Arsenal rawlthar forward Gabriel Martinelli hi mi tam zawk chuan kan la hre lo pawh a ni mai thei. Brazil innghahna la ni thei tura beisei hian Europa League-a Standard Liege an hmachhawn tumin goal 2 thunin a thiante goal thun tur vawi khat a siamsak a, ngaihven a hlawh.
Brazil-a piang ni mahse a pa hi Italian a nih avangin Italy tan pawh a khel thei. Hei vang hian Italy national team manager Roberto Mancini chuan tunhnaiah Italy tana khel turin koh a tum a, Martinelli hian thutlukna ala siam thei lo.
Hetih mek lai hian Brazil lam pawhin an hauh na hle a, kumin May 20 khan Brazil national team manager Tite chuan 2019 Copa América atana inbuatsaih mek Brazil senior team zinga training turin a lo ko daih tawh a ni.
Kumin nipui laia Arsenal player lakluh hmasak ber niin a man pawh £6m lek a ni a, North London club tantuten July thlaa Brazilian club Ituano atanga an lakluh khan ‘Tunge?” tiin zawhna an inzawt hlawm. A mak hran lo, a man a to lova, sulhnu ropui a la nei lo.
Pre-season training-ah a thatzia a pholang a, a chetran leh tlan chak bakah ball a thiam a, goal hmaa a hriam bawk avangin Neymar te han tluk thei tura ngaih a ni. A kawng erawh a la thui; kham leh suar, buar leh hling hmun paltlang a la hmabak.
Kumin hian Arsenal tan vawi hnih chiah bul la tanin goal 4 a thun tawh thung. League Cup-a 5-0 a Nottingham Forest an hneh tum khan goal hnih a thun a, Europa League a Standard Liege an hmachhawn tumin goal 2 bawk a thun leh.
A khel en chik chuan a ke ranzia leh ball a thunun hnehzia an sawi thin. Engdang vang ni lovin a naupan deuh laia Futsal a khelh thin vang a ni. Kum 9 mi a nih lai atangin Corinthians futsal team tan lo khel tawh thinin kum 14 a tlin thlengin a khel. Kum 2015 a Brazilian fourth division club Ituano a zawm hnuah Futsal a chawlhsan.
Brazilian midfielder goal hmaa hriam zet mai Philippe Coutinho pawh hi Futsal player ni thinin hmun zim zawka ball thunun kawngah a naupan laia futsal a lo khelh thin hian a pui nasa hle.
Martinelli hian left winger anga khelh duh ber mah se Brazil club tan striker anga a khelh thin avangin Arsenal manager Unai Emery pawhin striker leh left winger angin a chhawr kawp thin. A player ngaihsan ber Portugal star Cristiano Ronaldo nen an khelh dan a inzul hle bawk.
Martinelli chuan kumin kumtir lama ESPN-in an kawmnaah kum 2015-2017 inkar khan kum hnih chhung chu Manchester United-a luh tumin ni 15 chhung vel trial a lo neih tawh thu a sawi.
Manchester Evening News tarlan danin Martinelli hian kum 14 a upa a nih laiin United striker Mason Greenwood nena inkawpin United youth team tan Lincoln Under-18 an lo hmachhawn tawh a, hemi tum hian 2-0 in United an chak a, an hnena trial nei Brazilian naupang hi an ngaihven zui lo.
Martinelli chuan, “Professional (player) zawng zawngte ka hmu kim a, [Patrice] Evra, [Marouane] Fellaini leh midangte chu thla min lakpui turin ka ngen a, thla kan la ho. [Paul] Pogba khan Brazilian ka ni tih a hria a, nuam ka tih leh tih loh, khawiah nge ka khelh thin, tihte min zawt a, thla pawh kan la dun nghe nghe,” a ti.
United-in an duh lo chung hian Europe club lian hrang hrangte mit a la hle a, Belgian club Gent leh Spanish club ropui Barcelona leh Real Madrid ten North London club a pan hma hian an lo hel tawh. Manchester City an bang bik lo.
Hnawl lo ni tawh mahse tunah chuan an hmelma club player pawimawh a ni chho mek a, a tisual fe a nih loh chuan sang tak a thleng ngeiin a rinawm. Chutih rual erawh chuan an hnena a trial laia la duh lotu Red Devils tan erawh a uiawm thung ang.
Naupang inkhel thiam lakluh kawngah hian tih fuh, tihsual a tam awl em em a, Europe club hrang hrang ten player tha tak tak an lo hnawl nual tawh.
Tuna a khelh mekna Arsenal pawh hian Cristiano Ronaldo la lut thei dinhmuna an din laiin tun ang hian a ropui ring bik lovin a man an chhiar zatin an la ngam lo. Kylian Mbappe pawh hi man nei lova la lut thei dinhmunah lo ding tawh mah se a chhung ten zangnadawmna ang chauh sum an phut an pek ngam loh avangin an lo la tawh lo bawk.
Hei mai hi ala ni lo! Kum 2016 khan German winger Serge Gnabry chu £5m lekin Werder Bremen lamah an hralh a, a ram leh Bayern Munich tan par a chhuang mek. Gnabry chungchangah erawh a talent hriain Bayern Munich-in thluak an vawrhvir niin a lang.
Arsenal rawlthar kum 2017 a Pound 54,000 leka PSV Eindhoven lama an hralhchhuah tak Donyell Malen chuan ram leh club tan par chhuang ve mekin kum 20 mi hian tun season-ah vawi 18 a inlan atang goal 13 a thun der tawh.
Lei thatna hmun pakhatah thlai zawng zawngin rah duhawm an chhuah vek kher lova, tui tha dawng zawng zawngin parmawi an chhuah vek chuang lo.
Heta vul lo kha sawtah an vul a, sawta zikno hring chhuah thei lo khan hetah kuhmumin par an chhuang a ni mai e.
generic for cialis
cialis canada
Branded viagra
Free viagra