2012/2013 season, Emirates Stadium a inkhel hmasaberah Arsenal leh an mikhual Sunderland te goal inpelovin an inhnehtawk. Season tantirh anih angin inkhel hi duhangin an la innawr tawklova, an la fimkhur deuh mah mah niin a lang. English football a tawnhriat neitha pahnih Arsene Wenger leh Martin O’Neill ten an khelhdan an inhrechiang tawk tih an lantir.

Tu te nge khel?
Arsenal: Szczesny, Jenkinson, Mertesacker, Vermaelen (c), Gibbs, Diaby, Arteta, Cazorla, Walcott, Gervinho, Podolski
Sunderland: Mignolet, O’Shea, Cuellar, Richardson, Cattermole (c), Gardner, Colback, Larsson, Mc Clean, Sessegnon, Campbell

Inkhelh tan anih atangin Arsenal in an khelmual an hmangthiam a ni tih an lantir a. Sunderland khelhdanah Martin O’Neill in a player te a remfuh viau dawn niin a lang thung.Arsenal in an player lei thar Cazorla leh Podolski te ah an innghahzia a lan rualin Walcott leh Gervinho te an rim hle bawk. Cazorla in goal thun theihna hun tha vawi thum dawn a nei a, Sunderland goalkeeper Mignolet in a lo dan hmante bakah goal sir deuh chiah ah a pet avangin a goal lo hlauh thin. Sunderland tan Mc Clean-a pet Szczesny in a lo dante kha a uihawm ngei mai. Arsenal lamin goal thun theihna hun nei ngah hle mahse an thun hleitheilova, chawlh a ni.

Second half tan leh a ni a. Mual neitu lamin an nawrna zual zel a. Veilam leh dinglam atangin an nawr tawn zak zak a, Arsenal striker Podolski awmna a lo fuhlo deuh thin niin a lang. Arsenal te hian Sunderland goal hnaihlam thleng phei mahse Sunderland player te goal hmaah an dingnghet a, Gervinho leh Walcott ten an pet tlangzolo ni berin a lang. Hun tawp lamah Arsenal in an lei thar Olivier Giroud leh Andrei Arshavin te dahlut mahse Sunderland lamin goal hnaihah an inhnawh nasa zual a, Arsenal tan a harsa zel. Hun a tawp thleng hian Arsenal hian nawr mahse a goal teuh hle tia sawi tur a awm hranlo. Arsenal tan inkhelh hmasaber hi an duhangin a awlsamlo tih a lang a, Sunderland tan Emirates Stadium a point khat hlawh a hlutzia an la hre dawn chauh niin a lang.

Inkhelh zawha mi ngaihven chu inkhel result aimahin Arsenal in FC Barcelona a Alex Song an hralh hi a ni a. Inkhelh bana Arsenal manager in Song a hralhna chhan nia a sawi chu, Song hian Barcelona kal a chak a, Diaby bakah dam mai tur Wilshere ka nei a, player thar lakluh mai tur a awm bawk tih a sawi. Inkhelh chungchang a sawinaah, an passing a la rang tawkloh thu a sawi a. Goal hnaiha an talbuai deuh leh chance tha an hmuhte goal a an chantir theihloh kha inzir a la ngaih thu a sawi bakah Sunderland ang chu a tir lama goal thunloh chuan a tawplama goal thun a harsat thinzia a sawi tel bawk.