Baines in 2006 Boxing Day a penalty hmanga a thun a ni. Mahse he match ah pawh hian Wigan hi 3-1 in an chak lo.

December thla ah hi Man Utd tan chuan thla duhawm a la ni rih a, QPR 2-0 leh Fulham 5-0 in an hneh a. Tun dinhmun ah chuan Premier League a chaklo hmel hmulo rei ber niin match 8 ngawt chaklo hmel an hmu tawh lo.

Chutihlaiin Roberto Martinez a pawl te hian vawi 7 Boxing Day a an inkhelh tawh vawi khat chiah chak loh hmel an la hmu a. He record tha tak hi an keeper Al-Habsi hmangin an chhunzawm ngei an tum dawn a ni. Mid-week a Liverpool draw thei team hian Man Utd hi an dang thei angem le?

Liverpool Vs Blackburn Rovers (Star Sports – 10:25, LIVE)
Zanin inkhel turah hian Banner tam tak hmuh beisei ila. Liverpool fans lamin Suarez an suppport-na banner an rawn tarlang anga, Blackburn lamin Steve Kean bang tura an duhzia lantirna banner an rawn tarlang bawk ang.

Blackburn hian Relegation zone a awm ve tho Bolton Wanderers an hnehloh avangin league mawngphahah an awm a. Steve Kean hian a dinhmun hi chelh chhunzawm zel a duh chuan Liverpool hi a chhe berah draw a ngaih tawh hmel a. Chutihlaiin hrem hmachhawn mai tur Suarez pawn a hmingchhe lutuk hliah khuh nan premier league a defending nei chhe ber te zing ami Blackburn lakah hian goal thun ngei a mamawh dawn a. Mahse goal thun hi Suarez tan hian thil awlsam a ni lo tih chu mid week a Wigan nen an inkhelh atang khan kan hre mai awm e.

Liverpool hian an home match hnuhngun pali ah Blackburn hi an la hneh vek a. Mahse Boxing Day a an intum hnuhnung ber tum 2006 ah kha chuan Blackburn hian an home ah 1-0 in an lo hneh thung. Blackburn hian tun season ah away ah an la chaklo avangin zanin pawh hian an chak rin chu harsa tak a ni. Engnge kan ngaihve dan le?

Bolton Wanderers Vs Newcastle United (ESPN – 10:30, DELAY)

West Bromwich Albion Vs Manchester City (Star Sports – 11:30, DELAY)

Sunderland Vs Everton

Stoke City Vs Aston Villa