Europe a ram intelkhawm pawl lian ber European Union chuan Chelsea neitu Roman Abramovich chu an hrem thu an puang ve leh ta e.
EU hian Roman an hrem chhan chu hetiang hian an ziak –
“Vladimir Putin nena inkungkaihna ṭha tak nei a ni a. Evraz company a neitu (share nei tam ber) a ni.
Roman Abramovich hi Russia sumdawng lian, Vladimir Putin nena inkungkaihna ṭha tak hun rei tak lo nei tawh a ni a. President Putin hi a duh huna be pawp thei mai khawpa in hnaih an ni.
Hetianga Russia ram hruaitu nena inkungkaihna ṭha tak a neih avang hian a hausakna pawh a pung zel a. Russia a thîr company lian Evraz-ah share ngah ber niin he company hi Russia a chhiah chawi hnem ber te zinga mi an ni.
Chuvang chuan Crimea awp bet a Ukraine bei leh mektu Russia sawrkar hotute aṭanga hlâwkna têltu hi Russia in Crimea leh Ukraine an khawih theihtu tura sum leh paia nasa taka an ram hmalakna puitu a ni.”
European Union in hetia Roman Abramovich an hrem tâkah chuan EU hnuaia ram inziaklutte a a thil neih (neitu nihna a chelhnate) te hrên sak vek a ni leh dawn a. Tin EU hnuaia ram hovah a luh khapsak a ni bawk ang.
BBC in Roman Abramovich chanchin an chhuinaa thil hrang hrang an hmuhchhuah zinga tlem i han tarlang tel bawk i la.
– Roman Abramovich hian $250m senga a lei oil company Sibneft kha a hnu lawkah Russia sawrkar in $13 billion in an lei sak. He Sibneft a lei theihna tur hian auction-ah a buaipuitute $10m a pê a, chumi avang chuan a chang ta a ni. Sawrkar hnena Sibneft a hralh leh hian $2.7 billion velin sawrkar hi a bum niin Russian parliamentary investigation chuan an tarlang.
– Kum 2002 khân oil company tho Slavneft an auction-ah pawh a buaipuitute maktaduai têla thamin Slavneft chu a chang leh a. Hemi ṭum hian a lei ngamna zât lêt in Chinese company ten an lei ngam a, mahse Chinese company aiawha kalte hi kidnap an ni a, Roman hian Slavneft hi a chang zui ta a ni. Hemi ṭum hian Moscow airport ah Chinese company CNPC aiawhte hi airport chhuahsan lovin an phiar (kidnap) a, tihluihna in auction aṭangin an inhnuhdawh tir.
– 1992 ah diesel phur train rawk chungchanga hma latu ber chu Roman Abramovich a ni.
– A thurualpui Boris Berezovsky nena sawrkar sum a hlêp ru ni a an hriat avangin Russia hotute chuan thubuai siamsak an tum a, mahse khatih hunlaia president Boris Yeltsin chuan Roman hi a hun tlat. Berezovsky nen hian a hnuah intibuaiin court-ah an in khing zui nghe nghe a, Roman hian thiam chang mahse court hmaah $10m a auction buaipuitute a tham thu a inpuang thung.
Heti tak maia UK sawrkar leh European Union in Chelsea neitu Roman Abramovich an khawih na hi chhan tam tak a awmin a rinawm a. A chunga ziahte hi chûng a chhan ni a an sawi tam tak zinga tlemte chauh an la ni.
Chuvang chuan Chelsea hi Premier League hotute kuta daha hralh tura league thuneituten an buaipui mai loh chuan hun eng emaw chen chu an buaiin a rinawm a. Hemi pumpelhna tur kawng awmchhun chu an club hruaituten Premier League hnena an club lei leh hralh tur dah a nih tawh mai hmel tun dinhmunah chuan.
