Ancelotti in Torres chungah zangaihna lantir zel mahse Chelsea chanhimtu chu Torres ni lovin Brazilian Duo Luiz leh Ramirez te anni tlat.

He chakna avang hian Chelsea hian City lehpelin pathumna ah an awm chiah a. Tihian City hian an hmelma Man Utd aia match khat a khel tlemin point 9 in an thlau ta ni.

Inkhelh tan hmaa City Captain Tevez inhliam chu Chelsea lam tan chuan lawmna a ni ngei ang, Tevez hian United a chhuahsan hnuah Chelsea vawi thum a zawnna an hnehna ah goal 4 a thun tawh a ni.

Fabio Capello chuan he inkhel hi en in, Chelsea fans te chuan “England Captain pakhat chiah a awm” tiin an au rual a, Chelsea Captain leh England Captain ni leh ta Terry tan chuan thu hriat nuam tak a ni ngei ang.

Inkhel tan tirh atangin game a physical nghal em em a, mahse players te quality san ngaihtuah erawh chuan inkhel hmuhnawm tak a ni lo. First half ah hian goal hlauawm em em a awm lova, Dzeko ball dawng sual te, Kalou a chance tha tak Ramires in a lo tihbuai palh te, Yaya Toure ball pass tur Luiz in a lo head chhuah sak te chu han hlauawm deuh a ni mai.

Second half ah Chelsea an rawn chetha sawt a, midfield ah ball an chang tam zawk a. Drogba leh Anelka te rawn luh hnu phei chuan goal ah an hlauawm tawh ngei mai. Luiz a freekick hlawh chhuah chu Drogba in a pet a, chu ball tha zet mai chu Luiz chuan mawi takin a lo head goal a. Mahse City lam an la tlawm mai lo, Johnson leh Balotelli te rawn luh tirin sut an an tum a. Mahse an beiseina ti thamral turin Brazilian midfielder Ramirez chuan Essien a pass chu hun pek belhah thun lehin Chelsea chu 2-0 in a chakpui ta a ni.