Premier League nawmna chu club lian an tam hi a ni. Kar hmasaah Barclays Premier League club hrang hrangten an match hmasaber an khel tawh a, duhthusama bulṭan an awm laiin tifuh lo fe fe pawh an awm nual. August ni 25 leh 26 ah gameweek 2 khelh leh tur a ni a, bulṭan ṭha hoin chhunzawm an duh ang a, bulṭan ṭha loten insiamṭhat an tum ang. Inkhel en chakawm tak tak zingah nghahhlelhawm zual bik a awm nual. Club lian leh club lian intum tur an awm nghal a, Chelsea in Newcastle United an mikhual tur te, Arsenal in Stoke City an tlawh turte hian mit a la a, Liverpool in Manchester City an mikhual tur mawlh mai hi kartâwp tinghahhlelhawmtu a ni.

Fixture:

25 August
5:15 pm: Swansea City vs West Ham United
7:30 pm: Aston Villa vs Everton
7:30 pm: Manchester United vs Fulham
7:30 pm: Norwich City vs QPR
7:30 pm: Southampton vs Wigan Athletic
7:30 pm: Sunderland vs Reading
7:30 pm: Tottenham Hotspurs vs West Bromwich Albion
10:00 pm: Chelsea vs Newcastle United

26 August
6:00 pm: Stoke City vs Arsenal
8:30 pm: Liverpool vs Manchester City

Manchester United vs Fulham

Hemite pahnih hi Old Trafford-ah an insu dawn a, ‘home team’ Manchester United hi Everton laka tlawm hlim an ni a, Fulham hian Norwich City 5-0 ngawtin an sawp thung. Bulṭan dan inang lo tak an ni a, Man United in Everton laka an chak loh kha tihsual palh a ni tih lantir an tum ang a, Fulham hi hneh ngei an tum ang. Fulham in Norwich an hneh kha tihfuh a ni bik lo tih entirnan Old Trafford ah ‘ngei’ chak an tum thung dawn a ni.

Rio Ferdinand, Phil Jones leh Chris Smalling te chu he match ah hian an khel thei dawn lo a, Jonny Evans erawh a dam hman maithei a,  mahse ani pawh a chiang chuang lo. Robin van Persie hi bench-a a ṭhut ‘mai mai’ a rinawm loh a, a tir aṭanga a luh nghal rin a ni. Fulham tân Clint Dempsey a khel dawn lo a, a ni hi Fulham aṭanga chhuah tum, a pûte nena inhmuthiam vak lo a ni. Kerim Frei leh Philippe Sanderos te chu inhliam vangin an khel thei lo bawk ang.

Old Trafford bikah hian tunhnaiah Fulham in Man United an ngam lo hle a, Old Trafford-a an intum hnuhnung panga-ah Fulham hian goal an la thun ve miah lo a, Premier League bikah hian an intum hnuhnung pariatah Manchester United an la chak vek a ni. A pumpuiah Old Trafford ah hian vawi 35 intum tawhin, United hi vawi 30 an chak a, vawi 3 inhnehtawkin, Fulham hi vawi 2 chiah an chak. Fulham hi away game ah an ṭha tawk lo hrim hrim a, tunhnaia away game 14 an khelh ah goal 9 chiah an thun thei a ni.

Heng zawng zawng han en hian Manchester United hi chak zawk turah dah mai a awl a, mahse Fulham striker ‘form’ tak Petric leh a ṭhiante hian United tlarhnung ‘phuahchawp’ hi an huphurh bik hauh lo ang. Manchester United hmatâwngte hian chakpui tham khawpa ṭha an ni a, player malkhaia an ṭhat zawkna hi field chhungah a tak chantir thei tak ang maw?

Chelsea vs Newcastle United

Chelsea hian Premier League 2012-13 ah goal 6 an thun tawh a, heng zinga goal 5 hi Eden Hazard siamchhuah a ni. He Belgian attacking midfielder hi season thara player langsar ber pakhat a ni tawh. Chelsea hian match hnihah point ruk hmu tawhin Premier League hmahruaitu an ni mek a, goal thun lamah chuan harsatna an nei lo. Newcastle United hi kar hmasa-a Tottenham Hotspurs hneh zo hlim hlawl, season hmasa-a pangana ni phak an ni a, Premier League team ‘ṭha’ a chhiar tel an ni.

Chelsea tân captain John Terry leh Marko Marin te an khelh theih a beiseiawm loh a, David Luiz erawh inhliam vanga match 1 a chawlh zawk hnuah a khel thei ang. Newcastle United hian dam chiang lo an nei nual a, Cheick Tiote, Shola Amoebi, captain Fabricio Coloccini leh Demba Ba te hi an khelh theih dawn leh dawn loh a la hriat theih loh a ni.

Chelsea hian tlarhmaah Fernando Torres chawm turin Oscar, Juan Mata leh Eden Hazard te an nei a, anni pali hi eng defence pawh ṭhiat thei tura ṭha an ni. Winger ‘dik tak’ an nih loh avangin a laiah an tam deuh ṭhin a, a sira pawt turin left back Ashley Cole leh right back Ivanovic te an tlanchhuak nasa a, an chhuahsan hmunawlah hian lehlam winger te an hlauhawm deuh ṭhin thung. Newcastle United hian Hatem Ben Arfa an nei a, ani hi Tottenham lakah a khel ṭha ngang mai a, Papiss Cisse leh Gutierrez te ho nen Chelsea keeper Pter Cech tibuai pha tak ang maw?

Season hmasa khan Stamford Bridge ah Cisse goal hnih hmangin Newcastle United 2-0 in an chak a, khami hma khan vawi 18 zet chu chak ni hmel hmu lovin Stamford Bridge an lo chhuahsan tawh. Chelsea game fuh lai a ni a, player an nei ṭha zawk bawk a, team ‘ṭha’ pahnih inkhelah a ṭha zawk Chelsea hi an chak zawk a rinawm.