Hrileng vanga thla hnih zet chawl tawh Premier League tan leh tur a hma lak a nih mek laiin vawiin khan Premier League club pathum a player leh staff 6 te chuan Covid – 19 an kai tih hmuchhuah a ni.
“Premier League chuan he chanchin thar hi he inelna zahawm nan leh langtlang tak a kalpui zel a nih theih nan kan puang chhuak a ni a. Club official emaw mimal hminghmerh tarlan a ni dawn lo a, chanchin thar hi test neih zawhah puan zel a ni ang,” tiin thuchhuah an siam.
Tarlan tawh angin March ni 13 atanga chawl tawh Premier League club te chu vawiin atang khan ‘social distancing’ zawm chunga training phalsak an ni a, amaherawhchu vanduai thlak takin player leh staff mi 748 test zinga mi 6 chu an lo positive a ni.
Ruahman lawk ang chuan Premier League hi June ni 12 ah khelh chhunzawm tum a ni a, mahse sawn hlat a nih a rinawm hle.
